សង្គ្រាមអ៊ីរ៉ង់ ធ្វើឱ្យអាម៉េរិក អាចត្រូវការពេលច្រើនឆ្នាំ ដើម្បីស្ដារស្តុកអាវុធទំនើបៗឡើងវិញ

បើយោងតាមការចុះផ្សាយរបស់ទីភ្នាក់ងារព័ត៌មាន AP មជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ បានបញ្ជាក់ថា សហរដ្ឋអាម៉េរិក បានបាញ់មីស៊ីលឆ្លងទ្វីប Tomahawk អស់ជាង១,០០០គ្រាប់ និងប្រព័ន្ធខែលការពារមីស៊ីល ឬសំណាញ់មេឃា THAAD និង Patriot អស់មួយចំនួនធំក្នុងអំឡុងពេលប្រយុទ្ធគ្នាក្នុងសង្គ្រាមអ៊ីរ៉ង់។ ដោយសារអត្រាផលិតអាវុធនៅមានកម្រិត បណ្ដាក្រុមហ៊ុនម៉ៅការរបស់ក្រសួងការពារជាតិ អាម៉េរិក អាចត្រូវការពេលជាច្រើនឆ្នាំ ទម្រាំអាចបញ្ចូលស្តុកអាវុធឱ្យដូចកម្រិតមុនសង្គ្រាមឡើងវិញ។
មជ្ឈមណ្ឌលនេះ បានព្រមានថា ការស្រកចុះយ៉ាងខ្លាំង នៃស្តុកអាវុធទំនើបៗបានបង្កហានិភ័យងាយរងគ្រោះជាបណ្តោះអាសន្ននៅក្នុងតំបន់ប៉ាស៊ីហ្វិកខាងលិច ខណៈដែលប្រទេសចិនបន្តពង្រីកសមត្ថភាពយោធារបស់ខ្លួន។ មជ្ឈមណ្ឌលនេះ បានកត់សម្គាល់ថា ការជំរុញផលិតកម្មមិនមែនផ្តោតតែលើបញ្ហាហិរញ្ញប្បទាននោះទេ ប៉ុន្តែបញ្ហាចោទ គឺពេលវេលា ព្រោះការពង្រីករោងចក្រ និងខ្សែច្រវាក់ផ្គត់ផ្គង់សម្រាប់ប្រព័ន្ធអាវុធស្មុគស្មាញត្រូវការពេលច្រើនឆ្នាំ។
ទោះជាយ៉ាងណា មន្ទីរបញ្ចកោណ បានអះអាងថា សហរដ្ឋអាម៉េរិក នៅតែមានអាវុធគ្រប់គ្រាន់សម្រាប់ច្បាំងគ្រប់ប្រតិបត្តិការយោធា ខណៈដែលក្រុមហ៊ុនម៉ៅការរបស់ក្រសួងការពារជាតិអាម៉េរិក រួមទាំងក្រុមហ៊ុន Lockheed Martin និងក្រុមហ៊ុន RTX ជាដើម កំពុងបង្កើនការផលិតមីស៊ីល និងបើករោងចក្រថ្មីៗ ដើម្បីពន្លឿនការប្រគល់ទំនិញឱ្យទាន់តម្រូវការ៕

ដោយ: តែម សុខុម