កាលពីខែកញ្ញា ប្រធានគណៈកម្មការអឺរ៉ុបលោកស្រី Ursula von der Leyen បានស្នើឱ្យផ្តល់
ឋានៈជាសមាជិកពិសេសដល់ប្រទេសកាណាដា ដែលនឹងក្លាយជាករណីដំបូងសម្រាប់សហភាពអឺរ៉ុប។ ប៉ុន្តែរដ្ឋាភិបាលនៃប្រទេសជាច្រើនបានជំទាស់ ដោយលើកឡើងថា សន្ធិសញ្ញាសហភាពអឺរ៉ុប មិនបានចែងអំពីឋានៈបែបនេះទេ ហើយថា សំណើនេះ ក៏ខ្វះភាពច្បាស់លាស់ និងការពិគ្រោះយោបល់គ្រប់គ្រាន់ផងដែរ។
មុនកិច្ចប្រជុំកំពូលសហភាពអឺរ៉ុប-កាណាដារយៈពេលពីរថ្ងៃនៅទីក្រុងម៉ុងរ៉េអាល់ បណ្ដាប្រទេសជាសមាជិកបានសម្រេចដកពាក្យសមាជិកពិសេស ចេញពីសេចក្តីព្រាងនៃសេចក្តីប្រកាសដោយជំនួសមកវិញនូវការប្តេជ្ញាពង្រឹងទំនាក់ទំនងឱ្យកាន់តែជិតស្និទ្ធ ដោយមិនផ្តល់ឋានៈជាសមាជិកភាពនោះទេ។
នាយករដ្ឋមន្ត្រីកាណាដាលោក Mark Carney បាននិយាយសម្រាលភាពខុសគ្នាលើពាក្យពេចន៍នេះ ដោយលើកឡើងថា អ្វីដែលសំខាន់គឺអត្ថប្រយោជន៍ជាក់ស្តែងដែលកិច្ចសហប្រតិបត្តិការនឹងផ្តល់ជូនប្រជាជនកាណាដា។
ក្រោមផែនការថ្មីភាគីទាំងពីរមានបំណងកាត់បន្ថយរបាំងពាណិជ្ជកម្ម ជំរុញការវិនិយោគ និងធានាការផ្គត់ផ្គង់វត្ថុធាតុដើមសំខាន់ៗ ឱសថ និងបច្ចេកវិទ្យាក្នុងពេលមានវិបត្តិ។ កិច្ចសហប្រតិបត្តិការ ក៏នឹង
ផ្តោតលើថាមពល ការប្រែប្រួលអាកាសធាតុ បញ្ញាសិប្បនិម្មិត សន្តិសុខ និងការអប់រំផងដែរ។
ការខិតខំពង្រឹងទំនាក់ទំនងនេះកើតឡើង ខណៈកាណាដា និងអឺរ៉ុបកំពុងប្រឈមភាពតានតឹងផ្នែកពាណិជ្ជកម្ម និងការព្រួយបារម្ភអំពីគោលនយោបាយរបស់ប្រធានាធិបតីអាម៉េរិកលោក ដូណាល់ ត្រាំ។ សូមបញ្ជាក់ថា លោក ត្រាំ ធ្លាប់ច្រានចោលគំនិតផ្តល់ឋានៈពិសេសនេះ និងព្រមានអំពីវិធានការពាណិជ្ជកម្ម ប្រសិនបើវាប៉ះពាល់ដល់ផលប្រយោជន៍អាម៉េរិក៕
