អ្នកជំនាញ៖«ភ្នាក់ងារទេសចរណ៍ជាង៩០% រងផលប៉ះពាល់ពីកូវីដ-១៩ពេញមួយឆ្នាំ២០២០»

អ្នកជំនាញក្នុងវិស័យទេសចរណ៍រូបនេះ បានគូសបញ្ជាក់បន្ថែមថា ក្រុមហ៊ុនដែលបន្តសេវាកម្មសម្រាប់ភ្ញៀវទេសចរណ៍ក្នុងស្រុកទាំងនោះ ក៏មិនអាចរកចំណូលបានច្រើននោះដែរ ដោយសារតែពលរដ្ឋខ្មែរមិនពេញនិយមក្នុងការរៀបចំដំណើរកម្សាន្ដក្នុងស្រុក ដោយហេតុថា ពួកគាត់អាចមានលទ្ធភាពធ្វើដំណើរកម្សាន្ដបានដោយខ្លួនឯង។

លោកស្រីឆាយ សៀវលី គូសបញ្ជាក់ទៀតថា តាមសង្កេត សកម្មភាពទេសចរក្នុងស្រុកនៅមួយរយៈកាលចុងក្រោយ ជាពិសេសនៅមុន និងក្រោយពេល មានការឆ្លងរាលដាលកូវីដ១៩ក្នុងស្រុក ពោលគឺព្រឹត្តិការណ៍ ៣ វិច្ឆិកា និង ២៨វិចិ្ឆកា សកម្មភាពទេសចរណ៍ក្នុងស្រុកមានសភាពឡើងចុះមិនទៀងទាត់។ ប៉ុន្តែ ចាប់ពីពាក់កណ្តាលខែធ្នូ ឆ្នាំ២០២០ មកដល់បច្ចុប្បន្នលោកស្រីកត់សម្គាល់ថា សកម្មភាពទេសចរណ៍ក្នុងស្រុកបានងើបឡើងវិញបណ្តើរៗហើយ។

បើតាមស្ថិតិរបស់ក្រសួងទេសចរណ៍ នៅ១១ខែឆ្នាំ២០២០ ភ្ញៀវទេសចរអន្តរជាតិធ្វើដំណើរកម្សាន្ដមកកម្ពុជាមានចំនួនជាង ១លាន២សែន ធ្លាក់ចុះជាង ៧៨% ធៀបរយៈពេលដូចគ្នាក្នុងឆ្នាំ២០១៩៕