ធនាគារជាតិនៃកម្ពុជាបានគូសបញ្ជាក់ថា រដ្ឋនឹងបន្តបោះផ្សាយលក់មូលបត្រជាលើកទី៧របស់ខ្លួននៅថ្ងៃទី២២ ខែកុម្ភៈ ឆ្នាំ២០២៣ ជាមួយការបង្កើនអត្រាគូប៉ុង ឬការប្រាក់ដល់៤% សម្រាប់គ្រឹះស្ថានធនាគារ និងមីក្រូហិរញ្ញវត្ថុចូលរួមវិនិយោគ។ សម្រាប់ការបោះផ្សាយលើកនេះ រដ្ឋមិនបានកំណត់ពីទំហំមូលបត្រនោះទេ ពោលគឺស្ថាប័នចូលរួមដេញថ្លៃអាចទិញមូលបត្ររដ្ឋដោយសេរី ជាមួយតម្លៃ១លានរៀលក្នុងមួយឯកតានៃមូលបត្រ។
យើងសង្កេតឃើញថា ការបោះផ្សាយលក់មូលបត្របំណុលរបស់រដ្ឋកាលពីឆ្នាំ២០២២ ពុំសូវទទួលបានការគាំទ្រច្រើនពីស្ថាប័ន និងគ្រឹះស្ថានហិរញ្ញវត្ថុនោះទេ ពោលគឺក្នុងចំណោមការបោះផ្សាយលក់មូលបត្រទំហំ៣០០លានដុល្លារ លក់បានតែជិត២០លានដុល្លារប៉ុណ្ណោះ។ ទោះបីមិនសូវទទួលបានលទ្ធផលល្អពីការបោះផ្សាយលើកដំបូងក្តី តែរដ្ឋបានសម្រេចបន្តបោះផ្សាយលក់មូលបត្រចំនួន២០០លានដុល្លារបន្ថែមទៀតនៅឆ្នាំ២០២៣ បន្ថែមលើទំហំដែលបានបោះផ្សាយកាលពីឆ្នាំ២០២២។
ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជាមានសុទិដ្ឋនិយមខ្ពស់ថា ការជួញដូរមូលបត្របំណុលរបស់រដ្ឋនៅឆ្នាំនេះ នឹងទទួលបានការគាំទ្រពីវិនិយោគិនច្រើនជាងឆ្នាំមុន ក្រោយឯកឧត្តមមើលឃើញថា អត្រាគូប៉ុង៤% ដែលរដ្ឋបានផ្តល់ឲ្យស្ថាប័ន និងគ្រឹះស្ថានហិរញ្ញវត្ថុចូលរួមវិនិយោគជាអត្រាមួយសមរម្យ ដែលអាចជួយធ្វើឲ្យមូលបត្ររដ្ឋមានការទាក់ទាញមួយកម្រិតទៀត។
អត្ថបទគួរអាន
ជុំវិញការបោះផ្សាយលក់មូលបត្ររដ្ឋនេះដែរ ឯកឧត្តម វង្សី វិស្សុត រដ្ឋាលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់កន្លងមកថា ការបោះផ្សាយលក់មូលបត្របំណុលរបស់រដ្ឋបច្ចុប្បន្ន គ្រាន់តែជាការសាកល្បងយន្តនៃការដំណើររបស់ផ្សារមូលបត្រកម្ពុជាតែប៉ុណ្ណោះ មិនមែនដើម្បីកៀរគរថវិកាមកទ្រទ្រង់ការចំណាយរបស់រាជរដ្ឋាភិបាលនោះទេ។ ប៉ុន្តែជាគោលដៅទៅថ្ងៃអនាគតកម្ពុជាចង់ប្រើយន្តការនេះ ដើម្បីធ្វើពិពិធកម្មបំណុលសាធារណៈពីការពឹងផ្នែកលើប្រភពបំណុលពីក្រៅស្រុក មកពឹងផ្អែកប្រភពបំណុលក្នុងស្រុកវិញ ដើម្បីកាត់បន្ថយហានិភ័យផ្សេងៗ។ ឯកឧត្តមបានបន្តថា ការបោះផ្សាយលក់មូលបត្របំណុលរបស់រដ្ឋនេះ ក៏ដើម្បីជាការបើកផ្លូវដល់ការបោះផ្សាយលក់មូលបត្របំណុលរបស់ក្រុមហ៊ុនឯកជនផងដែរ ព្រោះតាមរយៈការបោះផ្សាយលក់មូលបត្ររដ្ឋនេះ នឹងជួយឲ្យរាជរដ្ឋាភិបាលអាចសិក្សាពីចំណុចខ្វះខាត ដើម្បីកែប្រែធ្វើឲ្យដំណើរការនៃបោះផ្សាយលក់មូលបត្រក្នុងផ្សារមូលបត្រកម្ពុជាឲ្យកាន់តែល្អប្រសើរបន្ថែមទៀត។
បើតាមការគូសបញ្ជាក់របស់ឯកឧត្តម វង្សី វិស្សុត កត្តាដែលធ្វើឲ្យការបោះផ្សាយលក់មូលបត្ររដ្ឋមិនសូវទទួលបានការគាំទ្រ គឺដោយសារការផ្តល់អត្រាគូប៉ុងនៅមានកម្រិតទាប បើធៀបនឹងការផ្តល់អត្រាការប្រាក់សន្សំដែលផ្តល់ដោយគ្រឹះស្ថានធនាគារ និងមីក្រូហិរញ្ញវត្ថុ៕
