បញ្ហានេះ បានជំរុញឲ្យធនាគារកណ្ដាលថៃ បានលើកឡើងពីការព្រួយបារម្ភកាន់តែខ្លាំងឡើង ដោយអះអាងថា ការបិទអាជីវកម្ម និងការបញ្ឈប់ការងារដោយសារការរីករាលដាលនៃជំងឺកូវីដ -១៩ ដែលកំពុងបង្កើនហានិភ័យកាន់តែខ្ពស់ដល់ការដាំក្បាលចុះនៃសេដ្ឋកិច្ចថៃនៅឆ្នាំនេះ។
នៅសប្ដាហ៍នេះធនាគារកណ្តាលបានចេញរបាយការណ៍ដែលបានកែសម្រួលនៅក្នុងកិច្ចប្រជុំគណៈកម្មាធិការគោលនយោបាយរូបិយវត្ថុ (MPC) កាលពីសប្តាហ៍មុនដោយក្នុងរបាយការណ៍នោះ បានបង្ហាញពីស្ថានភាពហិរញ្ញវត្ថុរបស់អាជីវកម្ម ជាពិសេសអ្នកដែលនៅក្នុងវិស័យសេវាកម្ម នឹងកាន់តែមានភាពងាយរងគ្រោះ និងទីផ្សារការងារកាន់តែមានភាពផុយស្រួយ ដែលអាចនាំឱ្យមានការបិទអាជីវកម្ម និងការបញ្ឈប់ការងារជាដើម។
ជាក់ស្ដែងទេសាភិបាលធនាគារកណ្តាលថៃ បានអះអាងនៅក្នុងសន្និសីទសារព័ត៌មានមួយថា ទីផ្សារការងារបានធ្លាក់ចុះ ពោលគឺភាពគ្មានការងារធ្វើមានការកើនឡើង និងចំនួនម៉ោងធ្វើការក៏ត្រូវបានកាត់បន្ថយផងដែរ ។
ចំនួនអ្នកគ្មានការងារធ្វើ និង អ្នកដែលមានការងារធ្វើតិចម៉ោង បានកើនដល់៣លាននាក់ហើយនៅក្នុងប្រទេសថៃ គិតត្រឹមត្រីមាសទី២ឆ្នាំនេះ កើនឡើងពីប្រមាណ ១លាននាក់ដែលធ្លាប់មានកាលពីមុនពេលផ្ទុះរាលដាលកូវីដ-១៩។
នៅក្នុងអំឡុងពេលផ្ទុះរាលដាលកូវីដ-១៩ មានកម្មករប្រមាណ១លាន៦សែននាក់ បានបាត់បង់ការងារធ្វើ ហើយបានត្រឡប់ទៅស្រុកកំណើតរបស់ពួកគេវិញ ហើយពួកគេបានផ្លាស់ប្តូរការងារពីវិស័យសេវាកម្មទៅធ្វើការក្នុងវិស័យកសិកម្មដោយទទួលបានប្រាក់ចំណូលទាបជាងមុន។
អត្ថបទគួរអាន
ជាមួយគ្នានេះដែរ ចំនួនអ្នកគ្មានការងារធ្វើរយៈពេលជាង១ឆ្នាំ គឺបានកើនដល់ទៅប្រមាណ ១៧ម៉ឺននាក់ នៅក្នុងត្រីមាសទី២នៅឆ្នាំនេះ ពោលគឺបានកើនឡើងដល់ទៅ ៣ដងធៀបនឹងពេលមិនទាន់មានផ្ទុះរាលដាលកូវីដ-១៩។
យ៉ាងណាមិញ និស្សិតដែលបានបញ្ចប់ការសិក្សារពី មហាវិទ្យាល័យក៏ប្រឈមហានិភ័យខ្ពស់ផងដែរ ពោលចំនួននិស្សិតបញ្ចប់ការសិក្សានៅមហាវិទ្យាល័យក្នុងប្រទេសថៃដែលគ្មានការងារធ្វើបានកើនឡើងរហូតដល់ ២ម៉ឺន ៩ពាន់ហើយ ។ ដូច្នេះហើយ សេដ្ឋកិច្ចថៃ នឹងមានល្បឿនយឺតជាងមុនដោយសារវិធានការណ៍ទប់ទល់នឹងជំងឺកូវីដ -១៩ ដែលអាចប៉ះពាល់ដល់សកម្មភាពសេដ្ឋកិច្ច និងតម្រូវការប្រើប្រាស់ក្នុងស្រុក។
សូមជម្រាបដែរថា ធនាគារជាតិរបស់ថៃថ្មីៗនេះ បានទម្លាក់ការព្យាករកំណើនសេដ្ឋកិច្ចរបស់ប្រទេសថៃសម្រាប់ឆ្នាំ២០២១នេះ ពី ១,៨% មកនៅត្រឹមចំនួនតិចតួចបំផុតត្រឹម ០,៧% ប៉ុណ្ណោះ។ បន្ថែមពីនេះ ធនាគារជាតិថៃ ថែមទាំងបានទម្លាក់ការព្យាករកំណើនសេដ្ឋកិច្ចថៃសម្រាប់ឆ្នាំ២០២២ ពី ៣,៩% មកត្រឹម ៣,៧% ផងដែរ ដោយសារតែរងផលប៉ះពាល់ពីវិបត្តិឆ្លងរីករាលដាលកូវីដ១៩ ដែលបាននិងកំពុងអូសបន្លាយអស់រយៈពេលជាច្រើនខែមកហើយ៕
អត្ថបទ៖ ស៊ើង និមល់
None
