លោក ត្រាំ រិះគន់ក្រុមហ៊ុន Chevron និង Exxon ជុំវិញការកេងចំណេញហួសហេតុពីវិបត្តិប្រេងឡើងថ្លៃ

សារព័ត៌មាន CNBC បានរាយការណ៍ថា ប្រធានាធិបតីសហរដ្ឋអាម៉េរិក លោក ដូណាល់ ត្រាំ បានរិះគន់ និងបង្ហាញក្តីកង្វល់យ៉ាងខ្លាំងចំពោះក្រុមហ៊ុនប្រេងខ្នាតយក្សទាំងពីររបស់អាម៉េរិករួមមានក្រុមហ៊ុន Exxon និង Chevron ថា កំពុងកើបប្រាក់ចំណេញយ៉ាងសន្ធឹកសន្ធាប់ពីវិបត្តិតម្លៃប្រេងក្នុងអំឡុងពេលមានជម្លោះប្រដាប់អាវុធនៅអ៊ីរ៉ង់ ដោយលោកអះអាងថា ក្រុមហ៊ុនប្រេងទាំងពីរនេះកំពុងប្រមូលផលចំណេញហួសហេតុចេញពីវិបត្តិសង្គ្រាម។ លោក ត្រាំ បានសង្កត់ធ្ងន់ថា លោកមិនចូលចិត្តទង្វើចង់បានប្រាក់ចំណូលហួសហេតុរបស់ក្រុមហ៊ុនទាំងពីរនេះទាំងដែលប្រទេសជាតិ កំពុងប្រឈមមុខនឹងកង្វះខាត និងផលប៉ះពាល់សេដ្ឋកិច្ចនោះទេ។
កាលពីថ្ងៃសុក្រ សប្តាហ៍មុន ក្រុមហ៊ុន Exxon និង Chevron បានចេញរបាយការណ៍ហិរញ្ញវត្ថុប្រចាំត្រីមាសទីពីរ ដោយបង្ហាញពីប្រាក់ចំណេញកើនឡើងយ៉ាងគំហុក។ តាមទិន្នន័យផ្លូវការ ប្រាក់ចំណេញរបស់ក្រុមហ៊ុន Chevron បានកើនឡើងជិត៤០០% រហូតដល់១២ពាន់លានដុល្លារ បើធៀបនឹង២,៥ពាន់លានដុល្លារក្នុងរយៈពេលដូចគ្នាកាលពីឆ្នាំមុន។ រីឯប្រាក់ចំណេញរបស់ក្រុមហ៊ុន Exxon វិញបានកើនឡើងទ្វេដងរហូតដល់ជាង១៤ពាន់លានដុល្លារ បើធៀបនឹងប្រាក់ចំណេញជាង៧ពាន់លានដុល្លារកាលពីឆ្នាំមុន។ ស្ថិតក្នុងស្ថានភាពនេះលោក ដូណាល់ ត្រាំ បានលើកឡើងថា ក្រុមហ៊ុនទាំងពីរគួរតែបង្វែរប្រាក់ចំណេញមួយផ្នែក ដើម្បីចូលរួមចំណែកទប់ស្កាត់ និងសម្រួលដល់តម្លៃប្រេងសាំងលក់រាយនៅក្នុងស្រុក។
គួររំលឹកថា មុនពេលសង្គ្រាមនៅអ៊ីរ៉ង់ ផ្ទុះឡើង តម្លៃប្រេងសាំងលក់រាយនៅសហរដ្ឋអាម៉េរិកមានតម្លៃត្រឹមតែជិត៣ដុល្លារប៉ុណ្ណោះក្នុងមួយហ្គាឡុងប៉ុណ្ណោះ ប៉ុន្តែបច្ចុប្បន្នបានហក់ឡើងដល់ជាង៤ដុល្លារមានការកើនឡើងប្រមាណ៤០%៕

ដោយៈ សរ សុជាតិ