តម្លៃដី និងអចលនទ្រព្យនៅខេត្តភាគខាងត្បូងវៀតណាមកំពុងធ្លាក់ចុះយ៉ាងខ្លាំង

តាមសេចក្តីរាយការណ៍របស់បណ្តាញព័ត៌មាន VietnamNews បានឲ្យដឹងថា វិនិយោគិនជាច្រើនបានខ្ចីលុយ ដើម្បីវិនិយោគលើអចលនទ្រព្យកាលពីឆ្នាំមុនដោយសង្ឃឹមថានឹងទទួលបានប្រាក់ចំណេញ ប៉ុន្តែផ្ទុយទៅវិញបានទទួលរងការខាតបង់ដោយសារតែការរិតបន្តឹងលើឥណទាន តាមរយៈការប្រកាស ការដំឡើងអត្រាការប្រាក់ និងបញ្ហាកង្វះចរន្តសាច់ប្រាក់ ជាដើម។

ប្រជាពលរដ្ឋមួយរូបនៅទីក្រុងហូជីមិញ បានអះអាងប្រាប់សារព័ត៌មាន Vietnamnews ថា លោកបានទិញដីមួយកន្លែងក្នុងតម្លៃ ៥ ពាន់លានដុង ប្រមាណជា ២០ម៉ឺនដុល្លារ នៅខេត្ត ដុងណៃ ដោយសង្ឃឹមថា នឹងលក់វាឡើងវិញក្នុងរយៈពេលមួយឆ្នាំក្រោយ ដើម្បីទទួលបានប្រាក់ចំណេញ ប៉ុន្តែលទ្ធផល គឺមានតែការខាតបង់។

លោកបានអះអាងថា ក្រោពីបានទិញមួយរយៈនៅ ចុងឆ្នាំ ២០២២កន្លងទៅ ធនាគារបានប្រកាសដំឡើងអត្រាការប្រាក់ ហើយលោកក៏សម្រេចចិត្តលក់វា ដែលនាំឲ្យលោកខាត ដល់ទៅជាង ៣ម៉ឺនដុល្លារ ខុសពីការរំពឹងទុក ។

អ្នកវិភាគទីផ្សារអចលនទ្រព្យនៅវៀតណាមបានអះអាងថា នៅរយៈពេល ៨ ខែ ចុងក្រោយ ជាពិសេសគឺត្រីមាសទី ៣ និង ទី៤ នៃឆ្នាំ២០២២ តម្លៃដីធ្លាក់ចុះយ៉ាងគំហុក ទើបធ្វើឲ្យអ្នកវិនិយោគលើអចលនទ្រព្យប្រឈមនឹងការខាតបង់ ពិសេស គឺអ្នកដែលមានការខ្ចីបំណុលធនាគារមកវិនិយោគតែម្ដង ដ្បិតថា ពួកគេត្រូវប្រឈមនឹងអត្រាការប្រាក់ខ្ពស់ ហើយតម្លៃអចលនទ្រព្យធ្លាក់ចុះខ្លាំង៕

អត្ដបទ ៖ សរ សុជាតិ