យ៉ាងណាមិញ នៅឆ្នាំ២០២៣ អគ្គនាយកដ្ឋានពន្ធដារ នឹងបង្កើនការប្រមូលចំណូលកាន់តែច្រើនបន្ថែមទៀតផងដែរ។ នេះបើតាមការអះអាងរបស់ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ។
នៅក្នុងវេទិកាពន្ធដារ-សភាពាណិជ្ជកម្មអឺរ៉ុប ឆ្នាំ២០២២ នាថ្ងៃទី២៦ ខែតុលា ឆ្នាំ២០២២ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ បានគូសបញ្ជាក់ថា ប្រព័ន្ធពន្ធដារកម្ពុជាបច្ចុប្បន្ន គឺដើរទាន់នឹងរដ្ឋបាលសារពើពន្ធនៃបណ្ដាប្រទេសនានាក្នុងតំបន់ជាអាទិដូចជា សិង្ហបុរី ម៉ាឡេស៊ី និងថៃជាដើម។ ឯកឧត្តមបន្ថែមថា និរន្តភាពចំណូលពន្ធកម្ពុជា បានដោះស្រាយតាមរយៈលទ្ធផលចំណូលពន្ធលើសផែនការជាបន្តបន្ទាប់ចាប់តាំងពីឆ្នាំ២០១២ រហូតមកដល់បច្ចុប្បន្ន។ អតិរេក ក្នុងការប្រមូលចំណូលពន្ធមិនមែនមកពីការបន្ថែមបន្ទុកពន្ធទៅលើអ្នកជាប់ពន្ធនោះទេ ប៉ុន្តែវាមកពីការខិតខំប្រឹងប្រែងឥតឈប់ឈរក្នុងការអនុវត្តកំណែទម្រង់និងទំនើបកម្មពន្ធដារ ដោយមានអភិបាលកិច្ចល្អ គឺជាគោលការណ៍ស្នូលនៃកំណែទម្រង់ និងទំនើបកម្មនៃអគ្គនាយកដ្ឋានពន្ធដារ ដើម្បីឈានទៅបង្កើតប្រព័ន្ធពន្ធដារដ៏រឹងមាំ បង្កភាពងាយស្រួលដល់អ្នកជាប់ពន្ធក្នុងការបង់ពន្ធ ប៉ុន្តែពិបាកក្នុងការគេចវេះពន្ធផងដែរ។
អត្ថបទគួរអាន
បើតាម ឯកឧត្តម គង់ វិបុល គិតត្រឹមថ្ងៃទី ២៥ នៃខែតុលា ឆ្នាំ២០២២នេះ លទ្ធផលនៃការគ្រប់គ្រងប្រមូលចំណូលពន្ធ និងអាករគ្រប់ប្រភេទមានចំនួនប្រមាណជាង ២ពាន់៩រយលានដុល្លារ ពោលគឺសម្រេចបានចំនួន ១០៤% នៃផែនការច្បាប់ដែលបានកំណត់។
គួរបញ្ជាក់ដែរថា អគ្គនាយកដ្ឋានពន្ធដារនៅតែបន្តកំណែទម្រង់ថែមទៀត ទន្ទឹមនឹងផែនការកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ ២០២៣ គ្រោងនឹងកើនឡើង ធៀបនឹងឆ្នាំ២០២២ ខណៈនៅមានការបន្តផ្តល់ជូននូវការលើកទឹកចិត្តផ្នែកពន្ធដារសម្រាប់វិស័យមួយចំនួនផងដែរ។ សូមបញ្ជាក់ថា កាលពីឆ្នាំ២០២១ អគ្គនាយកដ្ឋានពន្ធដារបានប្រមូលចំណូលពន្ធអាករសរុបក្នុងចំនួនប្រមាណជាង ២ពាន់៧រយលានដុល្លារ កើនលើសផែនការជាង២៤%៕
