សមាគមម្រេចកំពត បានបង្ហាញពីសុទិដ្ឋិនិយមពីទីផ្សារនៅដើមឆ្នាំ២០២១នេះ ដោយហេតុថាបច្ចុប្បន្នមានក្រុមហ៊ុនធំៗជាច្រើន បានផ្តើមកម្មង់ទិញម្រេចកំពតពីប្រជាកសិករជាច្រើនរយគ្រួសាររួចហើយ។ ក្នុងនោះ រួមមានក្រុម EU Land Pepper ដែលជាក្រុមហ៊ុនរបស់អឺរ៉ុប បានបញ្ជាទិញម្រេចចំនួន ១០ តោនរួចហើយដែរសម្រាប់ឆ្នាំថ្មីនេះ។
ទិន្នផលម្រេចកំពត ដែលប្រមូលបានក្នុងឆ្នាំ២០២០មានប្រមាណជាង ៨២តោន ធ្លាក់ចុះជាង ២០តោនបើប្រៀបធៀបនឹងទិន្នផលឆ្នាំ២០១៩ដែលប្រមូលបានក្នុងរង្វង់ប្រមាណ ១០០តោន។
អត្ថបទទាក់ទង!
បើតាមលោក ងួន ឡាយ ការធ្លាក់ចុះទិន្នផលម្រេចកំពតក្នុងឆ្នាំ ២០២០គឺបណ្តាលមកពីកសិដ្ឋានដាំម្រេចធំៗមួយចំនួននៅខេត្តកំពត បានបោះបង់ចោលការដាំដុះរបស់ខ្លួន ស្របពេលដែលកសិដ្ឋានខ្លះ មិនទទួលបានទិន្នផលច្រើនទេដោយហេតុសារតែកង្វះខាតបច្ចេកទេសដាំដុះនិងមិនស្របតាមស្តង់ដារម្រេចកំពត។
លោកបន្ថែមទៀតថា ទោះយ៉ាងណា បរិមាណនាំចេញទៅក្រៅប្រទេសមិនបានប៉ះពាល់នោះទេ ពោលគឺនៅរក្សាបរិមាណល្អដដែល ទោះបីស្ថិតក្នុងបរិបទកូវីដ-១៩ក៏ដោយ។ ចំពោះទីផ្សារក្នុងស្រុកវិញ លោក ងួន ឡាយបានលើកឡើងថា មានការធ្លាក់ចុះគួរសមក្នុងបរិបទនៃជំងឺឆ្លងកូវីដ-១៩ ប៉ុន្តែមិនបានចោទជាបញ្ហាខ្លាំងដល់ប្រជាកសិករនោះទេ៕
None
