នៅចំពោះមុខការឆ្លងរាលដាលក្នុងចំនួនដ៏ច្រើននិងលឿនរហ័សបែបនេះ អ្នកជំនាញសុខាភិបាលឥណ្ឌាបាននិយាយថា ក្តីរំពឹងដែលសំខាន់បំផុតក្នុងពេលនេះ ដែលឥណ្ឌាអាចធ្វើបាន គឺការសម្រុកចាក់វ៉ាក់សាំងដល់ប្រជាជនដ៏ច្រើនលើសលុបរបស់ខ្លួន។
ភ្លាមៗក្នុងថ្ងៃពុធសប្តាហ៏នេះ រដ្ឋាភិបាលឥណ្ឌាបានចេញ មកប្រកាសបើកដំណើរការ ការចុះឈ្មោះតាមប្រព័ន្ធអនឡាញ ដើម្បីចាក់វ៉ាក់សាំងបង្ការកូវីដ-១៩សម្រាប់ពលរដ្ឋមានអាយុលើស១៨ឆ្នាំ ហើយនឹងចាប់ផ្តើមចាក់ នៅថ្ងៃសៅរ៍សប្តាហ៍នេះតែម្តង។
បើតាមការប៉ានស្មានមនុស្សប្រមាណ ៦០០លាននាក់ត្រូវទទួលបានការចាក់វ៉ាក់សាំងក្នុងយុទ្ធនាការលើកនេះ។ ប៉ុន្តែឥណ្ឌាដែលធ្លាប់ជាប្រទេសផលិតវ៉ាក់សាំងធំជាងគេមួយក្នុងពិភពលោក ត្រូវបានគេសង្កេតឃើញថា មិនទាន់មានស្តុកវ៉ាក់សាំងគ្រប់គ្រាន់នៅឡើយទេ។
អត្ថបទទាក់ទង
លើសពីនេះ ការចុះឈ្មោះចាក់វ៉ាក់សាំងហាក់ប្រព្រឹត្តទៅទាំងយ៉ាប់យ៉ឺន ដោយសារតែគេហទំព័រដែលបម្រើឲ្យការចុះឈ្មោះ ត្រូវបានគេចុចចូលរាប់លានដងក្នុងមួយថ្ងៃៗ ដែលជាហេតុធ្វើឲ្យគេហទំព័រជាប់គាំងជារឿយៗមិនអាចចុះឈ្មោះបានឡើយ។ នេះបើតាម Reuters ដដែល។
តើមកទល់ពេលនេះ ឥណ្ឌាទទួលបានជំនួយថ្មីៗអ្វីខ្លះ ពីបណ្ដាប្រទេសជាសម្ព័ន្ធមិត្ត?
ជុំវិញបញ្ហានេះដែរ សហរដ្ឋអាមេរិកបានឲ្យដឹងកាលពីពេលថ្មីនេះថា ខ្លួននឹងបញ្ជូនវ៉ាក់សាំង AstraZeneca ដែលខ្លួនស្តុកទុកប្រមាណ ២០លានដូសទៅឲ្យឥណ្ឌា រួមជាមួយនឹងបរិក្ខារពេទ្យជាច្រើនទៀតសម្រាប់ប្រយុទ្ធប្រឆាំងនឹងកូវីដ១៩ ដូចជា បំពង់អុកស៊ីហ្សែន ម៉ាសមុខ និងឧបរកណ៍ធ្វើតេស្តល្បឿនលឿនផងដែរ។ ជំនួយរបស់អាមេរិកទាំងអស់នេះ គិតជាទឹកប្រាក់មានជាង ១០០លានដុល្លារអាមេរិក។
ជាមួយគ្នានេះ ចក្រភពអង់គ្លេស ក៏បានប្រកាសដែរថា ពេលនេះខ្លួនមានលទ្ធភាពជួយឥណ្ឌាបានត្រឹមតែឧបករណ៍ជំនួយដង្ហើម និងម៉ាស៊ីនផលិតអុកស៊ីហ្សែនប៉ុណ្ណោះ អង់គ្លេសមិនមានសល់វ៉ាក់សាំងសម្រាប់ផ្តល់ឲ្យឥណ្ឌាឡើយ។
គួរជម្រាបជូនថា ស្ថានភាពកូវីដនៅឥណ្ឌាបានធ្លាក់ចូលក្នុងសញ្ញាអាសន្នហើយ ដោយអាជ្ញាធររដ្ឋធានីញូដេលីបានឲ្យ Reuters ដឹងថា ប្រជាជនក្នុងរដ្ឋធានីធំជាងគេរបស់ឥណ្ឌាមួយនេះ បានធ្លាក់ខ្លួនឈឺកាន់តែធ្ងន់ធ្ងរទៅៗ ហើយឈឺក្នុងរយៈពេលយូរ ដោយពិបាកនឹងព្យាបាលឲ្យជាសះស្បើយខ្លាំងណាស់ ដែលប្រការនេះ បាននិងកំពុងដាក់សម្ពាធថ្មីមួយទៀតដល់ប្រព័ន្ធសុខាភិបាលឥណ្ឌា។
លោក អាវីន គេចជ្រីវ៉ាល់ (Arvind Kejriwal) មន្ត្រីជាន់ខ្ពស់ប្រចាំនៅរដ្ឋធានីញូដេលីបាននិយាយថា៖«រលកឆ្លងលើកនេះ ពិតជាសាហាវខ្លាំងណាស់ វាឆ្លងលឿនរហ័សខ្លាំង ហើយអ្នកដែលឆ្លងកូវីដ-១៩ប្រភេទថ្មីនេះហើយ ពិបាកក្នុងការព្យាបាលឲ្យជាសះស្បើយក្នុងពេលខ្លីណាស់។»
សូមបញ្ជាក់ថា គ្រាន់តែនៅក្នុងថ្ងៃព្រហស្បតិ៍សប្តាហ៍នេះ មួយថ្ងៃប៉ុណ្ណោះ មានអ្នកឆ្លងថ្មីដល់ទៅជិត ៣៨ម៉ឺននាក់ ស្លាប់ជាង ៣.៦០០នាក់បន្ថែមទៀត។ ប្រការនេះ បានរុញច្រានឲ្យតួលេខអ្នកឆ្លងសរុបនៅឥណ្ឌាបានកើនឡើងដល់ជាង ១៨លាននាក់ និងស្លាប់សរុបលើស ២០ម៉ឺននាក់ហើយ។ នេះបើតាមទិន្នន័យពីក្រសួងសុខាភិបាលឥណ្ឌា៕
None
