ប្រទេសវៀតណាមបានបិទព្រំដែនរបស់ខ្លួនយ៉ាងមានប្រសិទ្ធភាព ហាមមិនឲ្យធ្វើដំណើរចេញទៅខាងក្រៅ តាំងពីខែមីនាឆ្នាំ២០២០មក ហើយអាជ្ញាធរបានអនុញ្ញាតសម្រាប់តែប្រជាជនរបស់ខ្លួន ឬជនបរទេសដែលជាអ្នកជំនាញប៉ុណ្ណោះ ដែលអាចចូលក្នុងប្រទេសបាន ដោយតម្រូវដាក់ឲ្យធ្វើចត្តាឡីស័កក្នុងរយៈពេល៣សប្ដាហ៍ នៅឯសណ្ឋាគារ ឬមជ្ឈមណ្ឌលដែលរៀបចំដោយយោធា បើទោះបីជាពួកគេទាំងនោះ បានចាក់វ៉ាក់សាំងរួចហើយក៏ដោយ។
ប្រធានសភាពាណិជ្ជកម្មអាមេរិកប្រចាំប្រទេសវៀតណាម លោក Adam Stikoff បាននិយាយក្នុងសេចក្ដីថ្លែងការណ៍ថា ខ្លួនលើកទឹកចិត្តឲ្យអាជ្ញាធរវៀតណាម អនុវត្តនីតិវិធីរឹតត្បិតតិចជាងមុន សម្រាប់អ្នកដែលបានចាក់វ៉ាក់សាំងរួច ដូចជាអ្នកជំនួញ អ្នកជំនាញការបរទេស និងអាចជាភ្ញៀវទេសចរផងដែរ។
លោក Adam បន្ថែមទៀតថា មាន៨១% នៃសមាជិកសភាពាណិជ្ជកម្មអាមេរិក បាននិយាយថា ពួកគេអាចនឹងនាំអ្នកជំនួញ និងអ្នកជំនាញបរទេសកាន់តែច្រើនចូលក្នុងប្រទេសវៀតណាម ប្រសិនបើរយៈពេលនៃការធ្វើចត្តាឡីស័កត្រូវបានកាត់បន្ថយសម្រាប់ពួកគេពី២១ថ្ងៃ មកនៅត្រឹម៧ថ្ងៃវិញ។
អត្ថបទទាក់ទង!
ប្រទេសវៀតណាម កន្លងមកនេះ ត្រូវបានគេមើលឃើញថា គឺជាប្រទេសមួយក្នុងចំណោមប្រទេសមួយចំនួនក្នុងពិភពលោក ដែលទទួលបានជោគជ័យលើការគ្រប់គ្រងកូវីដ-១៩ ដោយសារតែមានកម្មវិធីនៃគោលដៅធ្វើតេស្ដទ្រង់ទ្រាយធំ ការតាមដានជាប់លាប់ និងប្រព័ន្ធរៀបចំការដាក់ឲ្យនៅដាច់ដោយឡែកបានល្អ។
ប៉ុន្ដែ ថ្មីៗនេះ ករណីឆ្លងថ្មីនៅវៀតណាមហាក់មានការកម្រើកឡើងវិញបន្ដិចហើយ ដែលកំពុងធ្វើឲ្យអាជ្ញាធរប្រទេសនេះ បាននិងកំពុងរៀបចំប្រុងជើងព្រួលជាប់ជានិច្ចដើម្បីទប់ទល់ ដ្បិតថា ប្រទេសក្បែរខាងវៀតណាមដូចជា ថៃ កម្ពុជា និងឡាវ កំពុងតែផ្ទុះរលកឆ្លងខ្លាំងមិនទាន់ស្រាកស្រាន្ដនៅឡើយ។
ប្រទេសវៀតណាម គិតត្រឹមថ្ងៃចន្ទដើមសប្ដាហ៍នេះ មានចំនួនករណីឆ្លងកូវីដ-១៩ សរុបជាង៥ពាន់ករណីប៉ុណ្ណោះ និងអ្នកស្លាប់វិញមាន៤៣នាក់។
ទោះយ៉ាងណា ប្រទេសវៀតណាម ត្រូវបានគេមើលឃើញថា កំពុងមានភាពយឺតយ៉ាវមែនទែន ក្នុងការចាក់វ៉ាក់សាំងជូនដល់ពលរដ្ឋ ជាក់ស្ដែង មកទល់ពេលនេះ មានប្រជាជនវៀតណាមត្រឹមតែប្រមាណជិត៣ម៉ឺននាក់ប៉ុណ្ណោះ ដែលបានទទួលការចាក់វ៉ាក់សាំងកូវីដ-១៩។
ប្រធានសភាពាណិជ្ជកម្មអាមេរិក បាននិយាយថា មានសមាជិកសភាពាណិជ្ជកម្មអាមេរិកជាច្រើន បានបង្ហាញពីឆន្ទៈក្នុងការចំណាយទិញវ៉ាក់សាំងដោយខ្លួនឯង សម្រាប់ការចាក់ជូនបុគ្គលិករបស់ពួកគេ ដែលកំពុងធ្វើការនៅវៀតណាម ហើយសំណើនេះ ក៏កំពុងស្ថិតនៅក្នុងការពិភាក្សាជាមួយនឹងរដ្ឋាភិបាលវៀតណាមនៅឡើយ៕
None
