អ្នកជំនាញរំពឹងវិស័យឧស្សាហកម្មនៅកម្ពុជានឹងកាន់តែប្រសើរ ក្រោយសភាពាណិជ្ជកម្ម និងឧស្សាហកម្មជប៉ុន ចង់ពង្រីកការវិនិយោគលើវិស័យវាយនភណ្ឌ

អ្នកជំនាញជឿជាក់ថា វិស័យឧស្សាហកម្មកម្ពុជានឹងកាន់តែមានភាពរីកចម្រើន ប្រសិនបើជប៉ុនពិតជាពង្រីកការវិនិយោគក្នុងវិស័យវាយនភណ្ឌនៅកម្ពុជាដូចការលើកឡើងនៅក្នុងជំនួបពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាកាលពីកន្លងទៅថ្មីៗមែននោះ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ចាត់ទុកការបង្ហាញបំណងចង់ពង្រីកការវិនិយោគក្នុងវិស័យវាយនភណ្ឌរបស់សភាពាណិជ្ជកម្ម និងឧស្សាហកម្មជប៉ុន កាលពីពេលថ្មីៗ គឺជាក្តីសង្ឃឹមថ្មីមួយបន្ថែមទៀតសម្រាប់វិស័យឧស្សាហកម្មកម្ពុជា។

សម្រាប់អ្នកជំនាញរូបនេះ បើប្រសិនបើ ជប៉ុនពិតជាពង្រិកការវិនិយោគក្នុងវិស័យនេះមែន នោះវាមិនត្រឹមតែជួយលើកកម្ពស់វិស័យឧស្សាហកម្មកម្ពុជាប៉ុណ្ណោះទេ ថែមទាំងជួយស្តារវិស័យឧស្សាហកម្មកាត់ដេរ ដែលបាននិងកំពុងរងនូវផលប៉ះពាល់ដោយសារវិបត្តិសកលផងដែរ។

តាមរយៈកំណើនគម្រោងវិនិយោគថ្មីៗ ស្របពេលកម្ពុជាកំពុងអនុវត្តច្បាប់វិនិយោគថ្មី កិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី ជាពិសេសការខិតខំប្រឹងប្រែងរបស់ថ្នាក់ដឹកនាំកម្ពុជា ក្នុងការដើរកៀគរវិនិយោគិនពីខាងក្រៅប្រទេសឲ្យមកបណ្ដាក់ទុនវិនិយោគនៅក្នុងប្រទេសកម្ពុជា អ្នកឧកញ៉ា លឹម ហេង ជឿជាក់ថា វិស័យឧស្សាហកម្មកម្ពុជានឹងកាន់តែមានភាពរីកចម្រើននៅក្នុងឆ្នាំ២០២៤ បន្ថែមទៀត។

​គួររំលឹកថា នៅក្នុងជំនួបសម្តែងការគួរសមជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាកាលពីពេលថ្មីំៗ សភាពាណិជ្ជកម្ម និងឧស្សាហកម្មជប៉ុន ដែលមានសមាជិកជាង១លាននាក់ បានបង្ហាញបំណងចង់ពង្រីកការវិនិយោគបន្ថែមទៀតនៅកម្ពុជា លើវិស័យវាយនភណ្ឌនៅកម្ពុជា។

បច្ចុប្បន្ន សភាពាណិជ្ជកម្ម និងឧស្សាហកម្មជប៉ុន មានការិយាល័យចំនួន៥១៥ និងមានសមាជិកសរុបជាង ១លាន២សែននាក់ ដែលផ្តោតសំខាន់លើវិស័យវាយនភណ្ឌ គ្រឿងម៉ាស៊ីន និងលោហៈធាតុ ថាមពល សារធាតុគីមីអាហារ លំនៅឋាន បច្ចេកវិទ្យាព័ត៌មាន និងហិរញ្ញវត្ថុ។

សូមបញ្ជាក់ថា នៅពេញមួយឆ្នាំ២០២៣ កម្ពុជាអនុម័តគម្រោងវិនិយោគសរុបចំនួន២៦៨ជាមួយទុនវិនិយោគសរុបជិត៥ពាន់លានដុល្លារអាមេរិក និងអាចបង្កើតការងារបានជាង៣០ម៉ឺនកន្លែង។ ក្នុងនោះ ចំនួនគម្រោងវិនិយោគ ក្នុងវិស័យឧស្សាហកម្មបានចូលរួមចំណែកដល់ទៅប្រមាណ៩២% នៃចំនួនគម្រោងវិនិយោគសរុប ខណៈទុនវិនិយោគប្រមាណ៤៦% បានមកពីវិស័យនេះ។

ដោយឡែក វិស័យហេដ្ឋារចនាសម្ព័ន្ធនិងផ្សេងៗ ដែលមានតែប្រមាណ២,៦% នៃចំនួនគម្រោងវិនិយោគសរុបបានចូលរួមចំណែកដល់ទៅប្រមាណ៤៤% នៃទុនវិនិយោគសរុប ដោយសារចរិតនៃការវិនិយោគក្នុងវិស័យនេះ ត្រូវការទុនវិនិយោគច្រើន។ ជារួម រំហូរទុនវិនិយោគឯកជននៅឆ្នាំ២០២៣ មានការកើនឡើងគួរឲ្យកត់សម្គាល់ ក្នុងរង្វង់ប្រមាណ២២% ធៀបនឹងឆ្នាំ២០២២។ ដោយឡែក រំហូរទុនវិនិយោគក្នុងឆ្នាំ២០២៣ ភាគច្រើនមានប្រភពមកពីប្រទេសចិន និងក្នុងស្រុក ដោយបានរួមចំណែកជិត ៩០% នៃទុនវិនិយោគសរុប៕