សមាជិក និងជាអ្នកនាំពាក្យនិយ័តករទូរគមនាគមន៍កម្ពុជា ឯកឧត្តម អុឹម វុត្ថា បានប្រាប់ខេមបូណូមីសតាមទូរស័ព្ទថា ទូរគមនាគមន៍កម្ពុជា និងក្រុមហ៊ុនទូរស័ព្ទចល័តទាំង៦នៅកម្ពុជា កំពុងតែសហការបង្កើតកម្មវិធីសហ្វវ៊ែរ(Software) ថ្មីមួយ ដើម្បីបញ្ចប់ករណីសង្ស័យរវាងសាធារណៈជាមួយក្រុមហ៊ុនទូរស័ព្ទចំពោះការកាត់លុយទូរស័ព្ទដោយគ្មានមូលហេតុ។
ឯកឧត្តម អុឹម វុត្ថា បានមានប្រសាសន៍ថា«កាលពីនៅក្នុងខែមីនា និយ័តករបានសន្និសីទកាសែតម្តងហើយ ដើម្បីប្រាប់សាធាណជនពីបញ្ហា ហើយឥឡូវនេះយើងកំពុងតែជម្រុញធ្វើជាមួយប្រតិបត្តិករចំពោះបញ្ហាហ្នឹង ពីព្រោះថាកម្មវិធីហ្នឹងត្រូវសរសេរនៅក្នុងកម្មវិធីសហ្វវ៊ែរ(Software)គ្រប់ក្រុមហ៊ុនទាំងអស់ ដើម្បីងាយស្រួលដល់អតិថិជនដែលមានការសង្ស័យគាត់ប្រើកម្មវិធីនេះ ហើយក្នុងខែ៦ហ្នឹងធ្វើម៉េចឲ្យហើយ ដើម្បីបានដាក់ឲ្យដំណើរការ»។
កន្លងទៅ មានពលរដ្ឋជាច្រើនតែងតែរិះគន់ចំពោះក្រុមហ៊ុនទូរស័ព្ទចល័តមួយ ជាពិសេសក្រុមហ៊ុនធំល្បីៗ២ ដែលតែងតែធ្វើការកាត់លុយទូរស័ព្ទដោយគ្មានមូលហេតុ និងការភ្ជាប់កម្មវិធីទូរស័ព្ទផ្សេងៗដោយគ្មានការអនុញ្ញាតពីអ្នកប្រើប្រាស់ជាដើម។
អត្ថបទគួរអាន
ឯកឧត្តមបានបន្តថា កម្មវិធីដែលយើងបង្កើតនេះ នឹងជួយដល់អ្នកប្រើប្រាស់ទូរស័ព្ទចល័តទាំងអស់ ងាយក្នុងការស្រួលផ្តាច់ ឬបញ្ចប់កម្មវិធី ដែលមិនបានភ្ជាប់ ឬសង្ស័យថាមានភ្ជាប់ ដោយគ្មានការអនុញ្ញាតពីអ្នកប្រើប្រាស់។ឯកឧត្តមថា« ចឹងគឺយើងរៀបចំឲ្យមានកម្មវិធីហ្នឹង គឺដើម្បីបញ្ចប់ភាពសង្ស័យគ្នាទៅវិញទៅមករវាងអ្នកប្រើប្រាស់ និងប្រតិបត្តិករ និយាយជារួមឲ្យវាស្មើភាពគ្នា»។
បើតាមអ្នកនាំពាក្យនិយ័តករទូរគមនាគមន៍កម្ពុជារូបនេះបញ្ជាក់ថា បន្ទាប់ពីបង្កើតកូដរួមនេះរួច និយ័តករទូរគមនាគមន៍កម្ពុជា នឹងផ្សព្វផ្សាយជាសាធារណៈនៅក្នុងគេហទំព័រហ្វេសប៊ុកផ្លូវការរបស់ទូរគមនាគមន៍កម្ពុជា ដល់អ្នកប្រើប្រាស់ឲ្យបានដឹងពីវិធីប្រើប្រាស់ ដើម្បីកុំឲ្យក្រុមហ៊ុនមួយចំនួនមានឱកាសកេងប្រយោជន៍ពីពលរដ្ឋបន្ត ក៏ដូចបញ្ចប់ការស្តីបន្ទោសឲ្យគ្នាទៅវិញទៅមកផងដែរ៕
None
