វេជ្ជបណ្ឌិត អាន់តូនី ហ្វោស៊ី (Anthony Fauci) អ្នកជំនាញកម្រិតខ្ពស់ផ្នែកជំងឺឆ្លងរបស់សហរដ្ឋអាមេរិក បានអះអាងនៅក្នុងសន្និសីទសារព័ត៌មានរបស់សេតវិមាននៅថ្ងៃអង្គារទី ២៤សីហាថា ការអនុម័តរបស់រដ្ឋបាលចំណីអាហារ និង ឪសថ អាមេរិក ឲ្យប្រើប្រាស់ពេញលេញនូវវ៉ាក់សាំង Pfizer ក្នុងសហរដ្ឋអាមេរិកនឹងជំរុញឲ្យពលរដ្ឋកាន់តែច្រើនមកទទួលយកវ៉ាក់សាំងបង្ការកូវីដ១៩។ ប្រការនេះនឹងផ្តល់ភាពងាយស្រួលឲ្យគេអាចគ្រប់គ្រងស្ថានភាពកូវីដ១៩បានកាន់តែងាយស្រួលនិង ឆាប់រហ័ស។
មន្ត្រីជំនាញរូបនេះបន្តថា ដរាបណាគេអាចគ្រប់គ្រងស្ថានការណ៍កូវីដ១៩បានល្អ វាច្បាស់ណាស់ដែលគេអាចឈានទៅបិទបញ្ចប់មេរោគឆ្លងរាតត្បាតជាសកលមួយនេះបាន ក្នុងពេលឆាប់ៗខាងមុខផងដែរ។
អំឡុងសន្និសិទសារព័ត៌មានដដែលនោះ មន្ត្រីជំនាញដទៃទៀតមកពីសេតវិមានអាមេរិកក៏បានលើកទឹកចិត្តឲ្យវិស័យឯកជន នៅតាមបណ្តារដ្ឋទាំងអស់ ចាប់ផ្តើមដាក់ចេញនៅវិធានការតម្រូវឱ្យបុគ្គលិក និង កម្មករ ធ្វើការចាក់វ៉ាក់សាំងរួចរាល់ជាមុនសិន មុននឹងចូលបម្រើការងារ ក្នុងគោលបំណងបង្កើនអត្រាចាក់វ៉ាក់សាំង។
អត្ថបទគួរអាន
គួរជម្រាបថា ការបង្កើនកិច្ចខិតខំប្រឹងប្រែងក្នុងការជំរុញពលរដ្ឋឲ្យទទួលយកវ៉ាក់សាំងឲ្យបានគ្រប់ៗគ្នាដូចនេះ ធ្វើឡើងស្របពេលដែលសហរដ្ឋអាមេរិក កំពុងប្រយុទ្ធប្រឆាំងនឹងរលកឆ្លង សាជាថ្មីដែលកំពុងកម្រើកឡើង ជាមួយនឹងវត្តមានកូវីដ១៩បំប្លែងថ្មី ឌែលតា ដែលមានកម្រិតឆ្លងខ្ពស់។ ក្នុងនោះ អ្នកធ្លាក់ខ្លួនឈឺចូលមន្ទីរពេទ្យ និង អ្នកស្លាប់ក៏កំពុងកើនឡើងផងដែរ ជាពិសេសនៅក្នុងរដ្ឋផ្លរីដា(Florida) មីស៊ីស៊ីពី(Mississippi) រដ្ឋ ល្វីស៊ីអាណា(Louisiana) រដ្ឋតិចសាស់(Texas) និង រដ្ឋផ្សេងទៀតនៃភាគខាងត្បូងសហរដ្ឋអាមេរិក។
សូមជម្រាបថា ចំនួនជាមធ្យមនៃការស្លាប់ដោយសារកូវីដ១៩នៅអាមេរិក បានកើនឡើងប្រមាណ២៣% ក្នុងរយៈពេល៧ថ្ងៃចុងក្រោយនេះ ដោយក្នុងនោះ អ្នកស្លាប់មានជាមធ្យម ១.០០០ នាក់ក្នុងមួយថ្ងៃ ខណៈករណីឆ្លងថ្មីមានជាង ១៥ម៉ឺនករណី។ នេះបើយោងតាមទិន្នន័យដែលបានចងក្រងដោយទីភ្នាក់ងារសារព័ត៌មានរ៉យទ័រ៕
None
