កម្ពុជារកឃើញអ្នកវិជ្ជមានកូវីដ១៩ ចំនួន៣៨៨នាក់ ខណៈអ្នកជាសះស្បើយមាន៤៨នាក់

ក្រសួងសុខាភិបាលកម្ពុជា នៅព្រឹកថ្ងៃទី០១ខែឧសភា ឆ្នាំ២០២១នេះ បានចេញសេចក្តីប្រកាសព័ត៌មានពីការរកឃើញអ្នកឆ្លងជំងឺកូវីដ-១៩ចំនួន៣៨៨នាក់បន្ថែមទៀត ខណៈអ្នកជាសះស្បើយមាន៤៨នាក់ ស្របពេលដែលអ្នកស្លាប់កើនឡើងថែម៣នាក់ទៀត។

រថយន្តសង្គ្រោះតម្រង់ជួររងចាំយកអ្នកវិជ្ជមានកូវីដ១៩មកសម្រាកព្យាបាលនៅមជ្ឍមណ្ឌល ម៉ូឌែន ២ ក្នុងសង្កាត់ចាក់អង្រែក្រោម ខណ្ឌមានជ័យ រូបថតដោយ ប៊ុក វន្ថា/ខេមបូណូមីស

សេចក្តីប្រកាសព័ត៌មានរបស់ក្រសួងសុខាភិបាលបានឲ្យដឹងថា ក្នុងចំណោមអ្នកវិជ្ជមានកូវីដ១៩ទាំង ៣៨៨នាក់នោះ មានករណីចម្លងក្នុងសហគមន៍នៃ «ព្រឹត្តិការណ៍២០កុម្ភៈ» ចំនួន៣៨៧នាក់ រីឯ១ករណីទៀតជាអ្នកដំណើរពីបរទេស ស្របដែលអ្នកជាសះស្បើយមានចំនួន ៤៨នាក់ ដែលតម្រូវឲ្យចេញពីមន្ទីរពេទ្យ ហើយបន្តធ្វើចត្តាឡីស័កនៅផ្ទះ១៤ថ្ងៃបន្ថែមទៀតដោយខ្លួនឯង។

សម្រាប់អ្នកវិជ្ជមានករណីសហគមន៍ទាំង ៣៨៧នាក់ រួមមាន រាជធានីភ្នំពេញ ៣៣១ករណី - បន្ទាយមានជ័យ - ៣៥ករណី - ព្រៃវែង - ៨ករណី - កណ្ដាល ៤ករណី - កំពង់ស្ពឺ ៣ករណី - តាកែវ ២ករណី - កំពង់ចាម - ២ករណី - សៀមរាប ១ករណី និង ស្វាយរៀង ១ករណី។

នៅក្នុងសេចក្តីប្រកាសព័ត៌មានដោយឡែកមួយទៀតរបស់ក្រសួងសុខាភិបាល ចេញផ្សាយក្នុងថ្ងៃនេះដដែលបានគូសបញ្ជាក់ថា មានអ្នកជំងឺកូវីដ០៣នាក់ទៀត បានស្លាប់បាត់បង់ជីវិតដោយសារកូវីដ-១៩ ក្នុងនោះមាន បុរសឣាយុ ៦១ឆ្នាំ ស្រ្តីឣាយុ ៦៧ឆ្នាំ និងស្រ្តីឣាយុ ៧៦ឆ្នាំ។

សូមបញ្ជាក់ថា គិតត្រឹមថ្ងៃទី០១ ខែឧសភា ឆ្នាំ២០២១ កម្ពុជាបានរកឃើញអ្នកឆ្លងកូវីដ១៩ សរុបចំនួន ១៣ ៧៩០ នាក់ហើយ ក្នុងនោះអ្នកជាសះស្បើយចំនួន ៥២០០ នាក់, អ្នកកំពុងសម្រាកព្យាបាលជំងឺ ចំនួន ៨៤៨៧នាក់ និងស្លាប់បាត់បង់ជីវិតចំនួន៩៦នាក់៕