តាមរយៈកំណើននេះបានជំរុញឱ្យក្រុមអ្នកជំនាញរំពឹងថា ការនាំចេញរបស់កម្ពុជាក្រោមកិច្ចព្រមព្រៀងនេះនឹងមានការកើនឡើងបន្ថែមទៀតនៅឆ្នាំ២០២៤នេះ ជាពិសេសការនាំចេញផលិតផលកសិកម្មតែម្តង។
ឧកញ៉ា ស៊ិន ចន្ធី ប្រធានសមាគមភស្តុភាកម្មកម្ពុជា បានគូសបញ្ជាក់ថា បើទោះបីបច្ចុប្បន្នស្ថានភាពសេដ្ឋកិច្ចពិភពលោក និងតំបន់ នៅតែបន្តរងផលប៉ះពាល់ដោយសារវិបត្តិនានាយ៉ាងណាក៏ដោយ ប៉ុន្តែសម្រាប់ការធ្វើពាណិជ្ជកម្មរបស់កម្ពុជាជាមួយប្រទេសក្នុងតំបន់នៅតែមានសក្តានុពលខ្ពស់ និងមានកំណើនវិជ្ជមានជាបន្តបន្ទាប់។ តួយ៉ាង ការនាំចេញទំនិញកម្ពុជាទៅកាន់ទីផ្សារអាស៊ាន និងទីផ្សារRCEP នៅក្នុងឆ្នាំ២០២៣ អ្នកជំនាញក្នុងវិស័យដឹកជញ្ជូនរូបនេះកត់សម្គាល់ឃើញថា គឺមានការកើនឡើងគួរឱ្យកត់សម្គាល់បើធៀបនឹងឆ្នាំ២០២២ កន្លងទៅ បើទោះបីជាការនាំចេញទៅកាន់ទីផ្សារអឺរ៉ុបនៅមានកំណើនយឺតក្តី។ ការនាំចេញនៅតែរក្សាបានកំណើនខ្ពស់បែបនេះ ត្រូវបានឧកញ៉ា ស៊ិន ចន្ធី អះអាងថា គឺដោយសាររាជរដ្ឋាភិបាលបានខិតខំជំរុញការធ្វើពាណិជ្ជកម្មជាមួយបណ្តាប្រទេសក្នុងតំបន់ឱ្យកាន់តែល្អប្រសើរល្អ ជាពិសេសតាមរយៈការចុះកិច្ចព្រមព្រៀងពាណិជ្ជកម្មសេរីទ្វេភាគីតែម្តង។
អត្ថបទគួរអាន
ស្រដៀងគ្នានេះ លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានគូសបញ្ជាក់ថា កត្តាដែលធ្វើឱ្យការនាំចេញរបស់កម្ពុជា ទៅកាន់ប្រទេសក្រោមក្របខណ្ឌ RCEP រក្សាបានកំណើនខ្ពស់នោះ គឺដោយសារកម្ពុជាមានទំនាក់ទំនងល្អជាមួយប្រទេសក្នុងក្របខណ្ឌ RCEP ស្របពេលទំនិញកម្ពុជានៅតែមានសក្តានុពល និងគុណភាពខ្ពស់ ដើម្បីឆ្លើយតបនឹងតម្រូវការរបស់ទីផ្សារមួយនេះ។ ការរងផលប៉ះពាល់នៃដំណើរការផលិតកម្ម ជាពិសេសក្នុងវិស័យកសិកម្ម និងកសិឧស្សាហកម្មកែច្នៃរបស់ប្រទេសមួយចំនួន ក៏ជាកត្តារួមចំណែកជួយជំរុញការនាំចេញរបស់កម្ពុជាទៅកាន់ទីផ្សារ RCEP ផងដែរ។ តាមរយៈកំណើននេះ បានជំរុញឱ្យអ្នកជំនាញរូបនេះជឿជាក់ថា នៅក្នុងឆ្នាំ២០២៤នេះ ការនាំចេញទំនិញរបស់កម្ពុជាទៅកាន់ទីផ្សារ RCEP នឹងកាន់តែមានកំណើនជាបន្តបន្ទាប់ទៀត ជាពិសេសទំនិញកសិកម្មតែម្តង។
បើតាមរបាយការណ៍ក្រសួងពាណិជ្ជកម្ម នៅពេញមួយឆ្នាំ២០២៣ កម្ពុជាបាននាំចេញទំនិញទៅកាន់ទីផ្សារ RCEP សម្រេចបានក្នុងទំហំទឹកប្រាក់ជាង២៩ពាន់លានដុល្លារ ថយចុះ៥% បើធៀបនឹងឆ្នាំ២០២២។ ទោះបីទំហំពាណិជ្ជកម្មជារួមមានការធ្លាក់ចុះ ប៉ុន្តែការនាំចេញរបស់កម្ពុជាទៅកាន់ទីផ្សារRCEP នៅក្នុងរយៈពេលដូចគ្នានេះវិញ គឺមានសន្ទុះកើនឡើងខ្ពស់ ដោយសម្រេចបានក្នុងទំហំជាង៨ពាន់លានដុល្លារកើនឡើងជិត២៩% បើធៀបនឹងឆ្នាំ២០២២។ ក្នុងនោះវៀតណាម គឺជាទីផ្សារនាំចេញធំជាងគេរបស់កម្ពុជា ដែលមានទំហំទឹកប្រាក់ប្រមាណជិត៣ពាន់លានដុល្លារ បន្ទាប់មកគឺទីផ្សារចិនមានទំហំជិត១ពាន់៥រយលានដុល្លារ តាមពីក្រោយដោយទីផ្សារជប៉ុនមានទំហំជាង១ពាន់១រយលានដុល្លារ និងទីផ្សារផ្សេងៗទៀត។
គួរបញ្ជាក់ថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ មានប្រទេសជាសមាជិកចំនួន១៥រួមមាន ប្រទសសមាជិកអាស៊ានចំនួន១០ បូករួមជាមួយប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់ ដែលបានក្លាយជាកិច្ចព្រមព្រៀងធំជាងគេបំផុតលើពិភពលោក៕
None
