នៅត្រីមាស១ ឆ្នាំ២០២២ កម្ពុជាទទួលបានទេសចរអន្តរជាតិជាង១៥ម៉ឺននាក់ កើនជាង១១៤%

ក្នុងនោះ ការធ្វើដំណើរតាមផ្លូវអាកាសក៏មានការកើនឡើងគំហុកដល់ទៅជិត១៦០%ផងដែរ។ នេះបើតាមរបាយការណ៍របស់ក្រសួងទេសចរណ៍។

យោងតាមរបាយការណ៍ស្ថិតិទេសចរត្រីមាសទី១ ឆ្នាំ២០២២ របស់ក្រសួងទេសចរណ៍បានបង្ហាញថា មានទេសចរអន្តរជាតិសរុបជាង ១៥ម៉ឺននាក់ បានធ្វើដំណើរចូលមក​ប្រទេស​កម្ពុជា ដោយបានកើនឡើងរហូត១១៤% បើប្រៀបធៀបនឹងត្រីមាសទី១នៅឆ្នាំ២០២១។ ក្នុងនោះ អ្នកដំណើរចូលមកកម្ពុជា តាមផ្លូវអាកាសមានជាង ៨ម៉ឺននាក់ កើនជិត​១៦០%, អ្នកដំណើរតាមផ្លូវទឹកមានប្រមាណ២ពាន់នាក់ និងអ្នកដំណើរតាមផ្លូវគោកមានជាង៦ម៉ឺននាក់។ ជាមួយគ្នានេះ រដ្ឋមន្រ្តីក្រសួងទេសចរណ៍ ឯកឧត្ដម ថោង ខុន បានបង្ហាញនូវការរំពឹងខ្ពស់ថា ក្នុងឱកាសបុណ្យចូលឆ្នាំប្រពៃណីខ្មែរ ដែលនឹងប្រព្រឹត្តទៅនៅថ្ងៃ១៤,ថ្ងៃទី១៥ និងថ្ងៃទី១៦ ខែមេសា ខាងមុខនេះ នឹងមានភ្ញៀវទេចរ​ច្រើនធ្វើ​ដំណើរកម្សាន្តនៅតាមតំបន់រមណីយដ្ឋាន និងកន្លែងទេសចរណ៍នានានៅទូទាំងប្រទេស​។

បើតាមរដ្ឋមន្រ្តីក្រសួងទេសចរណ៍ ទោះបី បច្ចុប្បន្ន កម្ពុជាបានជួបបញ្ហាសាំងឡើងថ្លៃ ក៏ពិតមែនប៉ុន្ដែ​នៅតាមតំបន់កម្សាន្ត និងកន្លែងទេសចរណ៍​នានា ក្នុងប្រទេសកម្ពុជា នៅតែមានវត្តមានរបស់ភ្ញៀវទេសចរ​ទៅកម្សាន្ត។ ជាក់ស្ដែង បន្ទប់ស្នាក់នៅតាមសណ្ឋាគារ ផ្ទះសំណាក់ ក្នុងខេត្តធំៗមានដូចជា ខេត្តសៀមរាប, ព្រះសីហនុ និងតំបន់ឆ្នេរ មកដល់ពេលនេះ សម្ទុះនៃការកក់ពីអ្នកទេសចរមាន​ជាបន្ដបន្ទាប់ ដើម្បីស្នាក់នៅ អំឡុងពិធីបុណ្យចូលឆ្នាំថ្មីប្រពៃណីជាតិ។

សូមបញ្ជាក់ថា បន្ទាប់ពីមានការប្រកាសជាផ្លូវការ ពីនាយករដ្ឋមន្រ្តីនៃកម្ពុជា សម្ដេច ហ៊ុន សែន ថ្មីៗនេះ ឲ្យមានការរៀបចំពិធីបុណ្យចូលឆ្នាំឡើងវិញ ក្រសួងទេសចរណ៍ ក៏បានក្រើនរំលឹកផងដែរ ដល់អ្នករកស៊ី និងភ្នាក់ងារ ក្នុងវិស័យទេសចរណ៍ទាំងអស់ ត្រៀមរៀបចំសុវត្ថិភាព, អនាម័យ, គុណភាព, សេវាកម្មឲ្យបានល្អ និងពិសេសបំផុតគឺធ្វើយ៉ាងណា ដើម្បីកុំឲ្យមានការឡើងថ្លៃលើផ្នែកសេវាកម្ម និងម្ហូបអាហារ ដើម្បីរៀបចំទទួលភ្ញៀវទេសចណ៍ជាតិ និងអន្ដរជាតិ ផងដែរ៕