ដើម្បីជម្លៀសប្រជាជនរបស់ខ្លួន រដ្ឋាភិបាលថៃ បានត្រៀមរួចរាល់ហើយនូវយន្ដហោះពិសេស ដើម្បីទៅទទួលប្រជាជនខ្លួនចេញពីអ៊ុយក្រែន ប្រសិនបើភាពតានតឹងជាមួយរុស្ស៊ីកើនឡើងកាន់តែខ្លាំង។ នេះបើតាមការអះអាងរបស់ អ្នកនាំពាក្យរាជរដ្ឋាភិបាល នៅថ្ងៃព្រហស្បតិ៍សប្ដាហ៍នេះ និងត្រូវបានចុះផ្សាយដោយកាសែតបាងកកប៉ុស្ដិ៍។
លោកស្រី Rachada អ្នកនាំពាក្យរាជរដ្ឋាភិបាលថៃបាននិយាយថា នាយករដ្ឋមន្ត្រី ប្រាយុទ្ធ ចាន់អូចា មានការព្រួយបារម្ភចំពោះសុវត្តិភាពរបស់ជនជាតិថៃដែលរស់នៅអ៊ុយក្រែន ហើយក្រសួងការបរទេសបានផ្តល់ព័ត៌មានថ្មីៗជាប្រចាំ បន្ទាប់ពីមានការឈ្លានពានរបស់រុស្ស៊ីលើអ៊ុយក្រែនតាំងពីថ្ងៃព្រហស្បតិ៍សប្ដាហ៍មក។ ក្រសួងបានបញ្ចាក់ថា ផែនការជម្លៀសនេះគឺនឹងធ្វើឡើងក្នុងករណីមានអាសន្ន ដោយជើងហោះហើរពិសេសបានត្រៀមរួចជាស្រេច ដើម្បីបញ្ជូនទៅជម្លៀសប្រជាជនថៃចេញពីអ៊ុយក្រែន។
អត្ថបទគួរអាន
បច្ចុប្បន្ន ស្ថានភាពនៅអ៊ុយក្រែន កំពុងវិវត្តកាន់តែអាក្រក់ទៅៗហើយ ខណៈដែលកងទ័ពរុស្ស៊ី នៅថ្ងៃសុក្រសប្ដាហ៍នេះ បានបាញ់ស្រេចគ្រាប់មីស៊ីលទៅលើរដ្ឋធានី កៀវរបស់អ៊ុយក្រែន។
អ្នកនាំពាក្យរាជរដ្ឋាភិបាលថៃបានអះអាងថា ក្នុងករណីអ៊ុយក្រែនបិទដែនអាកាសរបស់ខ្លួន និង ចំពោះយន្តហោះស៊ីវិល នោះយានជំនិះផ្សេងទៀតនឹងត្រូវបានរៀបចំ ដើម្បីនាំជនជាតិថៃនៅអ៊ុយក្រែនឆ្លងកាត់ព្រំដែនទៅកាន់ទីក្រុង Warsaw ក្នុងប្រទេសប៉ូឡូញ ហើយនឹងឡើងយន្តហោះពិសេសរបស់ថៃ ដើម្បីត្រឡប់ទៅមាតុប្រទេសវិញ។
គួរជម្រាបថា បើតាមការលើកឡើងរបស់ លោក Supoj Malaniyom អគ្គលេខាធិការក្រុមប្រឹក្សាសន្តិសុខជាតិ បានឲ្យដឹងថាមានជនជាតិថៃប្រហែល ២៥០ នាក់ដែលកំពុងរស់នៅក្នុងប្រទេសអ៊ុយក្រែន។ ក្នុងនោះផងដែរ រដ្ឋាភិបាលថៃក៏បានសម្តែងនូវការព្រួយបារម្ភអំពីសង្គ្រាមផ្ទុះឡើងរវាងរុស្ស៊ី និង
អ៊ុយក្រែន ហើយប្រទេសថៃជំរុញឱ្យភាគីទាំងពីរដោះស្រាយជម្លោះតាមរយៈការសន្ទនាដោយសន្តិវិធី៕
None
