ប្រភពព័ត៌មាន បានឲ្យដឹងថា ផលិតកម្មរបស់រោងចក្រផលិតរថយន្ដនេះ បានចាប់ផ្ដើម កាលពីខែមីនា កន្លងទៅ ដោយមានគោលដៅ នឹងផលិតរថយន្ដម៉ាក Subaru ម៉ូដែល Foresters ឲ្យបានជាង ៦ ពាន់គ្រឿងសម្រាប់ប្រតិបត្តិការនៅឆ្នាំដំបូងរបស់ខ្លួន។
រោងចក្រផលិតរថយន្ដ Subaru នៅប្រទេសថៃនេះ គឺជាការវិនិយោគរួមគ្នា រវាងក្រុមហ៊ុន Subaru Corporation និងក្រុមហ៊ុនចុះបញ្ជីនៅហុងកុង Tan Chong International ដែលក្រុមហ៊ុននេះ កាន់កាប់ភាគហ៊ុន ៧៤,៩%។
ក្នុងការវិនិយោគដំបូងរោងចក្រនេះ ត្រូវបានចំណាយទុនប្រមាណ ១៥៦,៣ លានដុល្លារអាមេរិក និងគ្រោងផលិតរថយន្ដ ឲ្យបាន១ម៉ឺនគ្រឿងចាប់ពីឆ្នាំ២០២០ តទៅ។
អត្ថបទទាក់ទង!
បើតាមអ្នកគ្រប់គ្រងជាន់ខ្ពស់ របស់ក្រុមហ៊ុន Subaru បានបញ្ជាក់ដែរថា នៅពេលដែលរោងចក្រនេះ បើកដំណើរការពេញលេញរូបរាង នោះវានឹងមានសមត្ថភាពផលិតរថយន្ដទាំង៤ ម៉ូដែល របស់ក្រុមហ៊ុន Subaru បានរហូតដល់ ១០ម៉ឺន គ្រឿងឯណោះក្នុងមួយឆ្នាំ។
ត្រូវបានស្រង់សម្ដី ដោយសារព័ត៌មានបរទេស លោក Glenn Tan អនុប្រធាន និងជានាយកគ្រប់គ្រងក្រុមហ៊ុន Tan Chong International បានបញ្ជាក់ថា យុទ្ធសាស្ត្ររយៈពេលវែងនេះ នឹងផ្ដល់ឲ្យក្រុមហ៊ុន អាចគ្រប់គ្រងខ្សែច្រវាក់ផ្គត់ផ្គង់បានកាន់តែប្រសើរ ពង្រីកវិសាលភាពផលិតផលកាន់តែធំ និងការផ្គត់ផ្គង់ក្នុងតំបន់ប្រសើរឡើង ដោយកាត់បន្ថយការពឹងផ្អែកតែការផ្គត់ផ្គង់មកពីជប៉ុនតែមួយ។
លោក Tan បានពន្យល់ទៀតថា សេដ្ឋកិច្ចនៅប្រទេសតំបន់អាស៊ីអាគ្នេយ៍កំពុងមានកំណើនឆ្ពោះទៅមុខ ដែលនេះជាឱកាស សម្រាប់ក្រុមហ៊ុនលោក ចូលមកដើម្បីក្ដោបក្ដាប់កំណើនទីផ្សារអតិថិជនថ្នាក់កណ្ដាល ស្របពេលដែលប្រជាជននៅក្នុងប្រទេសអាស៊ីអាគ្នេយ៍ កំពុងមាននិន្នាការប្តូរពីការប្រើប្រាស់ម៉ូតូ មកប្រើប្រាស់ឡានកាន់តែច្រើនឡើង។
នាយកក្រុមហ៊ុនផលិតរថយន្ដ Subaru នៅថៃ រូបនេះ បានបញ្ជាក់ទៀតថា អ្នកទិញរថយន្ដ នៅតំបន់អាស៊ីអាគ្នេយ៍ គឺនិយមចូលចិត្តទិញរថយន្ដប្រភេទ SUVs ដែលវាជាចំណែកទីផ្សារដ៏ល្អមួយសម្រាប់រថយន្ដ Subaru ម៉ូដែល Forester ទោះបីជា ចំណែកទីផ្សាររបស់ Subaru សម្រាប់ការលក់រថយន្ដ ប្រភេទ SUVs នៅអាស៊ីអាគ្នេយ៍នេះ មានតែ៣,៥%ក៏ដោយ៕
None
