បនល្បែងអនឡាញ ក្វាងទុង ដែលបានជាកន្លែងមួយបើកឲ្យមានការភ្នាល់ល្បែងអនឡាញដ៏ធំ និងបានស្រូបទាញលំហូរសាច់ប្រាក់យន់របស់ចិនយ៉ាងច្រើនតាមរយៈអាជីវកម្មល្បែងអ៊ីនធើណែត។ បនល្បែងនេះ បានចុះបញ្ជីនៅសាធារណៈរដ្ឋកូស្ដារីកា ដែលជាកន្លែងបើកចំហរឲ្យមានការចុះបញ្ចីអាជីវកម្មបនល្បែងអនឡាញ ស្របច្បាប់។
អាជីវកម្មល្បែងអនឡាញនេះ កំពុងបង្កជាបញ្ហាកាន់តែច្រើនឡើង ដល់រដ្ឋាភិបាលបក្សកុម្មុយនីសចិន ដែលធ្លាប់បាននិយាយថា ប្រតិបត្តិការល្បែងភ្នាល់អនឡាញ បានធ្វើឲ្យបាត់បង់សាច់ប្រាក់ចេញពីប្រទេសចិន រាប់រយលានយន់។ ទីក្រុងបេកាំង ចាត់ទុកការភ្នាល់ គឺជារឿងមិនត្រឹមត្រូវ ហើយវាក៏បង្កឲ្យមានបញ្ហាវឹងកវរក្នុងសង្គមផងដែរ។
មិនតែប៉ុណ្ណោះ ច្បាប់ក្នុងប្រទេសចិន ក៏មានការហាមឃាត់ការលេងល្បែងស៊ីសងនៅលើទឹកដីចិនដីគោកផងដែរ រួមទាំងបនល្បែងអនឡាញថែមទៀតផងរ។ ប៉ុន្ដែ ភាពអនាមិក ដែលទាក់ទងនឹងការបើកឱកាសតាមអ៊ីធើណែត បានធ្វើឲ្យអ្នកភ្នាល់ជនជាតិចិនប្រមូលផ្ដុំគ្នា លេងល្បែងភ្នាល់នានាតាមអនឡាញយ៉ាងគគ្រឹកគគ្រេង។
អត្ថបទទាក់ទង!
ជនជាតិចិនញៀនល្បែងតាមអនឡាញទាំងនោះ បានជួយឲ្យវិស័យល្បែងអនឡាញនៅអាស៊ីមានកំណើនយ៉ាងខ្លាំង ដែលត្រូវបានគេរំពឹងថា នឹងកើនឡើងដល់ទំហំទឹកប្រាក់ប្រមាណ២៤ ពាន់លានដុល្លារអាមេរិក នៅឆ្នាំនេះ។ នេះបើតាមការស្រាវជ្រាវទីផ្សារដោយស្ថាប័ន Technavio។
រដ្ឋាភិបាលក្រុងប៉េងកាំង បានបញ្ចុះបញ្ជូលឲ្យប្រទេសដែលអនុញ្ញាតឲ្យមានការបើកល្បែងស៊ីសងអនឡាញ ដូចជា កម្ពុជា និងហ្វីលីពីន ឲ្យបិទឧស្សាហកម្មនេះចោល ដែលវាត្រូវបានគេមើលឃើញថា ជាការអនុវត្តវិធានការបន្ទាន់មួយទៀតរបស់ចិន ស្របពេលដែលសេដ្ឋកិច្ចចិនដើរយឺត និងបញ្ហាសង្គ្រាមពាណិជ្ជកម្មជាមួយអាមេរិក នៅមិនទាន់ដោះស្រាយស្រុះស្រួលគ្នានៅឡើយនោះ។
រដ្ឋាភិបាលកម្ពុជា នាពេលថ្មីៗនេះ បានប្រកាសសម្រេចឈប់ផ្ដល់អាជ្ញាបណ្ណឲ្យក្រុមហ៊ុនផ្ដល់សេវាល្បែងអនឡាញតទៅទៀតហើយ និងអនុញ្ញាតឲ្យក្រុមហ៊ុនដែលកំពុងមានអាជ្ញាបណ្ណ អាចបន្ដប្រតិបត្តិការរបស់ខ្លួនដល់ផុតអាជ្ញាបណ្ណ។
ក្រោយពីប្រកាសភ្លាម គេសង្កេតឃើញថា មានជនជាតិចិនជាច្រើន បានសម្រុកចាកចេញពីប្រទេសកម្ពុជា ដែលវាត្រូវបានគេដាក់ការសង្ស័យថា គឺដោយសារតែរដ្ឋាភិបាលកម្ពុជាប្រកាសបិទអាជីវកម្មល្បែងអនឡាញទាំងនេះ។
រដ្ឋាភិបាលចិន បានចងនូវបញ្ហាជាច្រើនទៅលើល្បែងអនឡាញ រួមមាន ការក្លែងបន្លំទូរគមនាគម និងពលរដ្ឋត្រូវបានល្បួងឲ្យធ្វើការខុសច្បាប់នៅក្នុងប្រទេសហ្វីលីពីនជាដើម។
