ឯកឧត្តម ជាវ តាយ អភិបាលខេត្តកំពត និងមន្ត្រីពាក់ព័ន្ធ នៅថ្ងៃទី២០ ខែកញ្ញា បានចុះត្រួតពិនិត្យទីតាំង ដែលអ្នកវិនិយោគស្នើសុំវិនិយោគ និងអភិវឌ្ឍន៍ឆ្នេរព្រែកកំពង់បាយ ដែលស្ថិតក្នុងសង្កាត់កំពង់កណ្តាល ក្រុងកំពត ខេត្តកំពត។ បើតាមរដ្ឋបាលខេត្តកំពត ការចុះត្រួតពិនិត្យផ្ទាល់ដល់ទីតាំងគម្រោងនេះ គឺក្នុងគោលបំណង ដើម្បីសិក្សា និងទាមទារឲ្យមានការចូលរួមមតិយោបល់ពីជំនាញ និងអាជ្ញាធរពាក់ព័ន្ធ សំដៅធ្វើយ៉ាងណាឱ្យដំណើរការអភិវឌ្ឍន៍ ប្រកបដោយគុណភាព និរន្តរភាព បញ្ចៀសបាននូវផលប៉ះពាល់ឲ្យនៅកម្រិតតិចបំផុត និងបម្រើដល់ផលប្រយោជន៍សាធារណជនឲ្យបានច្រើន។
បើតាមឯកឧត្តម ជាវ តាយ បានប្រាប់សារព័ត៌មានខេមបូណូមីស គម្រោងកែលម្អឆ្នេរព្រែកថ្មីខាងលើនេះ មានប្រវែងជិត ៣០០ម៉ែត្រ ដែលមានការទទួលខុសត្រូវ ដោយរដ្ឋបាលខេត្តកំពត ផ្ទាល់ ដើម្បីបង្កើនសោភ័ណ្ឌភាពឆ្នេរកំពង់បាយ។ ទោះបីជា មិនបានបញ្ជាក់ពីក្រុមហ៊ុនវិនិយោគ និងទំហំវិនិយោគក្ដី ប៉ុន្ដែ ឯកឧត្តម ជាវ តាយ បានគូសបញ្ជាក់ថា គម្រោងកែលម្អឆ្នេរព្រែកថ្មីនេះ នឹងក្លាយជាសមិទ្ធផលថ្មី ក្នុងវិស័យទេសចរណ៍ ដែលអាចទាក់ទាញទេសចរកាន់តែច្រើន មកកម្សាន្តខេត្តកំពត ពិសេសនៅពេលមានពិធីបុណ្យទានម្ដងៗ។
ដ្បិតថា នេះជាគម្រោង ដែលស្ថិតក្នុងការសិក្សាក៏ដោយចុះ តែឯកឧត្តម ជាវ តាយ រំពឹងថា ក្រោយពីបង្កើតបាននូវគម្រោងថ្មីមួយនេះបន្ថែមទៀត នឹងអាចមាននូវហេដ្ឋារចនាសម្ព័ន្ធបម្រើក្នុងវិស័យទេសចរណ៍ និងបង្កើតឱកាសការងារបន្ថែម ក៏ដូចជា លើកកម្ពស់ជីវភាពប្រជាពលរដ្ឋខេត្តកំពត ឱ្យកាន់តែប្រសើរឡើងមួយកម្រិតទៀត។
អត្ថបទទាក់ទង
ជុំវិញ គម្រោងកែលម្អឆ្នេរព្រែកថ្មី របស់រដ្ឋបាលខេត្តកំពត ត្រូវបានលោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក គាំទ្រយ៉ាងពេញទំហឹង ដោយសារតែអ្នកជំនាញផ្នែកទេសចរណ៍រូបនេះ បានយល់ឃើញថា ខេត្តកំពត មិនចាញ់ខេត្តមណ្ឌលគិរី ដែលមានសក្ដានុពលខ្ពស់ផ្នែកវិស័យទេសចរណ៍ ពិសេសអំឡុងកូវីដ-១៩ មានទេសចរកាន់តែច្រើន បានទៅកម្សាន្តនៅខេត្តនោះ ដែលជាឱកាសល្អ ក្នុងការកែលម្អលើវិស័យទេសចរណ៍។ លោក ធួន ស៊ីណាន បានគូសរំលេចថា បើទោះបី ខេត្តកំពត និងខេត្តកែប មានទំហំតូច តែខេត្តទាំងពីរនេះ មានសក្ដានុពលទេសចរណ៍ មិនចាញ់គ្នានោះទេ ហើយក៏មានភាពលេចធ្លោរ អំឡុងកូវីដ-១៩ ដែលមានទេសចរទៅលេងច្រើនកុះករ។
វិស័យទេសចរណ៍របស់កម្ពុជា ចាប់ផ្ដើមមានក្ដីសង្ឃឹមឡើងវិញជាបណ្ដើរៗ បន្ទាប់ពីផែនការចាក់វ៉ាក់សាំងបង្ការកូវីដ-១៩ របស់រាជរដ្ឋាភិបាលស្ទើនឹងសម្រេចលទ្ធផល ១០០% ហើយចន្តរនៃទេសចរផ្ទៃក្នុង ក៏ចាប់កម្រើកឡើងវិញ។ ដោយឡែក ផែនការបើកទេសចរបរទេស របស់កម្ពុជា នៅចុងឆ្នាំនេះ ក៏កាន់តែខិតចូលមកដល់ដែរ។
យោងតាមរបាយការណ៍របស់ក្រសួងទេសចរណ៍ នៅឆមាសទី១ ក្នុងឆ្នាំ២០២១ កម្ពុជា ទទួលបានភ្ញៀវទេសចរអន្តរជាតិ ប្រមាណ១០ម៉ឺននាក់ ថយចុះ ៩១% បើធៀបនឹងរយៈពេលដូចគ្នា កាលពីឆ្នាំមុន។ ដោយឡែក នៅសប្ដាហ៍ទី៣ នៃខែកញ្ញា មានទេសចរប្រមាណ ៨ម៉ឺននាក់ បានដើរកម្សាន្តនៅតាមតំបន់នានា ដែលជាទេសចរផ្ទៃក្នុង៕None
