ពលរដ្ឋរាប់ពាន់នាក់នៅតែប្រមូលផ្ដុំគ្នាដើរតាមដងផ្លូវក្នុងតំបន់សំខាន់ៗ និងទីក្រុងជាច្រើន ដោយពួកគេបានប្តេជ្ញា ចំពោះរដ្ឋប្រហារដោយក្រុមយោធា ជាមួយទឹកចិត្តដ៏មោះមុតមិនខ្លាចនឹងគ្រាប់កាំភ្លើងនោះទេ។ មានបាតុករម្នាក់បានប្រាប់សារព័ត៌មាន Reuters ថា ពួកគេមិនខ្លាចស្លាប់នោះទេ ព្រោះពួកគេត្រូវលះបង់ដើម្បីមនុស្សជំនាន់ក្រោយ។
គិតមកទល់ព្រឹកថ្ងៃចន្ទម្សិលមិញ ចំនួនអ្នកស្លាប់បានកើនដល់ទៅប្រមាណ ៤៦០នាក់ហើយ។
យើងទៅចាប់អារម្មណ៍ នៅថ្ងៃទី២៧ខែមីនាបន្តិច ដែលជាថ្ងៃមានការបង្ក្រាបបង្ហូរឈាមទ្រង់ទ្រាយធំមួយនៅភូមា តាំងពីមានការធ្វើរដ្ឋប្រហារនៅថ្ងៃទី១ ខែកុម្ភៈមក ដោយក្រុមយោធាបានបើកយុទ្ធនាការបង្ក្រាបបាតុករយ៉ាងសាហាវព្រៃផ្សៃបំផុត ដោយបានបញ្ជាឲ្យបាញ់សំដៅក្បាលបាតុករ ហើយក្នុងនោះ គេសង្កេតឃើញមាន កុមារបានស្លាប់បាត់បង់ជីវិតក្នុងហេតុការណ៍នោះផងដែរ។ មានពលរដ្ឋភូមារាប់រយនាក់ត្រូវបានរាយការណ៍ថាស្លាប់ ដោយក្នុងនោះនៅថ្ងៃទី២៧មីនាតែមួយថ្ងៃប៉ុណ្ណោះ មានមនុស្សជាង ១១៤នាក់បានស្លាប់។
ទីភ្នាក់ងារសារព័ត៌មាន Reuters បានចុះផ្សាយបន្ថែមថា កងកម្លាំងសន្ដិសុខភូមាបានបាញ់ប្រហារទៅលើរោងបុណ្យសពមួយកន្លែងកាលពីថ្ងៃអាទិត្យ ខណៈដែលពលរដ្ឋនៅទូទាំងប្រទេសជួបជុំគ្នាដើម្បីកាន់ទុក្ខសពជនរងគ្រោះទាំង ១១៤ នាក់នោះ។
អត្ថបទទាក់ទង
តើក្រោយពីមានការបង្ក្រាបយ៉ាងសាហាវយង់ឃ្នង ភូមាទទួលបានការថ្កោលទោសអ្វីខ្លះ ពីអន្តរជាតិ?
ជុំវិញការបង្ក្រាបដ៏ព្រៃផ្សៃដោយក្រុមយោធាទៅលើប្រជាពលរដ្ឋដែលជាអ្នកតវ៉ានេះដែរ ត្រូវបានក្រុមអ្នកសង្កេតការណ៍របស់អង្គការសហប្រជាជាតិបានចេញមុខថ្កោលទោសចំពោះក្រុមយោធាភូមាថា កំពុងធ្វើការសម្លាប់រង្គាលលើជាតិសាសន៍ខ្លួនឯង។
លើសពីនេះទៅទៀត ប្រធានាធិបតីអាមេរិក លោកចូ បៃឌិន បាននិយាយថ្កោលទោស ដោយបានថ្លែងប្រាប់អ្នកសារព័ត៌មានថា ការបង្ក្រាបរបស់យោធាភូមា ពិតជាអាក្រក់ណាស់។ វាពិតជាសាហាវយង់ឃ្នង ដោយផ្អែកលើរបាយការណ៍ដែលលោកចូ បៃឌិនបានទទួល។ លោកបៃឌិន បានលើកឡើងបែបនេះ ដោយបន្ថែមថា មនុស្សជាច្រើននាក់ ត្រូវបានសម្លាប់ទាំងដែលពួកគេមិនបានធ្វើអ្វីខុស។
ជាគ្នានេះដែរ សហភាពអឺរ៉ុប ដែលមានលោក Josep Borrell ជាប្រធានផ្នែកគោលនយោបាយការបរទេសសហភាពអឺរ៉ុប ក៏បានរិះគន់ករណីស្លាប់យ៉ាងច្រើន ជួនចំថ្ងៃទិវាកងទ័ពផងដែរ។ ថ្លែងក្នុងសេចក្តីថ្លែងការណ៍មួយ លោក Josep Borrell បានចាត់ទុកទង្វើរបស់យោធាភូមា គឺជារឿងមិនអាចទទួលយកបាន ព្រោះរបបសឹក បានបាញ់សម្លាប់ប្រជាជនខ្លួនជាច្រើននាក់ ដោយមិនអាណិតអាសូរ។ បើតាមលោកប្រធានគោលនយោបាយការបរទេសរូបនេះ នៅក្រោយការប្រារព្ធទិវាកងទ័ព ក្រុមយោធាបានធ្វើរឿងគួរឲ្យតក់ស្លុត និងគួរឲ្យអាម៉ាស់ជាទីបំផុត។
សូមរំឭកថា នៅថ្ងៃទី២៧មីនាកន្លងទៅនេះ ជាថ្ងៃទិវាខួបកងទ័ពរបស់ភូមា គ្រាដែលលោកឧត្តមសេនីយ Min Aung Hlaing មេដឹកនាំរបបយោធាភូមា បានថ្លែងនៅក្នុងពិធីដង្ហែរក្បួនកងទ័ពថា យោធាការពារប្រជាជន និងតស៊ូដើម្បីលទ្ធិប្រជាធិបតេយ្យ។
សូមបញ្ជាក់ផងដែរថា ក្រៅតែពីថ្នាក់ដឹកនាំធំៗ ក្រុមមេទ័ពកំពូលរបស់សហរដ្ឋអាមេរិក និងសមភាគីមកពីប្រទេសសម្ព័ន្ធមិត្តជាង ១០ប្រទេសទៀត បានចេញសេចក្ដីថ្លែងការណ៍ដ៏កម្រមួយ ថ្កោលទោសការប្រើប្រាស់កម្លាំងដ៏ហិង្សាពីសំណាក់យោធាភូមាដែលបានផ្ដាច់ជីវិតប្រជាជនស៊ីវិលជាច្រើនរយនាក់។ ទោះមានការថ្កោលទោសសន្ធឹកសន្ធាប់យ៉ាងណាក៏វាមិនអាចជួយការពារពលរដ្ឋភូមាពីការកាប់សម្លាប់បានដែរ៕
None
