សម្តេចតេជោជឿជាក់ថា ប្រសិនបើអគ្គិសនីកម្ពុជាមិនរ៉ាប់រងការខាតនេះ ហើយដំឡើងថ្លៃអគ្គិសនីសម្រាប់អ្នកប្រើប្រាស់ វានឹងធ្វើឲ្យប៉ះពាល់ធ្ងន់ធ្ងរដល់វិស័យនានា ជាពិសេសវិស័យសណ្ឋាគារអាចនឹងដួលរលំ។
នាសន្និបាតបូកសរុបការងារប្រចាំឆមាសទី១ និងដាក់ទិសដៅអនុវត្តសម្រាប់ឆមាសទី២របស់ក្រសួងទេសចរណ៍នៅថ្ងៃទី១៤ កក្កដា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានលើកឡើងពីការកើនឡើងតម្លៃប្រេងឥន្ធនៈ និងធ្យូងថ្មនាពេលបច្ចុប្បន្នដោយសារវិបត្តិសង្គ្រាមនៅអ៊ុយក្រែន ក្នុងការធ្វើឲ្យប៉ះពាល់ដល់ការផលិតថាមពលអគ្គិសនីនៅកម្ពុជា។ ទោះបីកម្ពុជាប្រើប្រាស់ប្រេងឥន្ធនៈ និងធ្យូងថ្មតិចតួចក្នុងដំណើរការផលិតថាមពលអគ្គិសនី តែការកើនឡើងតម្លៃវត្ថុទាំងពីរនេះបានជំរុញថ្លៃដើមផលិតថាមពលអគ្គិសនីនៅកម្ពុជាមានការកើនឡើង។
ទោះបីតម្លៃថាមពលអគ្គិសនីនាំចូលនិងផលិតក្នុងស្រុកមានការកើនឡើងក្ដី ប៉ុន្ដែយើងសង្កេតឃើញថា អគ្គិសនីកម្ពុជាហាក់មិនបានដំឡើងថ្លៃអគ្គិសនីសម្រាប់អ្នកប្រើប្រាស់ចុងក្រោយនោះទេ។ កត្តានេះបានធ្វើឲ្យអគ្គិសនីកម្ពុជាត្រូវប្រឈមនឹងការខាតបង់ថវិការាប់លានឯណោះ។ បើតាមការវាយតម្លៃកន្លងមករបស់សម្តេចតេជោ ហ៊ុន សែន អគ្គិសនីកម្ពុជាអាចនឹងខាតបង់ថវិកាជាង ១០០លានដុល្លារនៅឆ្នាំ២០២២ នេះ។
អត្ថបទគួរអាន
សម្តេចតេជោ បានសង្កត់ធ្ងន់ថា ប្រសិនបើរាជរដ្ឋាភិបាលមិនរ៉ាប់រងលើការខាត ហើយដំឡើងថ្លៃអគ្គិសនីសម្រាប់អ្នកប្រើប្រាស់ចង់ ឬមិនចង់វានឹងធ្វើឲ្យប៉ះពាល់ដល់ជីវភាពរបស់ប្រជាពលរដ្ឋ និងវិស័យនានា ជាពិសេសវានឹងធ្វើវិស័យសណ្ឋាគារ ដែលជាវិស័យរងផលប៉ះពាល់ខ្លាំងជាងគេក្នុងអំឡុងវិបត្តិកូវីដ-១៩ អាចនឹងដួលរលំ។ ដូច្នេះការមិនដំឡើងថ្លៃអគ្គិសនីនេះ វាជាការជួយសម្រួលបន្ទុកការចំណាយរបស់ប្រជាពលរដ្ឋ និងវិស័យនានាបានមួយកម្រិតផងដែរ។
គួរបញ្ជាក់ថា ក្រោយពិភពលោក ក៏ដូចជាកម្ពុជាទទួលរងនូវការឆ្លងរាតត្បាតនៃជំងឺកូវីដ-១៩ វិស័យទេសចរណ៍អាចចាត់ទុកជាវិស័យរងផលប៉ះពាល់ខ្លាំងជាងគេបើធៀបនឹងវិស័យផ្សេងៗ ដ្បិតប្រទេសមួយចំនួនមានការរឹតបន្តឹងលើវិធានការកូវីដ-១៩ សម្រាប់អ្នកដំណើរ និងបិទការហោះហើរជាដើម។ ប៉ុន្តែ បច្ចុប្បន្នប្រទេសក្នុងតំបន់ ពិសេសនៅតំបន់អាស៊ានមានការបន្ទូរបន្ថយ និងលើកលែងច្រើនលើបញ្ហានេះ ដែលធ្វើឲ្យវិស័យទេសចរណ៍ហាក់មានក្តីសង្ឃឹមឡើងវិញក្នុងការស្តារស្ថានការណ៍។
បើតាមការគូសបញ្ជាក់របស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ នៅឆ្នាំ២០២២នេះ វិស័យទេសចរណ៍សកលលោករំពឹងថា នឹងមានភាពល្អប្រសើរជាងកាលពីឆ្នាំ២០២០ និង២០២១ ដោយសារការចាប់ផ្ដើមកម្រើកឡើងវិញនៃចរន្តនៃការធ្វើដំណើររបស់ភ្ញៀវទេសចរអន្តរជាតិ ដែលទទួលបានឥទ្ឋិពលវិជ្ជមានពីការបន្ធូរបន្ថយការរឹតត្បិត និងការដករបាំងដែលជាលក្ខខណ្ឌនានាលើការធ្វើដំណើរជាអន្តរជាតិរបស់ប្រទេសជាច្រើន។
ប៉ុន្តែបើតាមការព្យាកររបស់អង្គការទេសចរណ៍ពិភពលោក (UNWTO) ចំនួនទេសចរអន្តរជាតិក្នុងឆ្នាំ២០២២នេះ អាចនឹងថយចុះចន្លោះពី៣០%ទៅ៤៥% បើធៀបនឹងឆ្នាំ២០១៩ ដោយសារនៅបន្តទទួលរងការគំរាមកំហែង ពីការវិវត្តជាបន្តបន្ទាប់នៃមេរោគកូវីដ ១៩ បំប្លែងថ្មី និងជំងឺឆ្លងផ្សេងៗ វិបត្តិនៅអ៊ុយក្រែនដែលបានជះឥទ្ឋិពលធ្វើឱ្យមានការកើនឡើងនូវអតិផរណា ការកើនឡើងថ្លៃប្រេង និងការថមថយអំណាចទិញរបស់ភ្ញៀវល្បឿន ខុសៗគ្នានៃការបន្ធូរបន្ថយការរឹតត្បិតលើការធ្វើដំណើរ និងរបាំងនានារបស់ប្រទេសនីមួយៗ ជាដើម?
