ការវាយប្រហារដោយរ៉ុក្កែតលើទីតាំងជនស៊ីវិលក្នុងទីក្រុង ឆាស៊ីវ យា(Chasiv Yar) ក្នុងតំបន់ ដូណេក(Donetsk) ត្រូវបានប្រធានាធិបតីអ៊ុយក្រែន ចាត់ទុកថា ជាអំពើភេរវកម្មរបស់ទីក្រុងម៉ូស្គូ មកលើប្រជាពលរដ្ឋស្លូតត្រង់។ អ៊ុយក្រែន និងសម្ព័ន្ធមិត្តលោកខាងលិច តែងអះអាងថា សង្គ្រាមរបស់លោកពូទីន គឺមានលក្ខណបែបចក្រពត្តិ វាតទីដណ្តើមយកទឹកដីរបស់ប្រទេសជិតខាង ហើយបានចោទប្រកាន់ទង្វើឃោឃៅរបស់កងទ័ពរុស្ស៊ីថាជា បទឧក្រិដ្ឋកម្មសង្គ្រាមផងដែរ។ ទីក្រុងម៉ូស្គូគ្មានពាក្យអ្វីក្រៅតែពី ឆ្លើយបដិសេធថា ការវាយប្រហាររបស់ខ្លួនមិនបានសំដៅជនស៊ីវិលទេ។
រូបភាពដ៏សោកសៅ បង្ហាញពីក្រុមអ្នកជួយសង្គ្រោះបានប្រើឡានស្ទូច ដើម្បីលើកបន្ទះបេតុង ចេញម្តងមួយៗក្នុងកិច្ចខិតខំប្រឹងប្រែងស្វែងរកអ្នកនៅរស់រានមានជីវិត ខណៈយូរៗម្តងគេឃើញមាន សាកសពត្រូវបានគេទាញចេញពីគំនរបាក់បែក។
សង្គ្រាមដែលបានចាប់ផ្តើមនៅចុងខែកុម្ភៈ ហើយត្រូវបានចាត់ទុកជាជម្លោះដ៏ធំបំផុតនៅក្នុងទ្វីបអឺរ៉ុបចាប់តាំងពីក្រោយសង្គ្រាមលោកលើកទី២ បានឆក់យកជីវិតមនុស្សរាប់ពាន់នាក់ ធ្វើឱ្យទីក្រុង និងទីប្រជុំជនជាច្រើនខ្ទិចខ្ទី ខណៈពលរដ្ឋអ៊ុយក្រែនជាង ៥,៥លាននាក់បានភៀសខ្លួនចេញពីប្រទេសកំណើតរបស់ពួកគេ។
អត្ថបទគួរអាន
រុស្ស៊ីកំពុងធ្វើសង្គ្រាមវាតទីយកទឹកដីនៅខាងកើតតែ ទប់ទល់នៅខាងត្បូង អ៊ុយក្រែន
ដូចបានដឹងស្រាប់ហើយថាកាលពីខែឧសភា រុស្ស៊ីបានបរាជ័យ និងបោះបង់ចោលគោលដៅកាន់កាប់រដ្ឋធានីកៀវរបស់អ៊ុយក្រែន ដោយបង្វែទិសដៅផ្តោតទៅលើភាគខាងត្បូងអ៊ុយក្រែន និងតំបន់ Donbas ភាគខាងកើត ដែលមានខេត្តចំនួនពីរគឺ Luhansk និង Donetsk ។ វិមានក្រឹមឡាំងចង់ប្រគល់ការគ្រប់គ្រងខេត្តទាំងពីរនេះ ទៅឱ្យពួកបំបែកខ្លួន ដែលគាំដោយទ្ររុស្ស៊ី ហើយដែលបានប្រកាសឯករាជ្យផ្ដាច់ចេញពីទីក្រុងកៀវរួចហើយដែរ។
គួរជម្រាបថា គិតត្រឹមពីរសប្តាហ៍មុនរុស្ស៊ីបានកាន់កាប់ទាំងខេត្តលូកហានទាំងស្រុង ហើយបើគិតមកទល់នឹងពេលនេះ ម៉ូស្គូកំពុងបន្តការវាយប្រហារ ដើម្បីគ្រប់គ្រងខេត្តដូណេកមួយទៀត។
មិនដូចភាគខាងកើតនោះទេ នៅភាគខាងត្បូងអ៊ុយក្រែនឯណេះវិញ ទីក្រុងកៀវកំពុងបង្កើនការផ្លោងកាំភ្លើងធំទំនើបៗ ដែលលោកខាងលិចបានផ្តល់ឱ្យលើតំបន់ Kherson ជាទីដែលរុស្ស៊ីកំពុងកាន់កាប់។ ភាគីអ៊ុយក្រែនព្យាយាមយកទីក្រុងមួយនេះមកវិញ ដោយសារតែវាជាទីក្រុងកំពង់ផែដ៏សំខាន់ ដែលអាចបើកផ្លូវដឹកជញ្ជូនស្បៀងអាហាររបស់អ៊ុយក្រែន ចេញទៅតាមសមុទ្រខ្មៅ។
សូមបញ្ជាក់ថា កាលពីសប្តាហ៍មុនស្របពេលដែលទីក្រុងរបស់អ៊ុយក្រែន នៅតំបន់ដុនបាស់ កំពុងរងការវាយប្រហារកាន់តែសន្ធប់ពីកងទ័ពរុស្ស៊ី ប្រធានាធិបតីលោកពូទីន បានគំរាមក្រុមប្រទេសខាងលិចថា រុស្ស៊ីនៅមិនទាន់ចាប់ផ្តើមអ្វីៗមែនទែននៅឡើយទេ ក្នុងសង្គ្រាមនៅអ៊ុយក្រែន។ ការគំរាមនេះ ធ្លាក់ចុះមកស្របពេលដែលលោកខាងលិច នៅតែបន្តផ្តល់សព្វាវុធ ទំនើបៗទៅឱ្យអ៊ុយក្រែន ដោយក្នុងនោះមានទាំង កាំភ្លើងផ្លោងជំនាន់ចុងក្រោយផលិតដោយអាមេរិក ប្រភេទ M777 Howitzers (ហូវីតហ្សឺ) និង កាំភ្លើងធំប្រភេទ១៥៥មីល្លីម៉ែត្ររបស់ណាតូ៕
