មូលបត្របំណុលសរុប និងការខ្ចីប្រាក់របស់រដ្ឋាភិបាលជប៉ុន ដែលមិនទាន់សង គិតត្រឹមត្រីមាសទី២ ឆ្នាំ២០២២ បានឈានដល់កំណត់ត្រាជិត ៩,៥ ទ្រីលានដុល្លារ កើនឡើងជាង១០០ពាន់លានដុល្លារធៀបនឹងត្រីមាសមុន។ ផ្អែកលើការប៉ាន់ស្មានរបស់រដ្ឋាភិបាលលើចំនួនប្រជាជនទាំងជិត ១២៥លាននាក់ គិតត្រឹមថ្ងៃទី០១ខែកក្កដា ពលរដ្ឋម្នាក់ គឺមានជាប់បំណុលរដ្ឋជាង ១០លានយ៉េន ឬ ៧ម៉ឺន៥ពាន់ដុល្លារ។ ចំនួននេះបានកើនឡើងទ្វេដងពីតួលេខសារពើពន្ធកាលពីឆ្នាំ ២០០៣។
ទោះបីជាប្រាក់ចំណូលសារពើពន្ធរបស់ប្រទេសជប៉ុនកាលពីឆ្នាំមុន បានឡើងដល់កម្រិតខ្ពស់បំផុតមិនធ្លាប់មាន ពោលគឺឡើងដល់ជាង៥០០ពាន់លានដុល្លារក៏ដោយ វានៅតែមិនអាចទប់ទល់នឹងការចំណាយរបស់តូក្យូដ៏ច្រើនសម្បើមបាននោះឡើយ។
អត្រាការប្រាក់ទាបបានជួយរក្សាការចំណាយលើការទូទាត់ការប្រាក់ ប៉ុន្តែការពឹងផ្អែកខ្លាំងរបស់ជប៉ុនលើការខ្ចីប្រាក់ អាចនឹងធ្វើឲ្យសេដ្ឋកិច្ចជប៉ុនរងផលប៉ះពាល់ ក្នុងករណីមានការកើនឡើងនៃអត្រាការប្រាក់នាពេលអនាគត។
អត្ថបទគួរអាន
មែនទែនទៅ មិនមែនតែរដ្ឋជប៉ុននោះទេ ដែលបានចាក់បញ្ចូលលុយក្នុងសេដ្ឋកិច្ចដើម្បីទប់នឹងមេរោគកូវីដ១៩ ក៏ដូចជាបញ្ហាអតិផរណា។ ប្រទេសសេដ្ឋកិច្ចលោកខាងលិចធំៗជាច្រើនទៀត ក៏កំពុងចំណាយប្រាក់យ៉ាងសន្ធឹកសន្ធាប់ ដើម្បីទប់ទល់នឹងជំងឺរាតត្បាត ពិសេសអតិផរណាដែលកំពុងកើនឡើងផងដែរ។ ក៏ប៉ុន្តែបន្ទុកបំណុលរបស់ប្រទេសជប៉ុន គឺមានច្រើនជាងគេ ពោលបន្ទុកបំណុលជប៉ុន មានលើសពីផលិតផលក្នុងស្រុកសរុបរបស់ប្រទេសនេះច្រើនជាងពីរដងឯណោះ។
សូមជម្រាថា អតិផរណារបស់ប្រទេសជប៉ុនបន្តមានខ្ពស់ជាងគោលដៅរបស់ធនាគារកណ្តាលជប៉ុនដែលបានកំណត់ទៅទៀត ពោលគឺមានខ្ពស់ជាង២%សម្រាប់រយៈពេលបីខែជាប់គ្នារាប់ត្រឹមខែមិថុនា។ មូលហេតុចំបង ដោយសារសេដ្ឋកិច្ចប្រឈមនឹងសម្ពាធពីតម្លៃវត្ថុធាតុដើមសកលកើនខ្ពស់ ដែលបានជំរុញឱ្យតម្លៃនៃការនាំចូលរបស់ប្រទេសត្រូវចំណាយច្រើនដូចគ្នា។
សូមជម្រាបថា ទោះបីជាកំរិតបំណុលកើនខ្ពស់ ប៉ុន្តែកំណើនសេដ្ឋកិច្ចរបស់យក្សសេដ្ឋកិច្ចលំដាប់ទី៣របស់ពិភពលោកមួយនេះ នៅតែធ្វើបានល្អគ្រាន់បើដដែល។ ជាក់ស្តែងសេដ្ឋកិច្ចជប៉ុនក្នុងត្រីមាសទី២ឆ្នាំនេះ មានកំណើន ២,៥% កើនឡើងពីអត្រា ០,៥% ធៀបនឹងកាលពីត្រីមាសទី១ នៅឆ្នាំ២០២២នេះ៕
