ការធ្លាក់ចុះនៃសេដ្ឋកិច្ចជប៉ុននៅត្រីមាសទី១ឆ្នាំ២០២១នេះ ត្រូវបានការិយាល័យគណរដ្ឋមន្ត្រីជប៉ុន បានលើកឡើងថា ដោយសារតែការចំណាយលើការប្រើប្រាស់មានការធ្លាក់ចុះ តួយ៉ាង ការចំណាយក្នុងគ្រួសារបានធ្លាក់ចុះក្នុងអត្រាប្រចាំឆ្នាំ ៥,៦% ខណៈដែលការចំណាយរបស់រដ្ឋាភិបាលវិញធ្លាក់ចុះប្រមាណ៧%។
ប្រទេសជប៉ុនមានសេដ្ឋកិច្ចកើនឡើង ២ត្រីមាសចុងក្រោយនៃឆ្នាំ២០២០ ប៉ុន្ដែ ការកើនឡើងនេះ ត្រូវបានបង្អាក់ទៅវិញ នៅក្រោយពេលដែលមេរោគឆ្លងកូវីដ-១៩ បានចូលមកលុកលុយប្រទេសជប៉ុនកាន់តែខ្លាំងឡើង។
ជប៉ុនពេលបច្ចុប្បន្ននេះ បានដាក់តំបន់ជាច្រើននៅក្រោមវិធានការដាក់ប្រទេសក្នុងគ្រាអាសន្ន ដោយក្នុងនោះ មានកន្លែងជាច្រើនត្រូវបានបិទខ្ទប់ ដូចជាភោជនីយដ្ឋាន និង ហាងផឹកស៊ីជាដើម ដើម្បីគ្រប់គ្រងទប់ស្កាត់ការចម្លងកូវីដ-១៩ នៅកន្លែងដែលមានមនុស្សប្រមូលផ្ដុំគ្នាច្រើនទាំងអស់នោះ។
អត្ថបទទាក់ទង
ចំនួនអ្នកឆ្លងកូវីដ-១៩ និងអ្នកស្លាប់នៅក្នុងប្រទេសជប៉ុន នៅតែបន្ដកើនឡើង ចំពេលដែលការចាក់វ៉ាក់សាំងនៅក្នុងប្រទេសនេះ គឺមានភាពយឺតយ៉ាវខ្លាំងមែនទែន រហូតមកទល់ពេលនេះ ជប៉ុនមានអ្នកទទួលបានវ៉ាក់សាំងដូសទី១ ត្រឹមតែ ៤%ប៉ុណ្ណោះ នៃចំនួនពលរដ្ឋសរុប។
ក្រុមអ្នកវិភាគសេដ្ឋកិច្ចនិយាយថា កិច្ចខិតខំប្រឹងប្រែងដើម្បីការចាក់វ៉ាក់សាំងឲ្យបានម៉ត់ចត់ជាងនេះ គឺជាមធ្យោបាយប្រាកដនិយមតែមួយគត់ ដែលអាចធ្វើឲ្យសកម្មភាពសេដ្ឋកិច្ចនឹងវិលមករកភាពធម្មតា និង អាចបន្ដកំណើនឡើងវិញដល់កម្រិតនៅមុនពេលមានមេរោគរាតត្បាត។ យ៉ាងណាមិញ សេដ្ឋកិច្ចជប៉ុនកាលពីឆ្នាំសារពើពន្ធមុននេះ បានដាំក្បាលធ្លាក់ចុះខ្លាំងមែនទែន គឺមានតួលេខអាក្រក់បំផុត បើគិតចាប់តាំងពីសង្គ្រាមលោកលើកទី២ ត្រូវបានបញ្ចប់មក ពោលគឺអាក្រក់លើសពីអ្វីដែលធ្លាប់មាននៅអំឡុងវិបត្តិហិរញ្ញវត្ថុសកលទៅទៀត។
នាយកប្រចាំតំបន់ផ្នែកស្រាវជ្រាវអាស៊ីប៉ាស៊ីហ្វិកនៃក្រុមហ៊ុន ING បាននិយាយថា លទ្ធផលនៅរយៈពេលចុងក្រោយសម្រាប់ប្រទេសជប៉ុន បានបង្ហាញពីស្ថានភាពកាន់តែអាក្រក់ជាងអ្វីដែលអ្នកវិភាគបានរំពឹងទុកទៅទៀត ដោយក្នុងនោះ មានផលប៉ះពាល់អវិជ្ជមានជាច្រើនបានកើនឡើងបណ្ដាលមកពីការរឹតត្បិតលើចលនាការធ្វើដំណើររបស់ពលរដ្ឋនៅអំឡុងពេលវិបតត្តិកូវីដ១៩។ អ្នកជំនាញផ្នែកស្រាវជ្រាវរូបនេះ បន្ថែមថា តាមការសង្កេតស្រាវជ្រាវឃើញថា កំណើនសេដ្ឋកិច្ចរបស់ជប៉ុននៅឆ្នាំនេះ អាចនឹងមានការចុះខ្សោយថែមទៀត។
ទោះបីជាពាណិជ្ជកម្មនៅក្រៅប្រទេសរបស់ជប៉ុនហាក់បីដូចជាមានការប្រសើរឡើងដោយសារតែប្រទេសទាំងអស់ជាដៃគូបានចាក់វ៉ាក់សាំងក៏ដោយ ប៉ុន្ដែសេដ្ឋកិច្ចជប៉ុននៅតែពឹងផ្អែកខ្លាំងទៅលើតម្រូវការក្នុងស្រុក។
សូមបញ្ជាក់ថា ជប៉ុនគិតមកទល់ពេលនេះ មានអ្នកឆ្លងកូវីដ-១៩ សរុបជិត៧០ម៉ឺននាក់ហើយ ខណៈអ្នកស្លាប់មានជាង១ម៉ឺននាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
