តើមានកត្តាអ្វីជំរុញឱ្យធនាគារនៅវៀតណាមជិត២០ នាំគ្នាកាត់បន្ថយអត្រាការប្រាក់បញ្ញើ?

ធនាគារពាណិជ្ជនៅប្រទេសវៀតណាមជិត ២០ បានសម្រេចកែសម្រួលអត្រាការប្រាក់បញ្ញើរបស់ពួកគេតាំងពីដើមខែមីនានេះ ជាមួយនឹងអត្រាការប្រាក់ទាបបំផុត។ មកទល់ពេលនេះ ធនាគារមួយក្នុងចំណោមធនាគារធំទាំង៤របស់វៀតណាម គឺធនាគារវិនិយោគ និងអភិវឌ្ឍន៍វៀតណាម (BIDV) ដែលជាធនាគារមួយមានវត្តមាននៅកម្ពុជាដែរនោះ កាលពីដើមសប្តាហ៍នេះ បានកាត់បន្ថយអត្រាប្រាក់បញ្ញើតាមអ៊ីនធឺណិតដល់ទៅ០,២% សម្រាប់រយៈពេលពី១ខែទៅ១១ខែ និងពី២៤ខែទៅ៣៦ខែ ហើយក៏បន្ថយដល់០,១% សម្រាប់ប្រាក់បញ្ញើដែលមានកាលកំណត់ពី១២ខែទៅ១៨ខែ។

ដោយឡែកធនាគារកសិកម្ម និងអភិវឌ្ឍន៍ជនបទវៀតណាមវិញ បានកាត់បន្ថយអត្រាប្រាក់បញ្ញើ០,១% ដោយរក្សាអត្រាត្រឹមតែ៣%ប៉ុណ្ណោះក្នុងមួយឆ្នាំ សម្រាប់ប្រាក់បញ្ញើ ដែលមានរយៈពេលពី៦ខែ ទៅ៩ខែ ចាប់ពីថ្ងៃទី១៥ ខែមីនា តទៅ។ គិតចាប់ពីដើមខែមីនា ឆ្នាំ២០២៤ មក ធនាគារពាណិជ្ជនៅវៀតណាម ចំនួន១៧ បានកែសម្រួលអត្រាការប្រាក់បញ្ញើរបស់ខ្លួន ក្នុងនោះធនាគារចំនួន៤ បានកាត់បន្ថយអត្រា​ការប្រាក់ច្រើនជាងពីរដង។ ធនាគារទាំងនោះ រួមមាន ធនាគារ បាវវៀត( BaoViet) ធនាគារជីភី ( GPBank) ធនាគារប៊ីវី ( BVBank) និងធនាគារ ភីជី( PGBank)។

បច្ចុប្បន្នអត្រាការប្រាក់បញ្ញើតាមអ៊ីនធឺណិតនៅវៀតណាម គឺស្ថិតក្នុងចន្លោះពី១,៦% ទៅ៦,២% ក្នុង១ឆ្នាំ។ គិតត្រឹមចុងឆ្នាំ២០២៣ កន្លងទៅ ទឹកប្រាក់បញ្ញើនៅធនាគារវៀតណាមសរុបមានតម្លៃប្រមាណជា៥៥៤ពាន់លានដុល្លារ កើនឡើង១៤% បើធៀបនឹងឆ្នាំ២០២២។

តាមការស្រាវជ្រាវរបស់ VNDirect Research បានព្យាករណ៍ថា ធនាគារកណ្តាលអាចនឹងកាត់បន្ថយអត្រាប្រតិបត្តិការផ្សេងៗប្រមាណជា០,៥% ក្នុងត្រីមាសទីពីរនៃឆ្នាំ២០២៤ ដូច្នោះហើយ អត្រាប្រាក់បញ្ញើជាមធ្យមរយៈពេល១២ខែ ត្រូវបានគេរំពឹងថា នឹងស្ថិតក្នុងរង្វង់ពី៤,៥% ទៅ៥% ក្នុង១ឆ្នាំ តែរដ្ឋាភិបាល ក៏បានស្នើឱ្យមានកិច្ចខិតខំប្រឹងប្រែងកាត់បន្ថយអត្រាការប្រាក់កម្ចីបន្ថែម ដើម្បីគាំទ្រដល់ការស្ទុះងើបនៃវិស័យសេដ្ឋកិច្ច៕

ដោយៈ សរ សុជាតិ