អាជ្ញាធររាជធានីភ្នំពេញសម្រេចបិទតំបន់មួយចំនួន ក្រោយរកឃើញកម្មកររោងចក្រឆ្លងកូវីដ-១៩ ជាង៦០០នាក់

អភិបាលរាជធានីភ្នំពេញ ឯកឧត្តម ឃួង ស្រេងបានបញ្ជាក់នៅក្នុងសន្និសីទសារព័ត៌មាន នៅយប់ថ្ងៃទី ៩ ខែមេសា ឆ្នាំ២០២១នេះ ថា អាជ្ញាធររាជធានីភ្នំពេញ បានសម្រេចបិទតំបន់មួយចំនួននៅរាជធានីភ្នំពេញ នៅយប់ម៉ោងសូន្យ ថ្ងៃទី ១០ ខែមេសា រហូតដល់ថ្ងៃទី ២៣ ខែមេសាឆ្នាំ២០២១ ដើម្បីទប់ស្កាត់ការឆ្លងកូវីដ-១៩ ក្រោយពីរកឃើញថា នៅថ្ងៃទី ៩ ខែមេសា មានករណីឆ្លងកម្មករកម្មាការិនីរោងចក្រដល់ទៅជាង ៦០០ករណីបន្ថែមទៀត។

បុគ្គលិកសុខាភិបាលកំពុងយកសំណាកពលរដ្ឋក្នុងតំបន់កំពុងរាលដាលកូវីដ១៩នៅកម្ពុជា។ រូបភាព៖ គ្រូពេទ្យស្ម័គ្រចិត្តយុវជនសម្តេចតេជោ

បើតាមឯកឧត្តម ឃួង ស្រេង ក្នុងរោងចក្រមួយដែលមានករណីឆ្លងកូវីដ-១៩ ខ្លាំងនោះ មានកម្មករដល់ទៅជាង២ពាន់នាក់ ហើយក្នុងនោះនៅសល់មួយចំនួនទៀតមិនទាន់បានយកសំណាកអស់នៅឡើយ។

បើតាមសម្រេចមួយពីរដ្ឋបាលរាជធានីភ្នំពេញ ដែលបានចេញថ្ងៃទី ៩ មេសា ឆ្នាំ២០២១ ក៏បានឲ្យដឹងដែរថា អាជ្ញាធររាជធានីភ្នំពេញ បានសម្រេចបិទខ្ទប់ភូមិសាស្ត្រសង្កាត់ស្ទឹងមានជ័យទី១ និងសង្កត់ស្ទឹងមានជ័យទី២ ក្នុងខណ្ឌមានជ័យ ដែលជាតំបន់មានការឆ្លងរីករាលដាលនៃកូវីដ-១៩ ក្នុងព្រឹត្តិការណ៍សហគមន៍២០កុម្ភៈ ដោយការបិទនេះ មានរយៈពេលសប្ដាហ៍ ចាប់ពីវេលាម៉ោង សូន្យនាថ្ងៃទី ១០ មេសា ដល់ថ្ងៃទី ២៣ ខែមេសា។

ឯកឧត្តម ឃួង ស្រេង បានមានប្រសាសន៍បន្ថែមថា សម្រាប់ខណ្ឌពោធិ៍សែនជ័យ ក៏មានភូមិចំនួន៦ ត្រូវបានបិទដែររួមមាន ភូមិត្រពាំងថ្លឹងពីរ និងភូមិទួលពង្រ នៃសង្កាត់ចោមចៅ១, ភូមិចំការឪឡឹក១ ភូមិប៉ប្រកខាងត្បូង ភូមិប៉ប្រកខាងជើង និងភូមិត្រពាំងល្វា១ នៃសង្កាត់ការកាបទី១ និងភូមិចំការឪឡឹក១ នៃសង្កាត់កាកាបទី២ ខខណៈដែលខណ្ឌសែនសុខ ក៏ត្រូវបានបិទខ្ទប់ភូមិទ្រុងមាន់សង្កាត់អូបែកខ្អម។

ទោះយ៉ាងណា សេចក្ដីសម្រេចនោះ ក៏មានករណីលើកលែងចំពោះការធ្វើដំណើរដែលចាំបាច់មួយចំនួនផងដែរ។

សូមបញ្ជាក់ថា យោងតាមសេចក្ដីប្រកាសព័ត៌មានរបស់ក្រសួងសុខាភិបាលកម្ពុជា ដែលបានផ្សាយនៅរសៀលថ្ងៃទី ៩ ខែមេសា ឆ្នាំ២០២១ បានរកឃើញអ្នកឆ្លងកូវីដ-១៩ ករណីថ្មីដល់ទៅ ៥៧៦នាក់ ដែលក្នុងនោះ មានដល់ទៅជាង៥០០នាក់គឺនៅរាជធានីភ្នំពេញ។

None