យោងតាមរបាយការណ៍ប្រចាំឆ្នាំរបស់ធនាគារជាតិ នៃកម្ពុជាបង្ហាញថា ក្នុងឆ្នាំ ២០១៨នេះ សម្រាប់តែគ្រឹះស្ថានធនាគារប៉ុណ្ណោះ បានបញ្ចេញប្រាក់កម្ចីដល់អតិថិជនជាង ២,៦ លាននាក់ ដែលតម្លៃជាទឹកប្រាក់មានជាង ២៤ ពាន់លានដុល្លារអាមេរិក ស្មើនឹងកំណើន ១៨% ធៀបនឹងឆ្នាំ២០១៧។ ដោយឡែក ប្រាក់បញ្ញើរបស់អតិថិជនបានកើនឡើង ជាង១៥ភាគរយ ដែលគិតជាទឹកប្រាក់ស្មើនឹងជាង ២២ពាន់លានដុល្លារ និងមានអតិថិជនដាក់ប្រាក់បញ្ញើ ជាង ៦លានគណនី។
ដោយឡែក ប្រាក់កម្ចីក្នុងវិស័យមីក្រូហិរញ្ញវត្ថុវិញ បានផ្តល់ឲ្យអតិថិជនជិត ២លាននាក់ ជាមួយនឹងទឹកប្រាក់ជាង ៥ពាន់លានដុល្លារនៅក្នុងឆ្នាំ ២០១៨ កើនឡើងជាង ៣៤ ភាគរយ។ ខណៈអ្នកដាក់ប្រាក់បញ្ញើមានជាង ២លាននាក់ ដែលគិតជាទឹកប្រាក់មានជាង ២,៥លានដុល្លារ។
ដូច្នេះ បើសរុបប្រាក់កម្ចីដែលវិស័យ ធនាគារ និងគ្រឹះស្ថានមីក្រូហិរញ្ញវត្ថុបានផ្ដល់ជូនអតិថិជន គឺមានប្រមាណ ៣០ពាន់លានដុល្លារអាមេរិក ខណៈដែលអ្នកខ្ចីលុយគឺមានរហូតដល់ជាង ៤លាននាក់។ រីឯ ទំហំប្រាក់បញ្ញើវិញ មាន អ្នកដាក់ប្រាក់បញ្ញើវិញមានលើស ២២ពាន់លានដុល្លារអាមេរិក និងចំនួនអ្នកដកប្រាក់បញ្ជើ មានរហូតដល់ប្រមាណ ៨លានគណនី។
ធនាគារជាតិនៃកម្ពុជាបានចាត់ទុកថា វិស័យធនាគារ និងហិរញ្ញវត្ថុនៅកម្ពុជាមានកំណើនល្អនៅក្នុងឆ្នាំ ២០១៨ ដោយទ្រព្យសកម្មរបស់វិស័យនេះបានកើនឡើងជាង ១៩ ភាគរយពីមួយឆ្នាំទៅមួយឆ្នាំរហូតដល់ទៅ ៤០ ពាន់លានដុល្លារ ដែលគាំទ្រដោយកំណើនមូលនិធិកម្ចី និងបញ្ញើរបស់អតិថិជន។
របាយការណ៍ដដែលបញ្ជាក់ថា ប្រាក់កម្ចីពីវិស័យធនាគារ ភាគច្រើនត្រូវបានប្រើប្រាស់លើវិស័យ លក់ដុំនិងរាយ ដែលមាន២៨ភាគរយ សំណង់និងអចលនទ្រព្យ ១៦ភាគរយ កម្ចីគ្រួសារ ១៧ភាគរយ កសិកម្មជាង ៩ភាគរយ។
ដោយឡែក អ្នកខ្ចីពីគ្រឹះស្ថានមីក្រូហិរញ្ញវត្ថុ មានអង្គភាពគ្រួសារ ៣៣ភាគរយ សេវាកម្ម ១១ភាគរយ កសិកម្ម និងពាណិជ្ជកម្ម ២២ភាគរយដូចគ្នា។
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជាបានគូសបញ្ជាក់ថា ក្នុងនាមជាអាជ្ញាធរ និងជាអ្នកត្រួតពិនិត្យវិស័យធនាគារ និងហិរញ្ញវត្ថុនៅកម្ពុជា នឹងបន្តពង្រឹងជំនឿទុកចិត្ត និងអភិវឌ្ឍប្រព័ន្ធធនាគារប្រកបដោយប្រសិទ្ធភាព ភាពរឹងមាំ និងភាពប្រកួតប្រជែង។
អត្ថបទគួរឲ្យចាប់អារម្មណ៍!
ស្ថិរភាពនយោបាយ ការរីកចម្រើនគ្រប់ផ្នែកនៃវិស័យសេដ្ឋកិច្ច និងភាពរឹងមាំនៃប្រព័ន្ធធនាគារ គឺជាកម្លាំងចលកររដ៏សំខាន់ក្នុងការពង្រឹងជំនឿទុកចិត្តរបស់សាធារណៈជនលើប្រព័ន្ធធនាគារនៅកម្ពុជា។
បច្ចុប្បន្នកម្ពុជាមានធនាគារពាណិជ្ជចំនួន ៤៣ ធនាគារឯកទេសចំនួន ១៤ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ៧ គ្រឹះស្ថានមីក្រូហិរញ្ញវត្ថុចំនួន ៧៣ និងគ្រឹះស្ថានឥណទានជនបទចំនួន ២៧៣៕
None
