នាយករដ្ឋមន្ត្រីវៀតណាម លោក ផាម មិញជីង ដែលទើបឡើងកាន់តំណែងថ្មីថ្មោង បានចេញមុខស្នើទៅកាន់អាជ្ញាធរឲ្យបញ្ឈប់ការខ្ជះខ្ជាយលើការវិនិយោគ និងត្រូវប្រយុទ្ធប្រឆាំងនឹងអំពើពុករលួយនៅក្នុងការអនុវត្តគម្រោងនានាឲ្យខាងតែបាន។ លោកបន្ថែមទៀតថា មានអាជ្ញាធរខេត្តខ្លះ ដែលមានកញ្ចប់ថវិកានៅកម្រិត តែបានរៀបចំនូវគម្រោងរាប់រយសម្រាប់ឆ្នាំ២០២១ ដល់ឆ្នាំ២០២៥។
នាយករដ្ឋមន្ត្រីវៀតណាមរូបនេះ បានលើកឡើងទៀតថា អាជ្ញាធរតាមតំបន់នានា ត្រូវមានការប្រុងប្រយ័ត្ន និងកាត់បន្ថយការចំណាយជាប្រចាំ និងផ្ដល់អាទិភាពតែលើការវិនិយោគដែលចាំបាច់ ដោយផ្ដោតលើគម្រោងអភិវឌ្ឍន៍សេដ្ឋកិច្ចសង្គមទៅបានហើយ ដូចជា ការដោះស្រាយបញ្ហាគ្រោះមហន្ដរាយធម្មជាតិ និងការមើលថែរក្សាប្រជាជនងាយរងគ្រោះជាដើម។
អត្ថបទទាក់ទង!
ការលុបចោលគម្រោងវិនិយោគមិនចាំបាច់របស់វៀតណាមនៅពេលនេះ គឺវាមិនពិបាកយល់ទេ ដោយសារតែវៀតណាមកំពុងត្រូវការដ្បិតត្បៀតការចាយវាយថវិកាជាតិ ដើម្បីទុកប្រើប្រាស់សម្រាប់ការដោះស្រាយបញ្ហាសំខាន់ៗវិញ ពិសេសគឺដោះស្រាយបញ្ហាផលប៉ះពាល់ដែលបណ្ដាលមកពីកូវីដ-១៩ តែម្ដង ខណៈបច្ចុប្បន្ន ស្ថានភាពឆ្លងរីករាលដាលនៅក្នុងប្រទេសក្បែរខាងកម្ពុជាមួយនេះ ក៏កំពុងតែកម្រើកខ្លាំងឡើងៗហើយ។
គួររំឭកថា កាលពីឆ្នាំមុននេះ រដ្ឋាភិបាលវៀតណាម ធ្លាប់បង្ហាញពីផែនការរបស់ខ្លួននឹងបង្កើនការចំណាយសាធារណៈដល់ទៅជាង ៣៧% នៅក្នុងរយៈពេល៥ឆ្នាំ ដោយផែនការចំណាយនោះ គឺផ្ដោតលើវិស័យហេដ្ឋារចនាសម្ព័ន្ធ និងថាមពល។ ផែនការចំណាយរយៈពេល៥ឆ្នាំ ពោលចាប់ពីឆ្នាំ២០២១-២០២៥ វៀតណាមគ្រោងចាយដល់ទៅជិត ១២០ពាន់លានដុល្លារអាមេរិកឯណោះ។
ជុំវិញទៅនឹងកាត់បន្ថយការចំណាយមិនចាំបាច់នេះដែរ សម្រាប់ប្រទេសកម្ពុជាយើងវិញ កាលពីដើមខែឧសភា ក្រសួងសេដ្ឋកិច្ច និងហិរញ្ញវត្ថុក៏ធ្លាប់បានចេញសារាចរណែនាំមួយដែរ ស្ដីពីការធ្វើវិចារណកម្ម និងការពង្រឹងប្រសិទ្ធភាពចំណាយថវិកាជាតិ ដោយក្នុងនោះ រដ្ឋាភិបាលបានសម្រេចកាត់បន្ថយការចំណាយមិនចាំបាច់ជាច្រើន។ មន្ត្រីនាំពាក្យក្រសួងសេដ្ឋកិច្ច បានអះអាងប្រាប់ខេមបូណូមីសដែរថា តាមរយៈការកាត់បន្ថយចំណាយនេះ កម្ពុជាអាចនឹងសន្សំដល់ទៅជាង ៩០លានដុល្លារអាមេរិក ដើម្បីទុកដោះស្រាយបញ្ហាវិបត្តិកូវីដ-១៩ ដែលកំពុងបន្ដរីករាលដាល៕
None
