ឆ្លើយតបទៅនឹងស្ថានភាពនេះ លោក អោម សេងបូរ៉ា ស្ថាបនិកស៊ីអ៊ីអូ ម៉ាស្ទឺរក្លឹប និងជាគ្រូបង្វឹកម្ចាស់អាជីវកម្មកំពូលនៅកម្ពុជា បានធ្វើការចែករំលែកនូវយុទ្ធសាស្ត្រចំនួន៥ចំណុច ឬហៅថាយុទ្ធសាស្ត្រ “ប៥” សម្រាប់ម្ចាស់អាជីវកម្មទាំងឡាយ ធ្វើការពិចារណា និងយកទៅប្រើប្រាស់ក្នុងការប្រកបរបររកស៊ីរបស់ខ្លួនដូចខាងក្រោម៖
បទី១. ជាយុទ្ធសាស្ត្រ “បន្ត”។ បើតាមលោក អោម សេងបូរ៉ា សម្រាប់ម្ចាស់អាជីវកម្មណា ដែលមានសុខភាពហិរញ្ញវត្ថុនៅល្អ នៅមានប្រាក់ចំណូល ទោះបីជាមានវិបត្តិកូវីដ-១៩នេះក៏ដោយ គួរនៅតែបន្តអាជីវកម្ម ដើម្បីចូលរួមចំណែកក្នុងសេដ្ឋកិច្ចជាតិ និងផ្ដល់ការងារដល់ពលរដ្ឋ ផ្ដល់ប្រាក់ចំណូលសម្រាប់ពួកគេផ្គត់ផ្គង់គ្រួសារ។
បទី២៖ ជាយុទ្ធសាស្ត្រ “បង្រួម”។ ប្រសិនបើអាជីកម្មមានការប៉ះពាល់ ប្រាក់ចំណូលធ្លាក់ចុះ ដោយសារតែបាត់បង់អតិថិជន។ ម្ចាស់អាជីកម្ម គួរបង្រួមអាជីវកម្ម គឺបង្រួមពីសាខាច្រើន មកសាខាតិច។ បង្រួមពីផលិតផលច្រើន មកផលិតផលតិច និងពីបុគ្គលិកច្រើនមកបុគ្គលិកតិច ដើម្បីកាត់បន្ថយចំណាយ។ លោកបន្តថា ប្រសិនបើចំណូលរួមតូច ចាំបាច់ការចំណាយត្រូវបង្រួមឱ្យតូចដូចគ្នា ទើបអាចបន្តជីវិតអាជីវកម្មបាន។
អត្ថបទទាក់ទង!
បទី៣៖ យុទ្ធសាស្ត្រ “បំប្លែង”។ យុទ្ធសាស្ត្រនេះ គឺម្ចាស់អាជីវកម្មអាចយកធនធានចាស់ ដូចជាទីតាំងចាស់ បុគ្គលិកចាស់ ឬសម្ភារចាស់ បំប្លែងទៅធ្វើជាអាជីកម្មថ្មីមួយទៀត ដែលអាចរកប្រាក់ចំណូលបាននៅក្នុងសម័យកាលកូវីដ-១៩នេះ។ ម្ចាស់អាជីវកម្ម ក៏ត្រូវបំប្លែងទាំងមធ្យោបាយលក់ផងដែរ ដើម្បីឱ្យស្របតាមកាលៈទេសៈ គឺពីរបៀបប្រពៃណី ឬលក់នៅហាងផ្ទាល់ មកជាការលក់តាមអនឡាញ ឬបែបឌីជីថលវិញ ព្រោះអតិថិជនភាគច្រើននៅផ្ទះ។
បទី៤៖ យុទ្ធសាស្ត្រ “បិទអាជីវកម្ម”។ ស្ថាបនិក CEO Master Club បន្តពន្យល់ថា នៅពេលដែលស្ថានភាពហិរញ្ញវត្ថុមិនល្អ ចំណូលធ្លាក់ចុះ ឬបាត់បង់ចំណូលទាំងស្រុង ខណៈហិរញ្ញវត្ថុរបស់ម្ចាស់អាជីវកម្មមិនអាចបន្តទៅមុខបាន គួរសម្រេចចិត្តបិទអាជីវកម្មតែម្ដង។ ការធ្វើបែបនេះ ដើម្បីជៀសជាងបញ្ហាកាន់តែធំទៅៗ។
លោកបញ្ជាក់ថា ម្ចាស់អាជីវកម្មខ្លះមិនហ៊ានបិទទ្វារ ព្រោះខ្លាចខ្មាសគេ ហើយសុខចិត្តខ្ចីបុលលុយគេមកបន្តអាជីវកម្ម ធ្វើឱ្យមានបំណុលកាន់តែវ័ណ្ដក។ ប៉ុន្តែបើម្ចាស់អាជីវកម្មសម្រេចចិត្តទាន់ពេល នឹងមិនជូបការលំបាកខ្លាំង។ ច្បាស់ណាស់ គឺប៉ះពាល់ដល់បុគ្គលិកដោយសារបាត់បង់ការងារ ប៉ុន្តែជាកាលៈទេសៈបង្ខំ ដែលម្ចាស់អាជីវកម្មត្រូវធ្វើការពន្យល់ដល់ពួកគេពីមូលហេតុនេះដោយត្រង់ៗ។
បទី៥៖ ជាយុទ្ធសាស្ត្រ “បើកថ្មី”។ សម្រាប់ម្ចាស់អាជីវកម្មខ្លះ ដែលមើលឃើញឳកាសថ្មីៗក្នុងវិបត្តិជំងឺកូវីដ-១៩នេះ ដែលអំណោយផលដល់ម្ចាស់អាជីវកម្មទាំងនោះ ជាក់ស្ដែង ដូចជាវិស័យចំណីអាហារ និងវិស័យផ្សេងៗមួយចំនួនទៀតមានការកើនឡើង។ លោកសង្កេតឃើញថា ម្ចាស់អាជីវកម្មមួយចំនួនបានប្រើធនធានចាស់ បង្កើតអាជីវកម្មថ្មីៗនោះ។
ទោះបីជាយ៉ាងណា គ្រូបង្វឹកម្ចាស់អាជីវកម្មកំពូលលោក អោម សេងបូរ៉ា បានអំពាវនាវដល់ម្ចាស់អាជីវកម្មកុំមានការខ្មាសអៀនក្នុងបិទទ្វារអាជីវកម្មចាស់ ដើម្បីបើកអាជីវកម្មថ្មីមួយទៀត។ ពោលគឺត្រូវមានភាពបត់បែនតាមសភាពការណ៍ ហើយម្ចាស់អាជីវកម្មត្រូវមានភាពវ័យឆ្លាតមើលស្ថានភាពជាឳកាស និងហានិភ័យចំពោះអាជីវកម្ម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
