ក្រោយមានការរកឃើញកូវីដបំប្លែងថ្មី អូមីក្រុង នៅអាហ្វ្រិកខាងត្បូង ប្រទេសថៃនៅថ្ងៃទី០១ ខែធ្នូ បានសម្រេចបិទជើងហោះហើរពីប្រទេសតំបន់អាហ្វ្រិកចំនួន៨ប្រទេសរួចហើយដែរ ដើម្បីទប់ស្កាត់កូវីដ១៩បំប្លែងថ្មី។ ក៏ប៉ុន្ដែ អាជ្ញាធរថៃ នៅតែមានក្ដីបារម្ភ ពីការឆ្លងមេរោគបំប្លែងថ្មីនេះ ចូលក្នុងប្រទេសរបស់ខ្លួន ដ្បិតថា គិតតាំងពីថ្ងៃទី១៥ ខែវិច្ឆិកាមក យ៉ាងហោចណាស់មានអ្នកដំណើរពីអាហ្វ្រិកប្រមាណជិត៨០០នាក់បានធ្វើដំណើរចូលមកក្នុងប្រទេសថៃរួចទៅហើយ។
អ្នកនាំពាក្យមជ្ឈមណ្ឌលគ្រប់គ្រងស្ថានការណ៍កូវីដ ១៩ បាននិយាយថា ចាប់ពីថ្ងៃទី ១៥ខែវិច្ឆិកា រហូតដល់ថ្ងៃទី ២៧វិច្ឆិកា ក្នុងចំណោមអ្នកដំណើរពីតំបន់អាហ្វ្រិកជិត៨០០នាក់បានចូលមកក្នុងប្រទេសថៃនោះ យ៉ាងហោចណាស់មាន ៣៣៣នាក់ បានធ្វើដំណើរមកពីប្រទេសចំនួន ៨ នៅតំបន់អាហ្វ្រិកខាងត្បូងដែលជាកន្លែងកំពុងមានការឆ្លងរាលដាលខ្លាំងនៃមេរោគកូវីដ១៩បំប្លែងថ្មី អូមីក្រុង។ ក្នុងនោះដែរ មានអ្នកដំណើរចំនួន ២៣ នាក់ក្នុងចំណោមពួកគេ ត្រូវបានអាជ្ញាធរថៃទាក់ទងតាមរយៈការផ្ញើសារតាម ទូរស័ព្ទដៃ និងបានស្នើសុំធ្វើតេស្ត PCR រកមេរោគ អូមីក្រុង។ សម្រាប់អ្នកដំណើរណាមួយ ដែលបដិសេធមិនគោរពតាមលក្ខខណ្ឌនេះ អាចប្រឈមនឹងការចាត់វិធានការផ្លូវច្បាប់ ចំពោះការបំពានច្បាប់គ្រប់គ្រងជំងឺឆ្លងរបស់ប្រទេសថៃ។
ទន្ទឹមនេះ អ្នកនាំពាក្យមជ្ឈមណ្ឌលគ្រប់គ្រងស្ថានការណ៍កូវីដ ១៩ បានឱ្យដឹងថា រហូតមកទល់ពេលនេះ នៅមិនទាន់ មានភស្តុតាងណាមួយ បញ្ជាក់ពីសមត្ថភាពចម្លងលឿនជាងមុននៃមេរោគបំប្លែងថ្មីនេះទេ ។ មានតែការចាក់វ៉ាក់សាំងការពារជំងឺកូវីដ-១៩ បានពេញលេញទេ ដែលនៅតែជាខែលការពារដ៏ល្អបំផុតប្រឆាំងនឹងការឆ្លងជំងឺនេះ។ សូមបញ្ជាក់ថា រហូតមកដល់ពេលនេះ ពលរដ្ឋថៃដែលបានចាក់វ៉ាក់សាំងចំនួន ២ដូស មាន ៥៩% នៃប្រជាជនសរុប។ នេះបើយោងតាមការចងក្រងដោយសារព័ត៌មានរ៉យទ័រ៕
អត្ថបទ៖ ស៊ើង និមល់
