ឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានគូសបញ្ជាក់ថា ក្នុងរយៈពេល ១១ខែឆ្នាំ២០២០ នេះទាំងសមត្តិកិច្ចថ្នាក់ជាតិ និងរាជធានីខេត្តបានផ្តល់លិខិតអនុញ្ញាតសាងសង់ ៤.៣២៨គម្រោង និងទន្ទឹមជាមួយគ្នានេះ ក៏នៅមានគម្រោងជាច្រើនមួយចំនួនទៀត ដែលក្រសួង និងមន្ទីររាជធានីខេត្តកំពុងបន្តពិនិត្យដើម្បីផ្តល់លិខិតអនុញ្ញាតសាងសង់ជាបន្តបន្ទាប់ទៀតផងដែរ។
ឯកឧត្តម ឡៅ ទិព្វសីហា អះអាងថា ភាគច្រើននៃគម្រោង ដែលបានស្នើសុំសាងសង់នាពេលនេះ រួមមានអគារពាណិជ្ជកម្ម អគារផ្សារ សណ្ឋាគារ សំណង់អគារលំនៅដ្ឋានលក្ខណៈបុរី ប្រភេទផ្ទះល្វែង សំណង់អគារ សំណង់អគារ ពហុមុខងារ សំណង់រោងចក្រឧស្សាហកម្មនានានៅតែដំណើរការស្នើសុំសាងសង់ជាបន្តបន្ទាប់ ហើយរាល់សំណង់ទាំងអស់នេះ ពិតជាបានដំណើរការសាងសង់តាមការស្នើសុំភ្លាមៗតែម្តងសម្រាប់ឆ្នាំ ២០២០នេះ។
អត្ថបទទាក់ទង!
ឯកឧត្តមឡៅ ទិព្វសីហា បានឲ្យដឹងទៀតថា ក្នុងរយៈពេលជាមួយគ្នានេះ ការវិនិយោគរបស់អ្នកវិនិយោគមកពីបរទេសនៅតែមានជាបន្តបន្ទាប់ដែរ ក្នុងរយៈពេល១១ ខែនេះ ការវិនិយោគរបស់វិស័យឯកជនមកពីបរទេសក្នុងវិស័យសំណង់ មានតម្លៃទុនប្រមាណ ១.៣០០លានដុល្លារ ជាមួយនឹងគម្រោងជាង ១០០គម្រោង ក្នុងនោះ អ្នកវិនិយោគមកពីប្រទេសចិនបាននាំមុខគេក្នុងការវិនិយោគវិស័យសំណង់នៅកម្ពុជា ដែលមានគម្រោង ៧៨គម្រោង និងទុនវិនិយោគជាង ១ពាន់លានដុល្លារ។
បើតាមឯកឧត្តម ឡៅ ទិព្វសីហា គិតពីឆ្នាំ ២០០០ ដល់ខែវិច្ឆិកា ឆ្នាំ២០២០ នេះ ការបោះទុនវិនិយោគរបស់វិស័យឯកជនមកពីបរទេសមាន ៦២៧ គម្រោង ដែលមានទុនវិនិយោគជាង ៩.៥០០លានដុល្លារ ក្នុងចំណោមអ្នកវិនិយោគមកពី ២២ ប្រទេស ហើយក្នុងនោះ អ្នកវិនិយោគដែលនៅតែបន្តនាំមុខគេ គឺអ្នកវិនិយោគមកពីប្រទេសចិន កូរ៉េខាងត្បូង ជប៉ុន ថៃ ម៉ាឡេស៊ី និងអាមេរិក៕
None
