រដ្ឋាភិបាលវៀតណាម បានចេញសេចក្តីប្រកាសឲ្យដឹងថា សហគ្រាស សហករណ៍ ទីភ្នាក់ងារ និង អង្គការទាំងអស់ ដែលបង្កើតឡើងក្រោមច្បាប់វៀតណាម ហើយរកប្រាក់ចំណូលបានតិចជាង ៨,៥ លានដុល្លារអាមេរិក នឹងមានសិទ្ធិទទួលបានការកាត់បន្ថយពន្ធលើប្រាក់ចំណូលចំនួន ៣០% ដោយគិតសម្រាប់តែប្រាក់ចំណូលក្នុងឆ្នាំ ២០២០នេះប៉ុណ្ណោះ។
ក្នុងករណីដែលសហគ្រាសរំពឹងថា ប្រាក់ចំណូលរបស់ពួកគេ មិនអាចលើសពី ៨លាន ៥សែនដុល្លារ ក្នុងឆ្នាំ ២០២០នេះទេ ពួកគេអាចកំណត់ ការបង់ប្រាក់ពន្ធ គិតជាត្រីមាស ជាបណ្តោះអាសន្នសិន ដោយស្មើនឹង ៧០% នៃពន្ធលើចំណូលសាជីវកម្មដែលអាចបង់បាន។
អត្ថបទទាក់ទង
តាមពិតទៅ ក្រុមប្រឹក្សាភិបាលសម្រាប់ការស្រាវជ្រាវអភិវឌ្ឍន៍សេដ្ឋកិច្ចវិស័យឯកជន បានស្នើដល់ រដ្ឋាភិបាលវៀតណាម ឲ្យបន្ធូរបន្ថយពន្ធ ៣០% នេះ សម្រាប់អាជីវកម្មគ្រប់ប្រភេទ មិនមែនតែអាជីវកម្មដែលរកប្រាក់ចំណូលបានទាបជាង ៨,៥ លានដុល្លារនោះទេ ហើយក្រុមប្រឹក្សា ក៏បានស្នើឲ្យកាត់បន្ថយពន្ធអាករលើតម្លៃបន្ថែម ឲ្យបន្ថយពី ១០% ដែលកំពុងប្រើប្រាស់នាពេលបច្ចុប្បន្ន មកនៅត្រឹម ៥% ដើម្បីជំរុញការចំណាយក្នុងស្រុកសិន។
សម្រាប់ប្រជាពលរដ្ឋវៀតណាម សម្តែងការគាំទ្រទៅលើ មតិយោបល់កាត់បន្ថយពន្ធ VAT ចំនួន ៥% នេះ ដោយរំពឹងថា វានឹងជំរុញឲ្យ ប្រជាពលរដ្ឋចាប់ផ្តើមចំណាយឡើងវិញ ហើយអាចសង្គ្រោះដល់អាជីវកម្មជាច្រើន។
ទោះយ៉ាងណា អ្នកជំនាញក្នុងវិស័យពន្ធដារវៀតណាម បានពន្យល់ឲ្យដឹងថា ពន្ធ VAT គឺជាប្រភពចំណូលដ៏ធំជាងគេបំផុត និងសំខាន់ សម្រាប់រដ្ឋាភិបាលវៀតណាម ដូច្នេះហើយ ការកាត់បន្ថយពន្ធនេះ នឹងដាក់សម្ពាធកាន់តែខ្លាំងទៅលើរដ្ឋាភិបាលវៀតណាម។
ជាចុងក្រោយ រដ្ឋាភិបាលវៀតណាម នៅតែរក្សាអត្រាពន្ធ VAT ១០% ដដែល ដោយសម្អាងថា អាជីវកម្មនីមួយៗ សុទ្ធតែមានយុទ្ធសាស្រ្តទីផ្សារ ក្នុងការដោះស្រាយសម្ពាធនេះ តួយ៉ាងដូចជា ក្រុមហ៊ុនអាកាសចរណ៍ និងសណ្ឋាគារ នៅតែអាចបញ្ចុះតម្លៃបានយ៉ាងច្រើន ទោះបីជា ពន្ធ VAT មិនកាត់បន្ថយក៏ដោយ៕
None
