រោងចក្រដែលទើបតែបានបើកការដ្ឋានសាងសង់ថ្មីនេះ ត្រូវបានក្រុមហ៊ុនបច្ចេកវិទ្យាយក្សរបស់កូរ៉េទាំងពីរនេះ បានចាប់ដៃគ្នាបោះទុន ១ពាន់លានដុល្លារអាមេរិក វិនិយោគសាងសង់នៅក្នុងប្រទេសឥណ្ឌូនេស៊ី ដែលជាប្រទេសសម្បូរទៅដោយ ធនធានវត្ថុធាតុដើមសម្រាប់ការផលិតអាគុយរថយន្ដអគ្គិសនីសម្រាប់ផ្គត់ផ្គង់ទៅឲ្យពិភពលោក។ នេះបើយោងតាមការចេញផ្សាយដោយ សារព័ត៌មាន Asia Nikkei នៅថ្ងៃនេះ។
លោក Kim បន្តថា ក្រុមហ៊ុន នឹងបន្តអភិវឌ្ឍយ៉ាងសកម្ម និងចាត់ទុករោងចក្រនេះជាមូលដ្ឋាន ទៅកាន់ទីផ្សាររថយន្តអគ្គិសនីសកលលោក លើសពីតំបន់អាស៊ាន ទៅទៀត។
តាមរយៈការបណ្តាក់រួមគ្នានេះ ក្រុមហ៊ុនក៏បានត្រៀមកញ្ចប់វិនិយោគធំតែម្តង ចាប់តាំងពី ការវិនិយោគលើអណ្តូងរ៉ែ រហូតទៅដល់ ការបង្កើតកោសិកាថ្មនេះ ហើយនឹងក្លាយជា ដៃគូដ៏គួរឲ្យទុកចិត្ត សម្រាប់រដ្ឋាភិបាលឥណ្ឌូនេស៊ី ក្នុងការអភិវឌ្ឍន៍សេដ្ឋកិច្ច និងបច្ចេកវិទ្យា។
រោងចក្រមួយនេះ សាងសង់ឡើងលើផ្ទៃដៃ ៣៣ហិកតា ហើយរំពឹងថា នឹងបង្កើតកោសិកាថ្មសម្រាប់ផលិតអាគុយរថយន្ដអគ្គិសនីបាន ១០ជីហ្គាវ៉ាត់ម៉ោង ក្នុងមួយឆ្នាំ នៅពេលបើកដំណើរការពេញលេញ ដែលបរិមាណនេះ គឺគ្រប់គ្រាន់ សម្រាប់បង្កើតអាគុយរថយន្តអគ្គិសនីចំនួន ១៥ម៉ឺនដុំ។
ដោយឡែក ចំពោះក្រុមហ៊ុន Hyundai វិញ ក៏កំពុងសាងសង់រោងចក្រផលិតរថយន្តនៅក្បែរគ្នានេះដែរ ដោយនឹងចាប់ផ្តើមផលិតកម្មនៅក្នុងឆ្នាំ ២០២២ខាងមុខ។
អត្ថបទគួរអាន
រដ្ឋមន្ត្រីក្រសួងវិនិយោគឥណ្ឌូនេស៊ី បានមានប្រសាសន៍ដែរថា រោងចក្រផលិតថ្មអាគុយនេះ គឺជាផ្នែកមួយនៃផែនការវិនិយោគជិត ១០ពាន់លានដុល្លារអាមេរិក របស់ក្រុមហ៊ុន LG ដែលបានចុះហត្ថលេខាកាលពីខែធ្នូ ឆ្នាំ ២០២០កន្លងទៅ ដើម្បីអភិវឌ្ឍវិស័យឧស្សាហកម្មថ្មអាគុយរថយន្ដអគ្គិសនី សហការជាមួយ សហគ្រាសគ្រប់គ្រងដោយរដ្ឋផងដែរ។
ប្រទេសឥណ្ឌូនេស៊ី គឺមានធនធានវត្ថុធាតុដើមសម្រាប់ការបង្កើតថ្មអាគុយ ច្រើនជាងគេបំផុតនៅលើសកលលោក ហើយឥណ្ឌូនេស៊ី ក៏មានបំណងចង់ក្លាយជាផ្នែកមួយ នៃចង្វាក់ផ្គត់ផ្គង់រថយន្តអគ្គិសនីនៅលើទីផ្សារសកល។
ប្រធានាធិបតីឥណ្ឌូនេស៊ី លោក Joko Widodo ស្វាគមន៍ចំពោះគម្រោងវិនិយោគនេះ ដោយបានសម្របសម្រួលផ្លូវច្បាប់ដ៏ស្មុគស្មាញ និងផ្តល់ការលើកទឹកចិត្តពិសេស ហើយលោកបញ្ជាក់ថា ការសាងសង់រោងចក្រផលិតអាគុយនេះ បង្ហាញពីការប្តេជ្ញាចិត្តដ៏មុតមាំរបស់ រដ្ឋាភិបាលឥណ្ឌូនេស៊ី ក្នុងការអភិវឌ្ឍវិស័យឧស្សាហកម្មរ៉ែ និងគេចចេញពីអន្ទាក់នៃ ការនាំចេញវត្ថុធាតុដើមសុទ្ធសាធនោះ។
ប្រធានាធិបតីឥណ្ឌូនេស៊ីរូបនេះ បន្ថែមថា សម័យកាលនៃការនាំចេញវត្ថុធាតុដើម ត្រូវបានបញ្ចប់ហើយ និងត្រូវផ្លាស់ប្តូររចនាសម្ព័ន្ធសេដ្ឋកិច្ចទៅជា ការអភិវឌ្ឍវិស័យឧស្សាហកម្ម និងកែច្នៃវត្ថុធាតុដើម ផ្អែកទៅលើការអភិវឌ្ឍន៍បច្ចេកវិទ្យាទំនើប៕
អត្ថបទ៖ វណ្ណ វុឌ្ឍវិវឌ្ឍន៍
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
