ទីភ្នាក់ងារព័ត៌មាន អេភី បានរាយការណ៍ថា សភាពការណ៍សន្តិសុខនៅតំបន់ឥណ្ឌូប៉ាស៊ីហ្វិក កំពុងឡើងកម្ដៅខ្លាំង ក្រោយរដ្ឋមន្ត្រីការពារជាតិជប៉ុន បានប្រកាសថា អាម៉េរិក និងជប៉ុន បានព្រមព្រៀងបង្កើតខ្សែច្រវាក់ផលិតកម្មរួមគ្នានៅលើទឹកដីជប៉ុន ដើម្បីផលិតមីស៊ីលប្រយុទ្ធដែលមានសមត្ថភាពខ្ពស់ និងមានរយៈចម្ងាយមធ្យម។ កិច្ចព្រមព្រៀងយោធាដ៏ធំនេះ គឺជាការឆ្លើយតបចំពោះសកម្មភាពដ៏គឃ្លើន និងការបង្កើនអំណាចយោធាយ៉ាងគំហុករបស់ប្រទេសចិន នៅក្នុងដែនសមុទ្រអាស៊ី។
រដ្ឋមន្ត្រីការពារជាតិ ជប៉ុន លោក ស៊ីនជីរ៉ូ កូអ៊ីហ្ស៊ូមី (Shinjiro Koizumi) បានថ្លែងក្នុងសន្និសីទសារព័ត៌មាននៅប្រទេសហ្វីលីពីន ក្រោយជំនួបកំពូលជាមួយសមភាគីអាម៉េរិកថា គ្រាប់មីស៊ីលដែលត្រូវផលិតឡើងក្រោមគម្រោងរួមគ្នានេះ គឺជាអាវុធយុទ្ធសាស្ត្រដ៏សំខាន់មួយសម្រាប់បំពាក់លើពពួកយន្តហោះចម្បាំងល្បឿនលឿន F-35 ដែលជាបច្ចេកវិទ្យាយោធាទំនើបបំផុតរបស់អាម៉េរិក និងកំពុងប្រតិបត្តិការដោយកងទ័ពជប៉ុន។
ជាមួយគ្នានេះ រដ្ឋមន្ត្រីការពារជាតិអូស្ត្រាលី លោក រីឆាត ម៉ឡេស (Richard Marles) បានលើកឡើងថា ការពង្រីកសមត្ថភាពយោធារបស់ចិន កំពុងបង្កើតជាសម្ពាធសន្តិសុខយ៉ាងធ្ងន់ធ្ងរមកលើតំបន់ទាំងមូល។ លោកបានសង្កត់ធ្ងន់ថា អូស្ត្រាលី និងសម្ពន្ធមិត្ត រួមទាំងសហរដ្ឋអាម៉េរិកនឹងរួមដៃគ្នា ដើម្បីការពារនីតិរដ្ឋ និងច្បាប់សមុទ្រអន្តរជាតិ ទោះបីជាទីក្រុងប៉េកាំង ខិតខំពង្រីកឥទ្ធិពល និងអំណាចរបស់ខ្លួនយ៉ាងណាក៏ដោយ។
យោងតាមការចុះផ្សាយរបស់ទីភ្នាក់ងារព័ត៌មាន AFP បច្ចុប្បន្នទីក្រុងប៉េកាំង បានដាក់ពង្រាយកងឆ្មាំសមុទ្ររាប់រយនាក់ អមដោយនាវាចម្បាំង និងនាវាប្រយុទ្ធជាច្រើនគ្រឿងឱ្យល្បាតនៅក្នុងតំបន់ជម្លោះ នៃសមុទ្រចិនខាងត្បូង ដែលជាដែនទឹក ដែលចិន បានប្រកាសទាមទារកម្មសិទ្ធិស្ទើរតែទាំងស្រុង ដើម្បីគ្រប់គ្រងច្រកពាណិជ្ជកម្ម និងដែនសមុទ្រយុទ្ធសាស្ត្រមួយនេះ៕
