លោក អួន ស៊ីឡុត ប្រធានសមាគមស្វាយចន្ទីកម្ពុជា នៅតែអះអាងថា ប្រទេសវៀតណាម គឺជាទីផ្សារនាំចេញគ្រាប់ស្វាយចន្ទីដ៏ធំមួយរបស់កម្ពុជា ក៏ប៉ុន្តែ ដោយសារបញ្ហាប្រឈមក្នុងខ្សែចង្វាក់ផលិតកម្មដំណាំស្វាយចន្ទីនៅកម្ពុជា។ បើតាមអ្នកជំនាញរូបនេះ ក្រៅពីទីផ្សារវៀតណាម ទីផ្សារផ្សេងៗទៀត គឺនាំចូលគ្រាប់ស្វាយចន្ទីកម្ពុជាដែលបានកែច្នៃរួចតែប៉ុណ្ណោះ ហើយចំនួននេះមានតិចតួចណាស់ បើធៀបនឹងការនាំចេញគ្រាប់ស្វាយចន្ទីឆៅ។ ជុំវិញបញ្ហានេះ លោក អួន ស៊ីឡុត ក៏បានគូសបញ្ជាក់ដែរថា សមាគមស្វាយចន្ទីកម្ពុជា បាននិងកំពុងស្វិតស្វាញ ក្នុងការទាក់ទាញវិនិយោគិនឲ្យចូលរួមវិនិយោគកែច្នៃក្នុងខ្សែចង្វាក់ផលិតកម្មស្វាយចន្ទីនេះ ដើម្បីលើកកម្ពស់ និងជំរុញការនាំចេញគ្រាប់ស្វាយចន្ទីទៅកាន់ទីផ្សារអន្តរជាតិ។
ដោយឡែក ទាក់ទងនឹងស្ថានភាពវិស័យស្វាយចន្ទីនៅកម្ពុជា ប្រធានសមាគមរូបនេះ កត់សម្គាល់ឃើញថា ស្ថានភាពនៅក្នុងខ្សែចង្វាក់ផលិតកម្មដំណាំស្វាយចន្ទីនៅកម្ពុជា នៅឆមាសទី១ឆ្នាំនេះ ហាក់មិនសូវមានការប្រែប្រួលប៉ុន្មានឡើយ បើធៀបនឹងឆមាសទី១ឆ្នាំ២០២២ ជាពិសេសទាក់ទងទៅនឹងតម្លៃនាំចេញគ្រាប់ស្វាយចន្ទីឆៅ។ បើតាមលោក អួន ស៊ីឡុត តម្លៃនាំចេញគ្រាប់ស្វាយចន្ទីឆៅ ហាក់កើនជាងឆ្នាំមុនតែបន្តិច ប៉ុណ្ណោះ បើធៀបនឹងរយៈពេលដូចគ្នានៅឆ្នាំមុន ពោលនៅឆមាសទី១ឆ្នាំ២០២២ តម្លៃនាំចេញគ្រាប់ស្វាយចន្ទីឆៅ អាចលក់បានក្នុងតម្លៃ ១ ៦០០ដុល្លារ ក្នុង១តោន ខណៈនៅឆមាសទី១ឆ្នាំ២០២៣ តម្លៃគ្រាប់ស្វាយចន្ទីឆៅអាចលក់បានតម្លៃ ១ ៦៥៨ដុល្លារ ក្នុង១តោន។
អត្ថបទគួរអាន
លោកអួន ស៊ីឡុតបន្ថែមថា បញ្ហាប្រឈមមួយចំនួនក្នុងស្វាយចន្ទី នៅមិនទាន់អាចដោះស្រាយបាននៅឡើយ ដូចជា ការថយចុះនៃបរិមាណដាំដុះដំណាំស្វាយចន្ទី ដែលត្រូវបានកសិករកាប់ចោលអស់ប្រមាណជាង ១០ម៉ឺនហិកតា នៅរយៈពេល ២ឆ្នាំចុងក្រោយនេះ ប៉ុន្តែក្នុងឆ្នាំ ២០២៣ កូនចន្ទីចំនួន៦លានកូនត្រូវបានដាំលើដីចម្ការចន្ទីចាស់ ដែលប៉ានប្រមាណថាមានរហូតដល់ជិត៤ម៉ឺនហិកតាត្រូវបានស្តារឡើងវិញ គួបផ្សំបញ្ហាផ្សេងៗ មួយចំនួនទៀត ជាពិសេសបញ្ហានៃការប្រមូលទិន្នន័យនាំចេញគ្រាប់ស្វាយចន្ទីរបស់កម្ពុជា រវាងសមាគមស្វាយចន្ទី ជាមួយស្ថាប័នពាក់ព័ន្ធ ដែលបញ្ហានេះអាចក្លាយជាឧបសគ្គក្នុងការទាក់ទាញអ្នកវិនិយោគ។
បើតាមប្រធានសមាគមស្វាយចន្ទីកម្ពុជា វៀតណាមជាប្រទេសនាំចេញគ្រាប់ស្វាយចន្ទី ដ៏ធំមួយ ហើយជាទូទៅវៀតណាម មានតម្រូវការគ្រាប់ស្វាយចន្ទីឆៅ ប្រមាណ ២លានតោន សម្រាប់កែច្នៃដើម្បីនាំចេញ។ យោងតាមរបាយការណ៍របស់សមាគមស្វាយចន្ទីកម្ពុជា នៅឆមាសទី១ ឆ្នាំ២០២៣ កម្ពុជា បាននាំចេញគ្រាប់ស្វាយចន្ទីឆៅសរុប ៦១ម៉ឺនតោន។ ក្នុងនោះ គ្រាប់ស្វាយចន្ទីឆៅភាគច្រើនបាននាំទៅប្រទេសវៀតណាម ក្នុងបរិមាណសរុប ៥៧ម៉ឺន៤ពាន់តោន ហើយក្រៅពីនោះ គ្រាប់ស្វាយចន្ទីឆៅមួយចំនួនបាននាំទៅកាន់ប្រទេសឥណ្ឌា៕
