រដ្ឋមន្ត្រីក្រសួងដឹកជញ្ជូនរបស់ថៃលោក សូរិយា ជុងរុងរៀនគីត (Suriya Jungrungreangkit) បាននិយាយថា រដ្ឋាភិបាលគ្រោងថៃនឹងសាងសង់លំនៅឋានតម្លៃទាបចំនួន៣០ម៉ឺនខ្នងសម្រាប់ប្រជាជនក្រីក្រនៅខែក្រោយនេះ ខណៈបច្ចុប្បន្នមន្ត្រីជំនាញកំពុងវាយតម្លៃពីផលប៉ះពាល់បរិស្ថាននៅកន្លែងគម្រោងនោះ។
គម្រោងនេះស្ថិតនៅជិតបណ្តាញផ្លូវដែកគ្រប់គ្រងដោយក្រុមហ៊ុនរថភ្លើងរដ្ឋរបស់ថៃ ដើម្បីជួយបង្កើនប្រសិទ្ធភាព និងតម្លៃដីនៅតំបន់នោះ ហើយវាក៏ជួយដល់ប្រជាជនដែលមានប្រាក់ចំណូលទាបឱ្យមានលំនៅឋានសមរម្យ ខណៈក្រុមហ៊ុនអភិវឌ្ឍន៍ត្រូវការថវិកាប្រមាណ១៧៨លានដុល្លារ ដើម្បីសាងសង់ដំណាក់កាលទី១សម្រាប់ខុនដូ និងផ្ទះប្រមាណ៥ពាន់ខ្នង។
ដើម្បីមានសិទ្ធិគ្រប់គ្រងលំនៅឋាននេះ ប្រជាជនថៃត្រូវមានប្រាក់ខែក្រោម៥ម៉ឺនបាតប្រហែលជិត១៥០០ដុល្លារ និងត្រូវបង់ថ្លៃជួលប្រចាំខែប្រហែល១១៨ដុល្លារដោយមិនចាំបាច់បង់ប្រាក់កក់មុនអ្វីឡើយ ហើយពួកគេអាចរស់នៅក្នុងលំនៅឋាននេះរហូតដល់៩៩ឆ្នាំ។ បន្ទាប់ពីរស់នៅគ្រប់ពេលកំណត់ ពួកគេត្រូវប្រគល់ផ្ទះនេះទៅឱ្យរដ្ឋាភិបាលវិញដើម្បីផ្តល់ជូនជនជាតិថៃផ្សេងទៀត។
ប៉ុន្តែអ្នកជំនាញយល់ឃើញថា គម្រោងនេះអាចបន្ថែមសម្ពាធលើទីផ្សារលំនៅឋានរបស់ថៃ ព្រោះវានឹងបន្ថែមការផ្គត់ផ្គង់ដល់ទីផ្សារ ដែលកំពុងជួបភាពរអាក់រអួលនៅ២ឆ្នាំកន្លងមកនេះកក៏ដូចជាការផ្គត់ផ្គង់លើសតម្រូវការ និងការធ្លាក់ចុះតម្រូវការ។
លោក សូផុន ផនឆូកឆៃ (Sopon Pornchokchai) ប្រធានទីភ្នាក់ងារកិច្ចការអចលនទ្រព្យរបស់ថៃបាននិយាយថា ចំនួនគម្រោងខុនដូថ្មីបានធ្លាក់ចុះ១៩% មកនៅត្រឹម៣៧៥គម្រោងនៅឆ្នាំ២០២៤ ពោលគឺធ្លាក់ចុះពី៤៦២គម្រោងក្នុងឆ្នាំ២០២៣ ដោយសារតែតម្រូវការចុះខ្សោយ។ លោកបានបន្ថែមថា បើនិយាយអំពីការផ្គត់ផ្គង់វិញ ចំនួនផ្ទះ និងខុនដូដែលលក់មិនចេញនៅដើមខែនេះមានចំនួនជាង២៣ម៉ឺន៤ពាន់៤៧៨យូនីត ពោលគឺច្រើនជាងកាលពីដំណាច់ឆ្នាំ២០២៤ ដោយពេលនោះផ្ទះមិនទាន់លក់មានចំនួនជាង២៣ម៉ឹន៣ពាន់យូនីត៕
អត្ថបទ៖ សុខ មង្គល
