ថ្លែងទៅកាន់សភាជាតិអង់គ្លេសតាមប្រព័ន្ធវីដេអូពីការិយាល័យក្នុងទីក្រុងកៀវ ប្រធានាធិបតីអ៊ុយក្រែន លោក Volodymyr Zelenskyy និយាយថា៖ «យើងនឹងមិនចុះចាញ់ ហើយយើងនឹងមិនចុះចាញ់ជាដាច់ខាត យើងនឹងប្រយុទ្ធរហូតដល់ទីបញ្ចប់មិនថា នៅលើសមុទ្រ ឬលើអាកាសទេ។ យើងនឹងបន្តតស៊ូដើម្បីទឹកដីរបស់យើង ទោះក្នុងតម្លៃណាក៏ដោយ»។
ទន្ទឹមនេះប្រធានាធិបតីអ៊ុយក្រែនបានថ្លែងអំណរគុណដល់ចក្រភពអង់គ្លេសសម្រាប់ការគាំទ្ររបស់ខ្លួន ដែលរួមមានជំនួយមនុស្សធម៌ និងសព្វាវុធ។ លោក Zelenskyy បានជំរុញឲ្យចក្រភពអង់គ្លេសបង្កើនទណ្ឌកម្មលើរុស្ស៊ី ហើយទទួលស្គាល់រុស្ស៊ីជា ប្រទេសភេរវករ និងធ្វើយ៉ាងណាជួយរក្សាដែនអាកាសអ៊ុយក្រែនឲ្យមានសុវត្ថិភាព។
បន្ថែមពីលើនេះ លោក Zelenskyy បានអង្វរកដល់មេដឹកនាំ ណាតូ ឱ្យព្រមដាក់តំបន់គ្មានការហោះហើរពីលើអ៊ុយក្រែន។ ប៉ុន្តែ ប្រការនេះត្រូវបានណាតូជំទាស់ ដោយនិយាយថា វាអាចនាំឱ្យមានការប្រឈមមុខដាក់គ្នាខាងយោធាដោយផ្ទាល់ជាមួយរុស្ស៊ី និងលោកខាងលិច។
ពេលនិយាយដល់ការខូចខាត និង ការស្លាប់របស់ជនស៊ីវិល ក្រោមស្នាដៃទម្លាក់គ្រាប់បែករបស់រុស្ស៊ីក្នុងអំឡុងពេលសង្គ្រាមជិតពីរសប្តាហ៍មកនេះ លោក Zelenskyy បាននិយាយថា អ៊ុយក្រែន មិនមែនជាអ្នកផ្តើមសង្គ្រាម ហើយក៏មិនចង់បានសង្គ្រាមដែរ។
អត្ថបទគួរអាន
គួរជម្រាបថា សារវីដេអូនានាដ៏មានឥទ្ធិពលរបស់លោក Zelenskyy ទាំងចំពោះប្រជាជនអ៊ុយក្រែន និងទៅកាន់ពិភពលោក បានដើរតួយ៉ាងសំខាន់ក្នុងការប្រមូលផ្តុំការគាំទ្រសម្រាប់ការការពារអ៊ុយក្រែនប្រឆាំងនឹងការឈ្លានពាន។
សុន្ទរកថារបស់លោក Zelenskyy ទៅកាន់អ្នកនយោបាយចក្រភពអង់គ្លេសនៅថ្ងៃអង្គារទី៨ គឺជាលើកទី២ហើយ បន្ទាប់ពីសុន្ទរកថាមួយកាលពីសប្តាហ៍មុន ទៅកាន់សមាជិកសភាអាមេរិករាប់រយនាក់ដែលក្នុងនោះ Zelenskyy បានជំរុញឱ្យសហរដ្ឋអាមេរិកជួយផ្តល់យន្តហោះចម្បាំងបន្ថែមទៀតសម្រាប់យោធាអ៊ុយក្រែន និងកាត់ផ្តាច់ការនាំចូលប្រេងពីរុស្ស៊ី។ ក្រោយគេសង្កេតឃើញថាប្រធានាធិបតី ចូបៃឌិន ពិតជាបានធ្វើតាមការស្នើសុំពិតមែន ដោយបានបើកដៃឲ្យណាតូ ផ្តល់យន្តហោះចម្បាំងដល់អ៊ុយក្រែន ព្រមទាំងការបិទការនាំចូលប្រេងពីរុស្ស៊ីថែមទៀត។
សូមបញ្ជាក់ថា នេះគឺជាសុន្ទរកថា លើកទីមួយក្នុងប្រវត្តិសាស្ត្រនៃសភាជាតិអង់គ្លេសហើយ ដែលបានអនុញ្ញាតឲ្យមេដឹកនាំបរទេសថ្លែងទៅកាន់សភាជាតិទាំងមូលបែបនេះ៕
None
