តាមការវិភាគរបស់អ្នកជំនាញ ចំពោះច្បាប់នេះដោយផ្អែកលើទិដ្ឋភាពសេដ្ឋកិច្ច ដែលត្រូវបានផ្សាយដោយទីភ្នាក់ងារព័ត៌មាន AP បានបង្ហាញថា ច្បាប់ថ្មីនេះទំនងជាគ្មានឥទ្ធិពលលើការបង្ក្រាបអតិផរណាក្នុងពេលភ្លាមៗនោះទេ។ ច្បាប់ដែលសភាបានអនុម័តហើយឥឡូវកំពុងរង់ចាំការចុះហត្ថលេខារបស់លោកបៃឌិននេះ នឹងមិនអាចចូលទៅដោះស្រាយដោយផ្ទាល់ដល់ កត្តាជំរុញសំខាន់ៗមួយចំនួននៃការកើនឡើងតម្លៃថាមពល និងអាហារនោះទេ។
ទយ៉ាងណា ច្បាប់នេះអាចជួយសន្សំប្រាក់សម្រាប់ជនជាតិអាមេរិកមួយចំនួន ដោយវានឹងកាត់បន្ថយការចំណាយទៅលើថ្នាំសង្កូវសម្រាប់មនុស្សវ័យចំណាស ពង្រីកការឧបត្ថម្ភធនធានារ៉ាប់រងសុខភាព និងកាត់បន្ថយតម្លៃថាមពល ដែលរដ្ឋផ្គត់ផ្គង់។
សូម្បីតែលោកចូបៃឌិន ក៏បានទទួលស្គាល់ដែរថា ឥទ្ធិពលនៃច្បាប់ស្តីពីអតិផរណាបានសំដៅកាត់បន្ថយតម្លៃដោយផ្នែកមួយៗប៉ុណ្ណោះ នឹងសំដៅទៅតាមក្រុមមនុស្ស ជាជាងកាត់បន្ថយអតិផរណាទាំងមូល។ ក្នុងសប្តាហ៍នេះ លោកប្រធានាធិបតីបៃឌិន និយាយថា លោកនឹងផ្តើមចាត់វិធានការកាត់បន្ថយថ្លៃថ្នាំតាមវេជ្ជបញ្ជា ថ្លៃធានារ៉ាប់រងសុខភាព និងថ្លៃថាមពលតែម្តង។
អត្ថបទគួរអាន
គួរជម្រាបថា ការចំណាយលើវិស័យសុខាភិបាលរបស់ពលរដ្ឋអាមេរិកម្នាក់ៗ គឺមានតម្លៃខ្ពស់ខ្លាំងណាស់។ ការសិក្សាមួយកាលពីឆ្នាំ២០១៩ មានពលរដ្ឋអាមេរិក ១,២លាននាក់បានចំណាយជាមធ្យមជាង ៣ពាន់ដុល្លារលើឱសថ។ បើគិតលើចំនួនខ្ពស់បំផុត អ្នកប្រើប្រាស់ឱសថអាចត្រូវចំណាយរហូតដល់១ម៉ឺនដុល្លារឬ១ម៉ឺន៥ពាន់ដុល្លារក្នុងមួយឆ្នាំ។
ទោះយ៉ាងណា ការចំណាយលើថ្នាំសង្កូវនេះ គឺមានប្រហែលតែ១% ប៉ុណ្ណោះ នៅក្នុងសន្ទស្សន៍តម្លៃទំនិញប្រើប្រាស់នៅអាមេរិក ខណៈការចំណាយលើតម្លៃអគ្គិសនី និងឧស្ម័នវិញ គឺមាន៣,៦%។
ក្រុមអ្នកសេដ្ឋវិទូជាង១២០នាក់ បានសរសេរលិខិតស្នើឲ្យរដ្ឋាភិបាលអាមេរិក ធ្វើយ៉ាងណា កាត់បន្ថយឱនភាពថវិកាជាតិបន្ថែមទៀត ដើម្បីកាត់បន្ថយសម្ពាធអតិផរណា ព្រោះពួកគេយល់ថា មានតែឱនភាពថវិកាធ្លាក់ចុះទេ ទើបធ្វើឲ្យអតិផរណាធ្លាក់ចុះបាន ពោលគឺរដ្ឋត្រូវតែបន្ថយចំណាយ និងបង្កើនការយកពន្ធ ទើបអាចកាត់បន្ថយឱនភាពថវិកា និងកាត់បន្ថយតម្រូវការក្នុងសេដ្ឋកិច្ច និងកាត់បន្ថយសម្ពាធតម្លៃ។
ទោះយ៉ាងណា អតិផរណានៅសហរដ្ឋអាមេរិកបានធូរស្រាលបន្តិចដែរ កាលពីខែកក្កដាកន្លងទៅនេះ។ សន្ទស្សន៍តម្លៃទំនិញប្រើប្រាស់បានធ្លាក់ចុះដល់ពី ៩,១% កាលពីខែមិថុនា មកនៅត្រឹម ៨,៥% កាលពីខែកក្កដា ដែលកំរិតនេះគឺកំរិតដែលប្រសើរជាងអ្វីដែលគេបានព្យាករណ៍ទៅទៀត។ មហាអំណាចសេដ្ឋកិច្ចលេខមួយពិភពលោក បានស្គាល់ពីការធ្លាក់ចុះអតិផរណាដូចនេះ ក៏ដោយសារតែ ធនាគារកណ្តាលនៃរដ្ឋសហព័ន្ធបានដំឡើងអត្រាការប្រាក់ម្តងហើយម្តងទៀតដើម្បីប្រឹងទប់ទល់៕
