ក្នុងចំណោមអ្នកទទួលរងផលប៉ះពាល់ពីការផ្គត់ផ្គង់អគ្គិសនីមិនគ្រប់គ្រាន់នេះដែរ អ្នកប្រកបអាជីវកម្មដែលផលប៉ះពាល់ខ្លាំងជាងគេនោះ មានដូចជា អាជីវកម្ម បោកអ៊ុតសម្លៀកបំពាក់ ហាងថែរក្សាសម្ភស្ស ហាងផាត់មុខធ្វើសក់ ហាងកាត់ដេរសម្លៀកបំពាក់ និងហាងថតចម្លងជាដើម។ល។
ឆ្លើយប្រាប់ខេមបូណូមីស នាពេលថ្មីៗនេះ អ្នកស្រី កែវ សុខា ជាម្ចាស់ហាងសាឡន ខាខាសាឡន បានត្អូញត្អែរថា ការរអាក់រអួលនៃថាមពលអគ្គិសនី ដាច់ព្រឹក ដាច់ល្ងាចនៅមួយរយៈពេលចុងក្រោយនេះ បានធ្វើឲ្យអាជីវកម្មសាឡរបស់គាត់ជួបប្រទះនឹងការលំបាកច្រើន ជាពិសេស ការបាត់បង់ចំណូលស្ទើរតែពាក់ទៅហើយ។
អត្ថបទទាក់ទង!
បញ្ហាមិនខុសគ្នាពីអ្នកស្រី កែវ សុខា ម្ចាស់ហាងសាឡននោះទេ លោក ណូ រ៉ា ម្ចាស់តូបកាត់ដែរសម្លៀកបំពាក់បុរសណូរ៉ា បានឲ្យដឹងដែរថា សម្លៀកបំពាក់ ដែលគាត់ត្រូវកាត់ជូនភ្ញៀវ គឺមិនបានទាន់ពេលវេលា ហើយពេលខ្លះគាត់ត្រូវរងការស្តីបន្ទោសពីភ្ញៀវថែមទៀតផង។
បន្ថែមពីនេះ អ្នកលក់រកស៊ីបោកអ៊ុត តូបលក់កាហ្វេតូចៗ និងតូបលក់ទឹកអំពៅជាដើម ក៏បានត្អូញត្អែរ ស្រដៀងនឹងម្ចាស់អាជីវកម្មប៉ុន្មាននាក់ខាងលើនេះដែរ។ ពិសេស អ្នករកស៊ីបោកអ៊ុត បានបញ្ជាក់ថា មួយរយៈនេះ មិនត្រឹមតែដាច់ភ្លើងញឹកញាប់តែមួយមុខទេ ទឹកក៏ចេញយឺត ឬពេលខ្លះដាច់បើកមិនចេញក៏មានដែរ ដែលវាគឺពិតជាលំបាកណាស់ សម្រាប់អាជីវកម្មរបស់ពួកគាត់ ដែលរស់ដោយសារតែថាមពលអគ្គិសនី និងទឹកនេះឯង។
អត្ថបទគួរអាន!
ជាមួយគ្នានេះ អ្នកលក់ទឹកអំពៅ នៅម្ដុំសាលាបឋមសិក្សាភ្នំពេញ ថ្មី ដែលធ្លាប់តែលក់ដាច់ ដកឃ្លា សឹងមិនបាននោះ ក៏បានរៀបរាប់ប្រាប់ដែរថា ម៉ាស៊ីនកិនទឹកអំពៅរបស់គាត់គឺត្រូវការភ្លើងដើម្បីគិនអំពៅ តែនៅពេលដាច់ភ្លើង គាត់មិនអាចកិនបានទេ។ គាត់បានបន្ថែមថា គាត់ត្រូវឡើងតាំងពីម៉ោង ៣ ទៅ៤ ព្រឹក ដើម្បីកិនទឹកអំពៅក្លាសេទុកលក់ ព្រោះតែភ្លើងរកជឿជាក់មិនបាន ជួនដាច់ព្រឹក ជួនដាច់ល្ងាច។
ទាក់ទងនឹងបញ្ហាដាច់ភ្លើងញឹកញាប់នេះដែរ ប្រមុខរាជរដ្ឋាភិបាល សម្ដេច ហ៊ុន សែន ធ្លាប់បានអំពាវនាវឲ្យពលរដ្ឋ ពិសេសម្ចាស់អាជីវកម្ម មានការយោគយល់ និងបានជំរុញឲ្យម្ចាស់អាជីវកម្ម គួរតែទិញម៉ាស៊ីនភ្លើងសម្រាប់ទុកប្រើប្រាស់ពេលដែលដាច់ភ្លើងម្ដងៗ ។
ការប្រកាសអំពាវនាវរបស់លោកនាយករដ្ឋមន្ត្រី មួយរយៈចុងក្រោយនេះ គេសង្កេតឃើញថា តម្រូវការម៉ាស៊ីនភ្លើងបានកើនឡើងទ្វេដង ខណៈដែលតម្លៃក៏មានខ្ពស់កប់ទ្វេគុណផងដែរ។
ទោះយ៉ាងណា តែម្ចាស់អាជីវកម្មខ្នាតតូចជាច្រើន បានប្រាប់ថា គាត់មិនអាចប្រើប្រាស់ម៉ាស៊ីនភ្លើងនោះទេ ព្រោះពួកគាត់គ្មានលទ្ធភាពនឹងទិញ ដោយសារម៉ាស៊ីនភ្លើងឡើងថ្លៃពេក។
អាជ្ញាធរអគ្គិនីកម្ពុជាបានចេញសេចក្តីប្រកាសព័ត៌មានដល់សាធារណជនថា បញ្ហាផ្គត់ផ្គង់អគ្គិសនីមិនគ្រប់គ្រាន់នេះ គឺមានរយៈពេល ៧២ថ្ងៃ នឹងបន្តរហូតដល់ ចុងខែឧសភាខាងមុខនេះ ដោយមូលហេតុ អាកាសធាតុក្តៅខ្លាំង និងការខ្វះទឹកខុសប្រក្រតី៕
None