បនល្បែងតាមអនឡាញទាំងនេះ ក៏បានគំរាមកំហែងដល់កំណើននៃការទៅលេងល្បែងនៅទីក្រុងម៉ាកាវ ដែលជាទីក្រុងតែមួយគត់ស្ថិតក្រោមការគ្រប់គ្រងដោយរដ្ឋាភិបាលចិន អនុញ្ញាតឲ្យមានការលេងល្បែងស៊ីសង (តែការបើកបនល្បែងអនឡាញត្រូវបានហាមឃាត់)។
អ្នកលេងល្បែង នៅក្នុងបនល្បែងអនឡាញក្វាងទុង ដែលបានចុះបញ្ជីអាជីវកម្មនៅកូស្ដារីកានោះ អាចដាក់ប្រាក់ និងទទួលប្រាក់តាមរយៈគណនី នៅធនាគារចិនមួយចំនួនដូចជា ធនាគារ Bank of China Ltd. និងធនាគារ Industrial & Commercial Bank of China Ltd.,។ នេះបើតាមគេហទំព័ររបស់បនល្បែនេះ។ ប៉ុន្ដែ ធនាគារបានបដិសេធមិនបានផ្ដល់ការបកស្រាយពីរឿងនេះទេ។ នេះបើតាមការបញ្ជាក់របស់ សារព័ត៌មាន Macau Daily Times។
លើសពីនេះ ក៏មានការអនុញ្ញាតឲ្យមានការទូទាត់ការភ្នាល់ និងឈ្នះល្បែង តាមប្រព័ន្ធទូទាត់របស់ក្រុមហ៊ុនបច្ចេកវិទ្យាយក្សចិន Tencent Holdings Ltd និងក្រុមហ៊ុន Ant Financial Services Group របស់មហាសេដ្ឋីប្រាក់ពាន់លានដុល្លារ លោក Jack Ma ផងដែរ។
ប្រទេសហ្វីលីពីន ដែលជាកន្លែងបើកឲ្យមានការភ្នាល់ល្បែងអនឡាញដែរនោះ ក៏ត្រូវបានចិនស្នើឲ្យបិទអាជីវកម្មល្បែងអនឡាញនេះដែរ ខណៈដែលវិស័យល្បែងនេះ បានជួយរុញច្រានមួយភាគតូចដែរ ដល់សេដ្ឋកិច្ចហ្វីលីពីន។ បន្ទាប់ពីមានការអំពាវនាវពីចិន ឲ្យបង្ក្រាបលើល្បែងអនឡាញ ប្រទេសហ្វីលីពីនក៏បានឆ្លើយតបថា ខ្លួននឹងបញ្ឈប់ការផ្ដល់ការស្នើសុំអាជ្ញាបណ្ណថ្មីៗសម្រាប់អាជីវកម្មល្បែងអនឡាញ រហូតដល់ចុងឆ្នាំនេះ។ ការសម្រេចរបស់ហ្វីលីពីននេះ ហាក់ដូចជាមិនទាន់គ្រប់គ្រាន់តាមការចង់បានពេញលេញរបស់ចិននៅឡើយទេ ព្រោះចិនចង់ឲ្យបិទចោលទាំងអស់ តែហ្វីលីពីនគ្រាន់តែមិនផ្ដល់អាជ្ញាបណ្ណថ្មីបន្ត តែនឹងរក្សាក្រុមហ៊ុនល្បែងអនឡាញចាស់ៗដដែល។
អត្ថបទគួរឲ្យចាប់អារម្មណ៍
លោក ប្រធានាធិបតីចិន ស៊ីជិនពីង បានលើកឡើងពីរឿងល្បែងអនឡាញ នៅក្នុងខែសីហា នៅពេលដែលលោកបានជួបជាមួយនឹងលោកប្រធានាធិបតីហ្វីលីពីន Duterte ដែលប្រធានាធិបតីហ្វីលីពីនរូបនេះ បានបដិសេធការអំពាវនាវលើការបិទអាជីវកម្មល្បែងអនឡាញនោះ។
ឯកអគ្គរដ្ឋទូតហ្វីលីពីនប្រចាំប្រទេសចិន បាននិយាយក្នុងបទសម្ភាសន៍ជាមួយនឹងទូរទស្សន៍ Bloomberg កាលពីចុងខែសីហាថា ហ្វីលីពីនមិនបានចាប់អារម្មណ៍ ទៅនឹងជំហានខ្លាំងៗ ដែលនឹងជិះឥទ្ធិពលអាក្រក់ដល់សេដ្ឋកិច្ច តែនឹងជំនួសដោយការគ្រប់គ្រងវិស័យនេះវិញ៕
ប្រភព៖ macaudailytimes.com.mo
None
