វៀតណាមកំពុងជាប់ដៃប្រយុទ្ធនឹងការរីករាលដាលកូវីដ ១៩ យ៉ាងសស្រាក់សស្រាំ ដោយក្នុងនោះ ការបិទខ្ទប់មជ្ឈមណ្ឌលនាំចេញរបស់ខ្លួន គឺទីក្រុងហូជីមិញ បានធ្វើឱ្យប៉ះពាល់ដល់ការនាំចេញកាហ្វេ និងទំនិញផ្សេងទៀតរបស់វៀតណាមផងដែរ។
ក្នុងខែសីហាការនាំចេញកាហ្វេរបស់វៀតណាមបានធ្លាក់ចុះ ៨,៧% ធៀបនឹងខែកក្កដា មកនៅត្រឹមជាង ១១ ម៉ឺនតោន។ យ៉ាងណាមិញ នៅរយៈពេល ៧ខែ ក្នុងឆ្នាំ ២០២១ វៀតណាមបាននាំចេញកាហ្វេចំនួន ១លាន១សែនតោន ពោលគឺទាបជាងឆ្នាំមុន ៦,៤% ប៉ុន្តែចំណូលពីការនាំចេញកាហ្វេបានកើនឡើង ២% ស្មើនឹងប្រមាណ ២ ពាន់លានដុល្លារ។ជាមួយគ្នានេះ ចំណែកទីផ្សារកាហ្វេរបស់វៀតណាមក៏បានធ្លាក់ចុះពីជាង ២៧% មកនៅត្រឹម ១៦%ផងដែរ។
អត្ថបទគួរអាន
គួរកត់សម្គាល់ថា ការធ្លាក់ចុះនៃការនាំចេញ និងការផលិតកាហ្វេរបស់វៀតណាម និងប្រទេសផ្សេងទៀតដូចជា ប្រស៊ីល និងកូឡុំប៊ី បានបង្កើនតម្លៃកាហ្វេពិភពលោក ដោយសារការផ្គត់ផ្គង់មានកំណត់ពីបណ្ដាប្រទេសផលិតផលធំៗទាំងនេះ ក្នុងអំឡុងវិបត្តិកូវីដ-១៩។
យ៉ាងណាក៏ដោយចុះ ក្រោយមើលឃើញពីផលប៉ះពាល់ដល់ដំណើរការសេដ្ឋកិច្ច ថ្មីៗនេះវៀតណាមបានបន្ធូរបន្ថយវិធានការរឹតត្បិតជាបន្តបន្ទាប់ ដូច្នេះការនាំចេញកាហ្វេរបស់វៀតណាមទំនងជាដំណើរការឡើងវិញក្នុងរយៈពេលឆាប់ៗនេះ។ ក្នុងន័យនេះ ការផ្គត់ផ្គង់កាហ្វេទូទាំងពិភពលោកក៏អាចចាប់ផ្តើមស្ទុះងើបឡើងវិញនៅក្នុងឆ្នាំ ២០២២-២០២៣ផងដែរ។ នេះបើតាមការព្យាករដោយក្រុមហ៊ុន Fitch Solutions។
របាយការណ៍ពីក្រសួងកសិកម្ម និងអភិវឌ្ឍន៍ជនបទវៀតណាម បានឲ្យដឹងថា នៅឆ្នាំ២០២០ វៀតណាមនាំចេញកាហ្វេសរុបជាង១លាន៥សែនតោន ជាមួយនឹងទឹកប្រាក់នាំចេញសរុបជាង២ពាន់៦រយលានដុល្លារអាមេរិក៕អត្ថបទ៖ ស៊ើង និមល់
None
