អគ្គនាយកក្រុមហ៊ុន SOMA ប្រាប់ពីយុទ្ធសាស្រ្តពីរដើម្បីស្គាល់មនុស្សឲ្យបានច្បាស់

ការស្គាល់មនុស្សឲ្យបានច្បាស់លាស់នៅក្នុងក្រុមការងារ គឺជារឿងចាំបាច់សម្រាប់ប្រធានក្រុមហ៊ុន ពីព្រោះ ពួកគេនឹងក្លាយជាអ្នកធ្វើឲ្យក្រុមហ៊ុនរីកចម្រើន ឬដួលរលំបះជើង។

លោក សុខ ពុទ្ធីវុធ អគ្គនាយកក្រុមហ៊ុន SOMA Group។

លោក សុខ ពុទ្ធីវុធ អគ្គនាយកក្រុមហ៊ុន សោម៉ា គ្រុប (SOMA Group) និងជាប្រធានសហព័ន្ធស្រូវអង្ករកម្ពុជា បានបង្ហើបគន្លឹះជាយុទ្ធសាស្រ្តចំនួនពីរចំណុច ដើម្បីស្គាល់មនុស្សឲ្យបានច្បាស់ ដើម្បីសម្រិតសម្រាំងយកមនុស្សដែលមានសមត្ថភាព មានការតស៊ូ និងមានភាពស្មោះត្រង់។

ផ្តល់លុយនិងអំណាច ពីព្រោះ ការផ្តល់លុយ សិទ្ធិអំណាច ឲ្យគាត់មានសិទ្ធិសម្រេចចិត្ត ការធ្វើការរបស់គាត់នឹងចេញមកហើយ ថា តើមនុស្សគាត់របៀបយ៉ាងម៉េច? ពេលគាត់ឡើងធ្វើកិច្ចការហ្នឹង តើពីមុនគាត់យ៉ាងម៉េច ពេលគាត់ឡើងធ្វើ គាត់ធ្វើយ៉ាងម៉េចចំពោះមនុស្សនៅជុំវិញ? តាមពិត វាជាហានិភ័យមួយដែរ បើសិនគាត់បង្កើតកំហុស ប៉ុន្តែ ក្នុងនាមជាអ្នកដឹកនាំ យើងគួរតែផ្តល់លុយ និងអំណាចឲ្យគាត់ធ្វើការសម្រេចចិត្ត។
ដាក់សម្ពាធឲ្យគាត់កាន់តែខ្លាំង នោះនឹងចេញមកហើយ ថា ជាមនុស្សបែបណា? ការរងសម្ពាធលើគាត់ គាត់នឹងបញ្ចេញចរិតមកហើយ។ នៅសាលាទាហាន គេជាន់យើងឲ្យសំប៉ែតដូចកំប៉ុងអ៊ីចឹង ហើយបានគេឲ្យយើងលូតមកវិញ។ ពេលលូតមកវិញ គេដឹងថា នរណាគេខំធ្វើការ នរណាគេខ្ជិល នរណាមេរអ៊ូ នោះចរិតនឹងចេញមកទាំងអស់។ ផ្លែការ៉ុត វាមានភាពរឹង ប៉ុន្តែ ពេលត្រូវទឹកក្តៅ វាទន់។ កាហ្វេគ្រាប់វារឹង ពេលត្រូវទឹកក្តៅ វាប្រែរូបរាង។ ពងទា ទន់ខាងក្នុង ពេលត្រូវទឹកក្តៅ វារឹង។

សម្រាប់ លោក សុខ ពុទ្ធីវុធ លោកចូលចិត្តប្រើវិធីឲ្យលុយ និងអំណាច ជាជាងការដាក់សម្ពាធ។ លោកបញ្ជាក់យ៉ាងដូច្នេះថា៖ «ការដាក់សម្ពាធ ពេលខ្លះក៏វេទនាភ្នែកដែរ ម៉្លោះហើយអ្វីដែលខ្ញុំចូលចិត្តធ្វើ គឺផ្តល់សិទ្ធិអំណាច និងលុយ ដើម្បីឲ្យគាត់ធ្វើ ដោយគ្រាន់តែយកការសម្រេចចិត្តរបស់គាត់មកវិភាគ ដើម្បីមកវាយតម្លៃគាត់ ថា តើការគិតរបស់គាត់ត្រឹមត្រូវដែរឬអត់? ហើយមនុស្សភាគច្រើននៅជុំវិញគាត់ ក៏អាចវាយតម្លៃគាត់បានដែរ»៕