ការពន្យារពេលលើកកិច្ចចរចាពាណិជ្ជកម្មរវាងភាគីទាំងពីរនេះ គឺធ្វើឡើងក្រោយបារាំង ដែលជាសមាជិករបស់សហភាពអឺរ៉ុប មានការខឹងសម្បារយ៉ាងខ្លាំងទៅលើក្រុងកង់បេរ៉ា ដែលបានសម្រេចលុបចោលកុងត្រានាវាមុជទឹកជាមួយបារាំងតម្លៃដល់ទៅ ៤០ពាន់លានដុល្លារអាមេរិក ហើយអូស្ត្រាលី បែរជាទៅទិញនាវាមុជទឹកថ្មីពីប្រទេសសម្ព័ន្ធមិត្ត AUKUSរបស់ខ្លួនទៅវិញ។
លោក ដាន តេហាន (Dan Tehan) រដ្ឋមន្ត្រីក្រសួងពាណិជ្ជកម្មអូស្ត្រាលីបាននិយាយថា កិច្ចពិភាក្សារវាងអូស្ត្រាលីជាមួយនឹងអឺរ៉ុបលើកទី១២ ស្ដីពីកិច្ចព្រមព្រៀងពាណិជ្ជកម្មសេរី គឺត្រូវបានពន្យារពេលទៀតហើយ ដែលនេះគឺជាការពន្យារពេលលើកទី២ហើយនៅក្នុងខែតុលានេះ។ បន្ទាប់ពីនេះទៅ គេត្រូវរង់ចាំដល់ខែកុម្ភៈឆ្នាំ២០២២ ទើបនឹងដល់ថ្ងៃត្រូវបើកកិច្ចពិភាក្សាជាថ្មីម្ដងទៀត។
យ៉ាងណាក៏ដោយចុះ គណៈកម្មការអឺរ៉ុបដែលត្រួតពិនិត្យគោលនយោបាយពាណិជ្ជកម្មសម្រាប់សហភាពអឺរ៉ុបទាំង២៧ប្រទេស បាននិយាយថា ខ្លួនមិនបានកំណត់ពេលចាប់ផ្ដើមចរចាពាណិជ្ជកម្មឡើងវិញនៅក្នុងខែវិច្ឆិកានោះទេ ដោយគ្មានកាលបរិច្ឆេទថ្មីកំណត់សម្រាប់កិច្ចពិភាក្សាលើកទី១២នៃការចរចាកិច្ចព្រមព្រៀងពាណិជ្ជកម្មសេរីអឺរ៉ុប-អូស្ត្រាលីនេះដែរ។
អត្ថបទគួរអាន
គេនៅចាំបានថា ប្រទេសអូស្ត្រាលី កាលពីខែកញ្ញា បានលុបចោលកិច្ចព្រមព្រៀងជាមួយបារាំង ដើម្បីបង្កើតកងនាវាមុជទឹក ហើយបែរទៅជាបង្កើតនាវាមុជទឹកដើរដោយថាមពលនុយក្លេអ៊ែយ៉ាងតិច៨គ្រឿងដោយប្រើបច្ចេកវិទ្យារបស់អាមេរិក និងអង់គ្លេសទៅវិញ ក្រោយពីប្រទេសទាំង៣នេះ គឺអូស្ត្រាលី អាមេរិក និងអង់គ្លេស បានចុះកិច្ចព្រមព្រៀងភាពជាដៃគូសន្ដិសុខត្រីភាគីមួយ ដែលហៅកាត់ថា AUKUS។
ក្រោយអូស្ត្រាលីលុបចោលកិច្ចព្រមព្រៀងនាវាមុជទឹកជាមួយបារាំង ក៏បានធ្វើឲ្យបារាំងក្ដៅស្លឹកត្រចៀកមិនតិចនោះទេ ចំពោះទង្វើរបស់អូស្ត្រាលី និងអាមេរិក ដោយបារាំងចាត់ទុកថា ខ្លួនដូចត្រូវគេយកកាំបិតមកចាក់ចំពីក្រោយខ្នងអញ្ចឹងដែរ ហើយក្រុងបារីស ក៏បានហៅឯកអគ្គរដ្ឋទូតរបស់ខ្លួនប្រចាំនៅក្រុងកង់បេរ៉ា និងវ៉ាស៊ិនតោនឲ្យត្រឡប់ចូលប្រទេសវិញភ្លាមៗផងដែរ។
សូមបញ្ជាក់ថា ប្រទេសអូស្ត្រាលីធ្លាប់រំពឹងទុកថា នឹងបញ្ចប់ការចរចាកិច្ចព្រមព្រៀងពាណិជ្ជកម្មសេរីជាមួយនឹងអឺរ៉ុបនៅចុងឆ្នាំ២០២២ខាងមុខនេះ។ ប៉ុន្ដែ គេមិនទាន់ដឹងច្បាស់នៅឡើយទេថា តើកិច្ចចរចានេះ អាចនឹងបន្ដទៅទៀតបាន ឬមិនបានទេ ដោយសារតែអឺរ៉ុបបានពន្យារពេលចរចា២លើកហើយក្នុងខែតុលានេះ។
កន្លងមក អូស្ត្រាលីក៏បានស្វែងរកការកែសម្រួលទំនាក់ទំនងជាមួយអឺរ៉ុប និងបារាំងខ្លាំងណាស់ដែរនៅប៉ុន្មានសប្ដាហ៍ថ្មីៗនេះ ដោយបានតែងតាំងជំនួយការជាន់ខ្ពស់របស់នាយករដ្ឋមន្ត្រី លោក ស្កុត ម៉ារីសុនឲ្យធ្វើដំណើរបេសកកម្មទៅកាន់អឺរ៉ុបផងដែរ។
យ៉ាងណាមិញ ឯកអគ្គរដ្ឋទូតបារាំងប្រចាំនៅអូស្ត្រាលី ក៏បានត្រឡប់ទៅកាន់ក្រុងកង់បេរាំវិញហើយដែរ នៅក្នុងសប្ដាហ៍នេះ។ ជាមួយគ្នានេះ ឯកអគ្គរដ្ឋទូតរូបបារាំង នឹងធ្វើការវាយតម្លៃអំពីការប្តេជ្ញាចិត្តរបស់អូស្ត្រាលី ជុំវិញការប៉ះប៉ូវនូវទំនាក់ទំនងជាមួយនឹងបារាំង៕
None
