លោកជំទាវ ឱ វ៉ាន់ឌីន អ្នកនាំពាក្យក្រសួងសុខាភិបាលកម្ពុជា បានបញ្ជាក់ប្រាប់ខេមបូណូមីសថា ចំពោះករណីនេះ ក្រសួងសុខាភិបាល កំពុងធ្វើការងារនេះហើយ ក្រសួងនឹងបើកធ្វើសន្និសីទកាសែត អំពីករណីនេះ នៅរសៀលម៉ោង ៣ ថ្ងៃទី ០៥ មីនានេះ។
លោកជំទាវ ឱ វ៉ាន់ឌីន ប្រសាសន៍ថា «ចំពោះករណីហ្នឹង យើងនឹងធ្វើសន្និសីទកាសែត នៅម៉ោង៣រសៀលនេះ អញ្ចឹងប្អូនអញ្ជើញមកម៉ោង៣រសៀលនេះ ដើម្បីបានដឹងព័ត៌មានលម្អិត។ មីង មិនអាចធ្វើការផ្ដល់ព័ត៌មានបានទេពេលនេះ ព្រោះក្រសួងកំពុងធ្វើការងារនេះហើយ។ អញ្ចឹងចង់ដឹងច្បាស់ម៉ោង ៣រៀល អញ្ជើញមក។»
ការប្រកាសធ្វើសន្និសីទ របស់ក្រសួងសុខាភិបាលកម្ពុជានេះ គឺធ្វើឡើងបន្ទាប់ពីគេបានរកឃើញអ្នកដំណើរជនជាតិជប៉ុនម្នាក់ ដែលធ្វើដំណើរតាមជើងហោះហើរចេញពីកម្ពុជា ទៅកាន់ប្រទេសវៀតណាម មុននឹងបន្តដំណើរទៅប្រទេសជប៉ុន គឺបានធ្វើតេស្ដទៅរកឃើញថា មានវិជ្ជមាន នៃវីរុស Covid-19។
អត្ថបទទាក់ទង!
បើតាមការរាយការណ៍របស់សារព័ត៌មានក្នុងស្រុកវៀតណាម អ្នកដំណើរជប៉ុនម្នាក់ផ្ទុកមេរោគ Covid-19 ម្នាក់នោះ គឺបានជិះយន្ដហោះ របស់ក្រុមហ៊ុនអាកាសចរណ៍ Vietnam Airlines ចេញពីខេត្តសៀមរាប ទៅកាន់ទីក្រុង ហូជីមិញនៅអង្គារ ទី៣ ខែមីនា មុននឹងបន្តដំណើរជើងហោះហើរនៃក្រុមហ៊ុនអាសកាសចរណ៍ដដែលនេះ ទៅកាន់ប្រទេសជប៉ុន។
បន្ទាប់ពីបានចុះចត នៅឯអាកាសយានដ្ឋាន Nagoya របស់ជប៉ុន បុរសជាអ្នកដំណើរជនជាតិជប៉ុនម្នាក់នោះ បង្ហាញអាការៈ ឡើងកំដៅខ្ពស់ ហើយត្រូវបានបញ្ជូនទៅកាន់មន្ទីរពេទ្យក្នុងស្រុក។ លទ្ធផលនៃការធ្វើតេស្ដ បញ្ហាញថា បុរសជនជាតិជប៉ុនម្នាក់នោះ ពិតជាមានវិជ្ជមាន នៃវីរុស Covid-19។
ប្រភពព័ត៌មានបន្ថែមថា នៅឯអាកាសយានដ្ឋានសៀមរាប បុរសឆ្លងមេរោគ Covid-19 ម្នាក់នោះ បាន Checked-in ដើម្បីធ្វើដំណើរទៅកាន់ព្រលានយន្ដហោះ Nagoya នៅប្រទេសជប៉ុន ដូច្នេះ មកដល់ព្រលានយន្ដហោះ Tan Son Nhat នៃប្រទេសវៀតណាម គាត់មិនបានឈប់ ដើម្បីបន្ដូរយន្ដហោះថ្មីនោះទេ។ គាត់បាន ចូលទៅអង្គុយបន្ទប់មានកៅអីជួរ C ប្រភេទកៅអី Business Class នៅម៉ោង ១០៖៣០ នាទីយប់ ដើម្បីរង់ចាំហោះហើរបន្ដទៅជប៉ុន។
បន្ទាប់ពី ដាក់អ្នកដំណើរអស់ នៅឯព្រលានយន្ដហោះ Nagoya យន្ដហោះ របស់ក្រុមហ៊ុនវៀតណាម Vietnam Airlines បានត្រឡប់មកកាន់ព្រលានយន្ដហោះ Tan Son Nhat វិញ នៅរសៀលថ្ងៃពុធ ទី ០៤ ខែមីនា ជាមួយអ្នកដំណើរ ៧៣នាក់ រួមជាមួយបុគ្គលិកអាកាសចរណ៍ ១២នាក់។
បុគ្គលិកអាកាសចរណ៍ទាំងអស់ រួមទាំងអ្នកដំណើរ ៥១នាក់ ដែលបានធ្វើដំណើរចូលប្រទេសវៀតណាម ត្រូវបានដាក់ឲ្យនៅ ដាច់ដោយឡែកពីគ្នា។ រីឯ អ្នកដំណើរ២២ នាក់ផ្សេងទៀត ដែលត្រូវបន្ដដំណើរទៅកាន់គោលដៅផ្សេងទៀត ត្រូវបានគេចាត់វិធានការ ឲ្យនៅដាច់ដោយឡែក សម្រាប់នីតិវិធី ភ្ជាប់ជើងហោះហើររបស់ពួកគេ។
ប្រទេសជប៉ុន មានករណីឆ្លងមេរោគ Covid-19 គិតត្រឹមថ្ងៃពុធទី ០៤ ខែមីនា មាន ចំនួន ២៣០ ករណី ជាមួយអ្នកស្លាប់ ១២ករណី។
ចំនួនអ្នកស្លាប់ដោយសារមេរោគ Covid-19 នៅទូទាំងសកលលោក មានការកើនឡើង ដល់ ៣២០២ នាក់់ មានភាគច្រើន គឺនៅចិនដីគោក និងបន្ទាប់មក មាននៅប្រទេសអ៊ីតាលី (៧៩នាក់) អឺរ៉ង (៧៧នាក់) និងកូរ៉េខាងត្បូង (៣២នាក់) ខណៈដែលសហរដ្ឋអាមេរិក (៩នាក់)៕
None
