តើសុខភាពរបស់វិស័យអចលនវត្ថុ មានស្ថានភាពបែបណានាពេលបច្ចុប្បន្ន?

ឧកញ៉ា ចេង ខេង អគ្គនាយកក្រុមហ៊ុនអចនទ្រព្យ CPL កត់សម្គាល់ឃើញថា បញ្ហាជាសកលបានធ្វើឱ្យវិស័យអចលនវត្ថុរបស់កម្ពុជាមានការរាំងស្ទះ និងមានការកាត់បន្ថយសកម្មភាពទិញលក់។ទោះបីសកម្មភាពទិញលក់ក្នុងវិស័យនេះ មានភាពរអាក់រអួលខ្លះក៏ដោយ ប៉ុន្តែអ្នកជំនាញចាស់វស្សារូបនេះសង្កេតឃើញថា វិស័យអចលនវត្ថុនៅតែមានតម្រូវការពីអតិថិជនជាហូរហែ។ បើតាមអ្នកជំនាញរូបនេះ នៅក្នុងស្ថានភាពបច្ចុប្បន្ន វិស័យអចលនវត្ថុនៅតែអាចលក់ដូរបានជាធម្មតា ប៉ុន្តែស្ថិតក្នុងលក្ខខណ្ឌ ដូចជាមានទីតាំងល្អ ករណីលក់បន្ទាន់ និងតម្លៃនៅក្រោមទីផ្សារជាដើម។ ស្ថិតក្នុងស្ថានភាពនេះ ឧកញ៉ា ចេង ខេង អះអាងថា ជាពេលវេលាល្អសម្រាប់អ្នកដែលមានថវិកា ប៉ុន្តែការទិញអចលនវត្ថុគួរស្វែងរកអ្នកជំនាញដែលមានវិជ្ជាជីវៈច្បាស់លាស់ ដើម្បីជៀសវាងមានបញ្ហានាពេលខាងមុខ។

​សូមបញ្ជាក់ថា ពាក់ព័ន្ធនឹងវិស័យអចលនវត្ថុនេះដែរនាពេលកន្លងទៅនេះ និយ័តករអាជីវកម្មអចលនវត្ថុនិងបញ្ចាំបានប្រជុំពិគ្រោះយោបល់ស្តីពី“ការរៀបចំផែនការយុទ្ធសាស្ត្រអភិវឌ្ឍន៍វិស័យអចលនវត្ថុ ២០២១-២០៣០” ។ កិច្ចប្រជុំពិគ្រោះយោបល់នេះ ធ្វើឡើងដើម្បីប្រមូលធាតុចូលពីក្រសួង-ស្ថាប័ន និងវិស័យឯកជនពាក់ព័ន្ធ ក្នុងការរៀបចំផែនការយុទ្ធសាស្ត្រអភិវឌ្ឍន៍វិស័យអចលនវត្ថុ ២០២១-២០៣០ ឱ្យមានភាពគ្រប់ជ្រុងជ្រោយ នឹងអាចអនុវត្តបានប្រកបដោយប្រសិទ្ធភាព៕

អត្ថបទ៖ បូ ដូឡា​