ប្រធានក្រុមហ៊ុនអាកាសចរណ៍ ហ្វីលីពីនអ៊ែរឡាញ (Philippines Airline) លោក ហ្គីលប៊ឺតសាន់តា ម៉ារីយ៉ា បានប្រាប់សន្និសីទសារព័ត៌មានថា ក្រុមហ៊ុននឹងប្រគល់យន្តហោះចំនួន ២២ គ្រឿងទៅឱ្យអ្នកម្ចាស់ដើមវិញ ព្រោះក្រុមហ៊ុនមិនរំពឹងថាអាចនឹងវិលត្រឡប់ទៅរកស្ថានភាពដូចមុនពេលមានជំងឺរាតត្បាតកូវីដ១៩នោះទេ រហូតដល់ឆ្នាំ២០២៤ឬឆ្នាំ២០២៥ឯណោះ។
ការប្រគល់យន្តហោះ២២គ្រឿងវិញនេះ នឹងកាត់បន្ថយចំនួនយន្តហោះរបស់ក្រុមហ៊ុនអាកាចរណ៍ហ្វីលីពីន ពី ៩២គ្រឿងមកនៅត្រឹម ៧០គ្រឿងប៉ុណ្ណោះ។
ក្រៅតែពីការប្រគល់យន្តហោះត្រឡប់ទៅវិញ ក្រុមហ៊ុនដឹកជញ្ជូនអ្នកដំណើរធំជាងគេមួយរបស់ហ្វីលីពីននេះ ក៏ត្រៀមនឹងចរចាជាមួយក្រុមហ៊ុនផលិតយន្តហោះបារាំង Airbus ផងដែរចំពោះការពន្យាពេលកិច្ចសន្យាទិញយកយន្តហោះបន្ថែមពី Airbus រហូតដល់ឆ្នាំ២០២៦ ឬ២០៣០។
អត្ថបទគួរចាប់អារម្មណ៍
ទន្ទឹមនឹងនេះ ក្រុមហ៊ុនអាកាសចរណ៍ហ្វីលីពីនកាលពីសប្តាហ៍មុនបានដាក់ពាក្យក្ស័យធុន ក្រោមជំពូកទី១១ទៅតុលាការសហរដ្ឋអាមេរិកជាកន្លែងដែលក្រុមហ៊ុនត្រូវបានបង្កើតឡើងដំបូង។ ប្រការនេះនឹងអនុញ្ញាតឱ្យក្រុមហ៊ុនបន្តប្រតិបត្តិការនិងបង្កើតដើមទុនថ្មី សម្រាប់បន្តអាជីវកម្មរបស់ខ្លួន។ បន្ទាប់មកក្រុមហ៊ុននឹងបន្តនិតិវិធីរៀបចំរចនាសម្ព័ន្ធហិរញ្ញវត្ថុឡើងវិញ។
គួរជម្រាបថា ផែនការស្តារនីតិសម្បទាអាជីវកម្មឡើងវិញនេះ នឹងរួមបញ្ចូលការស្នើកាត់បន្ថយប្រាក់កម្ចីចំនួន ២ពាន់លានដុល្លារ ការពន្យាពេលសងបំណុលរយៈពេលវែងចំនួន ៥០០លានដុល្លារ និងការផ្តល់ហិរញ្ញប្បទានបំណុលពីម្ចាស់ភាគហ៊ុនធំៗរបស់ក្រុមហ៊ុនអាកាសចរណ៍ផងដែរ៕
None
