អ្នកឧកញ៉ លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា បានគូសបញ្ជាក់ថា វិស័យសំណង់ និងអចលនទ្រព្យនៅតែរក្សាបាននូវភាពធន់ រឹងមាំរបស់ខ្លួន ទោះបីជារយៈពេលចុងក្រោយនេះការប្រែប្រួលនៃស្ថានការណ៍ពិភពលោកទាំងបញ្ហាវិបត្តិកូវីដ១៩ និងសង្គ្រាមនៅអ៊ុយក្រែនបានគំរាមកំហែងដល់វិស័យនេះយ៉ាងណាក្ដី។
សមាគមអ្នកអភិវឌ្ឍន៍លំនៅឋានកម្ពុជា កាលពីថ្ងៃទី៣០ ខែវិច្ឆិកា ឆ្នាំ២០២២នេះ បានបើកកិច្ចប្រជុំវិសាមញ្ញ ពិភាក្សាអំពីវិស័យសំណង់នៅកម្ពុជា ដើម្បីពិភាក្សាអំពីបញ្ហាប្រឈមនានាដែលកំពុងជួបប្រទះ និងស្វែងរកដំណោះស្រាយរួមគ្នាសម្រាប់វិស័យសំណង់ និងអចលនទ្រព្យ។ កិច្ចពិភាក្សានេះបានប្រព្រឹត្តទៅក្រោមការដឹកនាំដោយ អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា និងសមាជិក-សមាជិការជាច្រើនរូបទៀតផងដែរ។
បើតាម អ្នកឧកញ៉ លី ហួរ ការរៀបចំកិច្ចប្រជុំវិសាមញ្ញនេះឡើង ក្នុងគោលបំណង់ពិភាក្សាលើបញ្ហាប្រឈមជាច្រើនក្នុងវិស័យសំណង់ ដែលត្រូវយកមកដោះស្រាយឱ្យបានទាន់ពេលវេលា។ យ៉ាងណាមិញ អ្នកឧកញ៉ លី ហួរ បានគូសបញ្ជាក់ថា នៅរយៈពេលចុងក្រោយនេះ វិស័យអចលនទ្រព្យនៅប្រទេសកម្ពុជា ក៏ដូចនៅបណ្តាប្រទេសដ៏ទៃទៀតនៅលើសកលោក ហាក់មានការធ្លាក់ចុះដូចគ្នាផងដែរ។ ការធ្លាក់ចុះបែបនេះ ក្រោយពីមានការរីករាលដាលជម្ងឺកូវីដ១៩ នៅលើសកលលោក បូករួមជាមួយបញ្ហាសង្រ្គាមរវាងរុស្ស៊ី និងអ៊ុយក្រែន ដែលសង្រ្គាមនៅប្រទេសទាំងពីរនេះ បានជះឥទ្ធិពល និងបញ្ហាប្រឈមជាច្រើនដល់សេដ្ឋកិច្ចនៅទូទាំងពិភពលោកតែម្តង រួមទាំងកម្ពុជាដែរ។
យ៉ាងណាក៏ដោយចុះ អ្នកឧកញ៉ាលីហួរ បានគូសបញ្ជាក់ថា វិស័យសំណង់ និងអចលនទ្រព្យនៅកម្ពុជា នៅតែរក្សាបាននូវភាពធន់ រឹងមាំរបស់ខ្លួន ទោះបីជាមានជួបបញ្ហាគំរាមកំហែងជាសកលយ៉ាងណាក្ដី។
អត្ថបទគួរអាន
បើតាមព្រឹត្តិបត្រស្ថិតិសេដ្ឋកិច្ច និងហិរញ្ញវត្ថុ ប្រចាំត្រីមាសទី៣ ឆ្នាំ២០២២ របស់ក្រសួងសេដ្ឋកិច្ច បានបង្ហាញថា វិស័យសំណង់ រំពឹងថានឹងងើបឡើងវិញ ក្នុងអត្រា ៣% នៅក្នុងឆ្នាំ២០២២នេះ ដោយសារកំណើនការផ្តល់ឥណទានលើវិស័យសំណង់បានបន្តកើនឡើង។ ជាក់ស្តែង គិតត្រឹមត្រីមាសទី៣ ឆ្នាំនេះ គ្រឹះស្ថានធនាគារ និងមីក្រូហិរញ្ញវត្ថុ បានផ្ដល់ឥណទានដល់វិស័យសំណង់មានចំនួនប្រមាណ ៤ពាន់៧រយលានដុល្លារអាមេរិក ក្នុងនោះ គ្រឹះស្ថានធនាគារបានផ្តល់ឥណទានចំនួន ប្រមាណ ៤ពាន់៣រយលានដុល្លារ មានការកើនឡើង១៩% បើធៀបនឹងរយៈពេលដូចគ្នាកាលពីឆ្នាំ២០២១ ខណៈគ្រឹះស្ថានមីក្រូហិរញ្ញវត្ថុបានផ្តល់ឥណទានចំនួនជាង ៤រយលានដុល្លារ កើនឡើង ៣៥% ផងដែរ។
របាយការណ៍ដដែលនេះ បានបង្ហាញទៀតថា នៅត្រីមាសទី៣ ឆ្នាំ២០២២នេះ ការអនុម័តលើសំណើគម្រោងសាងសង់សរុបមានចំនួន ១១៧៥ គម្រោង បានកើនឡើងចំនួន ១៤៧ គម្រោង ស្មើនឹងជាង ១៤% បើធៀបនឹងរយៈពេលដូចគ្នាកាលពីឆ្នាំមុន។ ប៉ុន្ដែ តម្លៃគម្រោងសាងសង់សរុបបានធ្លាក់ចុះប្រមាណ ៦០% មកនៅត្រឹមតែជាង៧៥០លានដុល្លារអាមេរិកប៉ុណ្ណោះ។ គម្រោងសំណង់ដែលមានការធ្លាក់ចុះភាគច្រើន គឺជាសំណង់ទេសចរណ៍ និងសំណង់ពាណិជ្ជកម្ម៕
