តាមរយៈជិត៣០ឆ្នាំរបស់ប្រាសាក់ក្នុងវិស័យហិរញ្ញវត្ថុ និងភាពសម្បូរបែបនៃប្រព័ន្ធបច្ចេកវិទ្យារបស់ធនាគារ គូកមីន ថ្នាក់ដឹកនាំធនាគារ ខេប៊ី ប្រាសាក់ ជឿជាក់ថា ធនាគារក្រោមការច្របាច់បញ្ចូលគ្នារវាងគ្រឹះស្ថានហិរញ្ញវត្ថុទាំងពីរនេះ ខេប៊ី ប្រាសាក់ ក្លាយជាធនាគារថ្មីដ៏រឹងមាំ និងមានវិសាលភាពទូលំទូលាយមួយនៅក្នុងទីផ្សារហិរញ្ញវត្ថុនៅកម្ពុជា។ លើសពីនេះ ធនាគារនេះ នឹងផ្ដល់សេវាកម្ម និងផលិតផលធនាគារបែបទំនើប និងសម្បូរបែបជាមួយការបំពាក់បច្ចេកវិទ្យាឌីជីថលទំនើបចុងក្រោយក្នុងការបម្រើអតិថិជនគ្រប់ប្រភេទនៅកម្ពុជាលើសពីសេវាហិរញ្ញវត្ថុ។
លោក អ៊ុំ សមអឿន ប្រធាននាយកប្រតិបត្តិធនាគារ ខេប៊ីប្រាសាក់ រំពឹងថា ធនាគារ ខេប៊ីប្រាសាក់ ដែលជាការច្របាច់បញ្ចូលគ្នារវាងគ្រឹះស្ថានហិរញ្ញវត្ថុប្រាសាក់ និងធនាគារមកពីកូរ៉េខាងត្បូង គូកមីន នឹងក្លាយជាធនាគារ និងជាដៃគូប្រកួតប្រជែងក្នុងវិស័យហិរញ្ញវត្ថុថ្មីដ៏រឹងមាំមួយនៅកម្ពុជា ហើយតាមរយៈការរួមបញ្ចូលគ្នានេះវានឹងធ្វើឲ្យទ្រព្យសកម្មរបស់ធនាគារមានការកើនឡើងជាលំដាប់។ ការរំពឹងបែបនេះ ក៏ដោយសារលោកផ្នែកទៅលើបទពិសោធរបស់ប្រាសាក់ ដែលបានឈរជើងជិត៣០ឆ្នាំក្នុងវិស័យហិរញ្ញវត្ថុនៅកម្ពុជា គួបផ្សំជំនាញបច្ចេកវិទ្យាឌីជីថលកម្រិតសកលរបស់ធនាគារ គូកមីន ដែលមានក្រុមហ៊ុនមេដ៏រឹងមាំនៅប្រទេសកូរ៉េខាងត្បូង។
លោកបានថ្លែងយ៉ាងដូច្នេះថា៖«ការរួមបញ្ចូលគ្នានៃគ្រឹះស្ថានហិរញ្ញវត្ថុទាំងពីរជា ធនាគារ ខេប៊ីប្រាសាក់ ម.ក បង្ហាញពីកម្លាំងសំយោគដ៏មានឥទ្ធិពល ដែលនឹងបង្កើតអត្ថប្រយោជន៍កាន់តែច្រើនឡើងសម្រាប់អតិថិជនក្នុងប្រទេសកម្ពុជា។ តាមការផ្សំបញ្ចូលគ្នានូវបទពិសោធន៍ឈរជើងដ៏យូរអង្វែងរបស់ប្រាសាក់ក្នុងវិស័យមីក្រូហិរញ្ញវត្ថុ ជាមួយនឹងដំណោះស្រាយបច្ចេកវិទ្យាហិរញ្ញវត្ថុ និងជំនាញកម្រិតសកលរបស់ធនាគារគូកមីនកម្ពុជា យើងនឹងក្លាយជាធនាគារដ៏រឹងមាំថ្មីមួយជាមួយនឹងបណ្តាញដ៏ធំទូលាយនូវវត្តមានសាខាកាន់តែច្រើន និងការកើនឡើងនៃទ្រព្យសកម្មសរុប»។
អត្ថបទគួរអាន
ទន្ទឹងនឹងអរគុណដល់អតិថិជនដែលមានការជឿទុកចិត្ត និងភក្តីភាពលើប្រាសាក់កន្លងមក លោក អ៊ុំ សមអឿន ប្តេជ្ញាថា លោកនឹងខិតខំប្រឹងប្រែងឲ្យអស់ពីសមត្ថភាពក្នុងការផ្តល់សេវាកម្ម និងធ្វើឱ្យជីវិតរបស់អតិថិជនកាន់តែល្អប្រសើរបន្ថែមទៀត ក៏ដូចជារួមចំណែកជួយដល់ការអភិវឌ្ឍប្រទេសកម្ពុជា តាមរយៈការផ្តល់ដំណោះស្រាយហិរញ្ញវត្ថុប្រកបដោយនវានុវត្តន៍ និងការលើកកម្ពស់បរិយាប័ន្នហិរញ្ញវត្ថុ។ អ្នកជំនាញរូបនេះជឿជាក់ថា តាមរយៈជំនាញ ធនធាន និងការប្តេជ្ញាចិត្តរបស់មន្ត្រីគ្រប់ជាន់ថ្នាក់វានឹងជួយធ្វើឲ្យធនាគារសម្រេចបានលទ្ធផលល្អប្រសើរ នឹងផ្ដល់អត្ថប្រយោជន៍ជាសារវន្តចំពោះអតិថិជន និងសហគមន៍។
