ឧត្តមសេនីយ លោកប្រាយុទ្ធ ទទួលបានសំឡេងគាំទ្រចំនួន ២៥៦ សំឡេង ទល់នឹង ២០៦ សម្លេងដែលបានបោះឆ្នោតដកសេចក្តីទុកចិត្ត ជាមួយនឹងសម្លេងអនុប្បវាទចំនួន ៩ ខណៈឧបនាយករដ្ឋមន្ត្រីថៃលោកប្រាវីត វ៉ុងស៊ូវុន (Prawit Wongsuwon) ទទួលបានសំឡេងគាំទ្រច្រើនជាងគេគឺ ២៦៨ និងឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម លោកចូរិន លាកសាណាវីសិត (Jurin Laksanawisit) ទទួលបានសម្លេងគាំទ្រទាបបំផុត គឺត្រឹមតែ ២៤១ សំឡេងប៉ុណ្ណោះ។
យ៉ាងណាមិញ បន្ទាប់ពីលទ្ធផលបោះឆ្នោតត្រូវបានចេញផ្សាយនៅចុងសប្ដាហ៍មុននេះ លោក ប្រាយុទ្ធបានប្រាប់អ្នកសារព័ត៌មានថា «លោកពិតជាធូរទ្រុងណាស់»។
ក៏ប៉ុន្តែ យោងតាមអ្នកសង្កេតការណ៍មួយចំនួនបានអះអាងថា បើទោះជាគណៈរដ្ឋមន្ត្រីទាំង១១រូបបានរួចផុតពីការបោះឆ្នោតទុកដកសេចក្តីទុកចិត្តក៏ដោយ ក៏លទ្ធផលនេះសរបង្ហាញឲ្យឃើញយ៉ាងច្បាស់ពីសញ្ញានៃភាពប្រេះឆាផ្ទៃក្នុងក្រុមបក្សកាន់អំណាចរបស់លោកប្រយុទ្ធបាត់ទៅហើយ។
ជាឧទាហរណ៍ស្រាប់ ព្រោះក្នុងចំណោមសំឡេង ២១២ ដែលជាសម្លេងមិនទុកចិត្តច្រើនបំផុតត្រូវបានបោះទៅលើរដ្ឋមន្ត្រីមហាផ្ទៃ លោកអានូពុង ផៅចីនដា (Anupong Paojinda) ហើយ ៦ សម្លេងនៃការដកនោះ គឺសមាជិកសភាមកពីគណបក្សផាឡាង ព្រាឆារាត (Palang Pracharath) ដែលជាបក្សកាន់អំណាចរបស់ខ្លួនតែម្តង។
អត្ថបទគួរអាន
ដោយឡែក អ្នកនាំពាក្យគណបក្សប្រជាធិបតេយ្យ លោករាមេស រតនាឆាវេង (Rames Ratanachaweng) បាននិយាយថា គណបក្សលោកមានការខកចិត្ត និងងឿងឆ្ងល់យ៉ាងខ្លាំងថា ហេតុអ្វីបានជាការបោះឆ្នោដកការទុកចិត្តមាន ៣ សម្លេង លើលោកចូរិន Jurin ដែលជាប្រធានបក្សកើតឡើង ដែលសម្លេងទាំងបីនោះ គឺមកពីសមាជិកគណបក្សឆាតថៃផាថាណា (Chartthaipattana) ដែលជាដៃគូបក្សសម្ព័ន្ធនឹងគ្នានោះ។
ទន្ទឹមគ្នានេះដែរ រដ្ឋមន្ត្រីធនធានធម្មជាតិ និងបរិស្ថាន លោកវ៉ារាវុត (Varawut Silpa-archa) បានទៅជួបសមាជិកសភាទាំងបីរូបនោះ ដែលដោយពួកគេបានឆ្លើយតបថា ខ្លួនមើលឃើញលើបញ្ហាមួយចំនួន ដូច្នេះ ទើបបានជាបោះឆ្នោតដកការទុកចិត្តលើលោកចូរិនតែម្តង។
លោក Varawut បាននិយាយថា សមាជិកសភាគ្រប់រូបមានសេរីភាពក្នុងការបញ្ចេញមតិរបស់ពួកគេ នៅពេលដែលពួកគេយល់ឃើញថា សមស្រប នោះពួកគេអាចបោះឆ្នោតបែបនេះក៏មិនទាស់ខុសអ្វីដែរ។
ទោះបីជាយ៉ាងណាក៏ដោយ លទ្ធផលបោះឆ្នោតរបស់សភាថៃ គឺផ្ទុយស្រឡះជាមួយនឹងលទ្ធផលនៃការបោះឆ្នោតស្របគ្នា ដែលរៀបចំដោយក្រុមបញ្ញាវន្តមកពីសាកលវិទ្យាល័យចំនួនបួន និងអង្គការពលរដ្ឋផ្សេងទៀត ដែលក្នុងចំណោមសមាជិកសាធារណៈចំនួនជាង ៥ សែននាក់ ដែលបានបោះឆ្នោតនៅក្នុងការស្ទង់មតិតាមអ៊ីនធឺណិត ជាលទ្ធផល ៩៧% នៃសមាជិកទាំងអស់បានបោះឆ្នោតដកសេចក្តីទុកចិត្តលើលោកប្រាយុទ្ធ ចាន់អូចា តែម្តង៕