ការបង្ហាញក្តីរំពឹង និងភាពជឿជាក់របស់ថ្នាក់ដឹកនាំខាងលើធ្វើឡើងក្រោយធនាគារ ខេប៊ីប្រាសាក់ បានប្រកាស់ដាក់ឲ្យដំណើរការជាផ្លូវការនៅថ្ងៃទី៧ ខែសីហា ឆ្នាំ២០២៣ នេះ បន្ទាប់ពីធនាគារនេះទទួលបានការអនុម័តលើការរួមបញ្ចូលគ្នាពីក្រសួងពាណិជ្ជកម្មកាលពីពេលថ្មីៗ និងអាជ្ញាបណ្ណធនាគារពាណិជ្ជពីធនាគារជាតិនៃកម្ពុជាកាលពីពេលកន្លងទៅ។ បច្ចុប្បន្នធនាគារពាណិជ្ជថ្មីនេះ មានសាខាទូទាំងប្រទេសកម្ពុជាសរុប១៩២ ក្នុងនោះសាខារបស់គ្រឹះស្ថានមីក្រូហិរញ្ញវត្ថុមានចំនួន១៨៤ និងសាខារបស់គូកមីនចំនួន៨ ដោយមានទ្រព្យសកម្មសរុបចំនួន ៥,៧ពាន់ដុល្លារអាមេរិក ជាមួយប្រាក់បញ្ញើសន្សំ ២,៩ពាន់លានដុល្លារអាមេរិក និងឥណទាន ៥ពាន់លានដុល្លារអាមរិក។
គួររំលឹកថា ក្រុមហ៊ុន KB Financial Group បានចំណាយថវិកាជាង៦រយលានដុល្លារទិញភាគហ៊ុនរបស់គ្រឹះស្ថានមីក្រូហិរញ្ញវត្ថុប្រាសាក់៧០%កាលពីថ្ងៃទី២៩ ខែមករា ឆ្នាំ២០២០ បន្ទាប់មកក្រុមហ៊ុននេះបានចំណាយថវិកាជាង ៣២២លានដុល្លារបន្ថែម ដើម្បីទិញភាគហ៊ុនរបស់ប្រាសាក់ដែលនៅសេសសល់៣០% ក្រោយទទួលបានការអនុញ្ញាតពីធនាគារជាតិនៃកម្ពុជា។
ធនាគារ ខេប៊ី ប្រាសាក់ មានភាគទុនិកដ៏រឹងមាំគឺ ធនាគារ KB Kookmin Bank ដែលជាធនាគារពាណិជ្ជធំជាងគេរបស់ប្រទេសកូរ៉េ និងជាក្រុមហ៊ុនបុត្រសម្ព័ន្ធសំខាន់មួយរបស់ KB Financial Group Inc. ដែលជាក្រុមហ៊ុនឈានមុខគេលើពិភពលោកក្នុងសេវាហិរញ្ញវត្ថុសកលដែលមានមូលដ្ឋាននៅកូរ៉េ និងជាក្រុមហ៊ុនដែលបានចុះបញ្ជីនៅផ្សារហ៊ុនញូវយ៉ក។ ធនាគារ KB Kookmin Bank មានទិសដៅយុទ្ធសាស្ត្រ ក្នុងការនាំយកឧត្ដមានុវត្តន៍ និងបច្ចេកវិទ្យាហិរញ្ញវត្ថុឌីជីថល មកជូនធនាគារ ខេប៊ីប្រាសាក់ សម្រាប់ធ្វើឱ្យអតិថិជនមានភាពងាយស្រួលក្នុងការប្រើប្រាស់សេវាធនាគារ។
ជាមួយនឹងទស្សនវិស័យរួមក្នុងការជំរុញបរិយាប័ន្នហិរញ្ញវត្ថុ ធនាគារ ខេប៊ីប្រាសាក់ ម.ក ប្តេជ្ញាក្លាយជាដៃគូហិរញ្ញវត្ថុជាទីទុកចិត្តបំផុត ជាមួយនឹងសេវាកម្មប្រកបដោយភាពច្នៃប្រឌិត និងនិរន្តរភាព ដែលជួយដល់ភាពរីកចម្រើនរបស់អតិថិជន។ ធនាគារមានគោលបំណងផ្តល់សេវាហិរញ្ញវត្ថុដែលប្រកបដោយនិរន្តរភាពជូនដល់សហគមន៍ និងសហគ្រាសធុនតូចបំផុត ធុនតូច និងមធ្យម៕
